وڭتايلاندىرۋ ماقساتىن ءتۇسىندىرۋ باعىتىندا اۋدان اكىمدىگى روزوۆكا, ەفرەموۆكا, ميچۋرين اتىنداعى, شاقات اۋىلدارىندا جەرگىلىكتى تۇرعىندارىمەن كەزدەسىپ جيىندار وتكىزۋدە.
ياعني, ءتيىمدى وڭتايلاندىرۋ بارىسىندا اۋىلداردىڭ دامۋى 2025 جىلعا دەيىنگى «وڭىرلەردى دامىتۋ» باعدارلاماسىنا ساي جۇرگىزىلەدى. باعدارلاما مەملەكەتتىك, الەۋمەتتىك قىزمەتتەرمەن قامتىلعان جاڭا زامان اۋىلدارىن قالىپتاستىرۋعا مۇمكىندىك بەرەدى.
ال 140 تۇرعىن قالعان 37 ۇيدەن تۇراتىن زاوزەرنوە شاعىن اۋىلىندا ەشبىر الەۋمەتتىك نىسان جوق ەكەن. كىرەبەرىس جول جوندەلمەك. ەكى ارالىققا وقۋشىلار مەكتەپ اۆتوبۋسىمەن بارۋدا.
– شاعىن اۋىلدى قاعاز جۇزىندە تاراتىپ, شاقات اۋىلىنىڭ قۇرامىنا قوسۋ ءتيىمدى. زاوزەرنوە شاقات اۋىلى قۇرامىنا ەنسە, 800 تۇرعىنى بار قوس اۋىلعا بولىنەتىن قاراجاتتىڭ يگىلىگىن كورەر ەدىك, – دەيدى اۋىل اكىمى بازارباي ابيەۆ.
گوسپلەمستانسا بولىمشەسى دە ميچۋرين اتىنداعى اۋىلعا قوسىلىپ, تۇرعىندار سانى 2 جارىم مىڭعا جەتپەكشى.
ال بيىل ەلىمىزدە حالىق ساناعىنىڭ وتەتىنى بەلگىلى. اۋىلدار سانىنىڭ رەتكە كەلۋى دە, اۋدانداعى گريگورەۆكا, ولگينكا, لۋگانسك, چەرنورەتسك, روجدەستۆەنكا سياقتى اۋىلدىق اۋماق اتاۋلارىنىڭ دا اتى-جوندەرى ەندى ەلدىك مۇددەگە ساي وزگەرگەنى قاجەت-اق.
بۇل كۇندەرى وڭىردەگى اۋداندارعا ورالماندار, وڭتۇستىكتەن قونىس اۋدارۋشىلار كوشىپ كەلۋدە.
پاۆلودار وبلىسى,
پاۆلودار اۋدانى
