مەديتسينا • 21 قاڭتار، 2020

فليۋوروگرافيالىق تەكسەرۋدەن ءوتۋ ماڭىزدى

46 رەتكورسەتىلدى

جۋىردا بەلگىلى ءبىر مەكەمەدە قاۋىپسىزدىككە تەكسەرىلۋ ماقساتىندا قويىلعان قۇرىلعىدان اياعى اۋىر قىزمەتكەر ايەلدى وتۋگە ماجبۇرلەگەن كۇزەت ساقشىلارىنىڭ ارەكەتى قوعام تاراپىنان سىنعا ىلىكتى. البەتتە، دارىگەرلەر جۇكتىلىك مەرزىمىندە ساۋلەلەنۋ قاۋپى بار بارلىق قۇرىلعىلاردان اۋلاق جۇرۋگە كەڭەس بەرەدى. الايدا بۇگىندە ستراتەگيالىق ماڭىزى بار كەيبىر مەكەمەلەردىڭ قىزمەتكەرلەرى اراسىندا اتالعان ماسەلە وڭتايلى شەشىمىن تاپپاي وتىرعان سىڭايلى.

قوعامدىق دەنساۋلىق ساقتاۋ ۇلتتىق ورتالىعى ينفەكتسيالىق ەمەس اۋرۋلاردىڭ الدىن الۋ دەپارتامەنتىنىڭ سكرينينگتىك باعدارلامالاردى مونيتورينگىلەۋ ءبولىمىنىڭ باس مامانى گۇلجان كوڭىرشينانىڭ ايتۋىنشا، جۇكتى ايەلدەر، اسىرەسە ءبىرىنشى تريمەستردە فليۋوروگرافيادان وتۋىنە تىيىم سالىنادى. سوندىقتان ولارعا كەز كەلگەن ساۋلەلەنۋ قاۋپى بار قۇرىلعىدان ءوتۋ دە قاۋىپتى.

وسى ورايدا فليۋوروگرافيالىق تەكسەرىلۋدى نەشە جاستان باستاپ وتۋگە بولاتىنى، جىلىنا قانشا رەت ءوتۋ قاجەتتىگى كەز كەلگەن ادامعا قاجەتتى اقپارات ەكەنى داۋسىز.

«كەۋدە قۋىسىنىڭ فليۋوروگرافياسى – كەۋدە قۋىسى مەن وكپە ورگاندارىن رەنت­گە­نو­لوگيالىق تەكسەرۋدىڭ پروفي­لاك­تيكالىق جانە دياگنوستيكالىق ءادىسى. كەۋ­دە قۋىسىنىڭ فليۋو­روگرافياسى وبىردى، تۋبەركۋلەزدى جانە وكپەنىڭ اۋرۋلارىن انىقتاۋ ءۇشىن سكرينينگتىك زەرتتەۋ بولىپ تابىلادى»، دەدى گ.كوڭىرشينا.

ماماننىڭ اقپاراتى بويىنشا، فليۋو­روگرافيا دياگنوستيكالىق ماقساتتا جىلىنا 1 رەت بارلىق ەرەسەكتەر مەن 15 جاس­تان باستاپ جاسوسپىرىمدەرگە جۇرگىزىلەدى. الايدا وسى تەكسەرۋ ءجيى جۇرگىزىلەتىن ادامدار توبى بار (جىلىنا 2 رەت). بۇل ساناتتا «زياندى وندىرىستە» جۇمىس ىستەيتىن ادامدار (بولات قۇيۋ، كەن ءوندىرۋ، رەزەڭكە، اسبەست، پوليپروپيلەن ءوندىرۋ زاۋىتتارى، سونداي-اق حيميالىق كاسىپورىندار)، بالالارمەن جۇمىس ىستەيتىن ادامدار (پەداگوگتەر، تاربيەشى)، پەرزەنتحانالاردىڭ، تۋبەر­كۋلەزگە قارسى ديسپانسەرلەردىڭ، ين­فەكتسيالىق بولىمشەلەردىڭ جانە پەري­نا­تالدىق ورتالىقتاردىڭ مەديتسينا قىز­مەت­كەر­لەرى جانە سوزىلمالى پاتولوگيالارى بار ەمدەلۋشىلەر (دەمىكپە، قانت ديابەتى، وكپەنىڭ سوزىلمالى وبسترۋكتيۆتى اۋرۋى جانە ت.ب.). دارىگەرلەردىڭ ايتۋىنشا، بارلىق رەنتگەنولوگيالىق زەرتتەۋلەردى 14 جاسقا دەيىنگى جاسوسپىرىمدەرگە وتۋگە بولمايدى. سونىمەن قاتار 15 جاسقا تولماعان تۇل­عا­لار جانە جۇكتى ايەلدەرگە دە تىيىم سا­لى­نادى. جالپى، فليۋوروگرافيا ايەل­دەردە بوسانعاننان كەيىنگى العاشقى كۇن­دە­رى تۋبەركۋلەزدى انىقتاۋ ماقساتىندا جۇر­گى­زىلە­دى. پروتسەدۋرادان كەيىن ءسۇت پورتسياسىن ءسۇزىپ تاستاپ، سودان كەيىن عانا بالانى ەمىزۋدى جال­عاس­تىرۋعا بولادى.

گۇلجان قوڭىرشينا اتاپ وتكەندەي، فليۋوروگرافيا ارنايى دايىندىقتى قاجەت ەتپەيدى جانە كەز كەلگەن ۋاقىتتا وتكىزىلەدى. زەرتتەۋدىڭ نەگىزگى قاعيدالارىنا توقتالار بولساق، زەرتتەۋ جۇرگىزەر الدىندا بىرنەشە ساعاتقا تەمەكى شەگۋدەن باس تارتۋ كەرەك – بۇل انىق جانە ايقىن كورىنىستى الۋعا مۇمكىندىك بەرەدى. ەمشارا باستالعانعا دەيىن دەنەنىڭ جوعارعى بولىگىن اشىپ، ەمشارا الدىندا بارلىق مەتالل زاتتاردى (شىنجىرلار، كۋلوندار، ت.ب.)، سونداي-اق بەت پەن دەنەدەن قۇرامىندا مەتالل بار كوسمەتيكانى الىپ تاستاۋ كەرەك. ايەلدەرگە بيۋستگالتەر شەشۋدى نەمەسە ىلگەكتى شولۋعا تۇسپەۋ ءۇشىن بەلگە ءتۇسىرۋدى تالاپ ەتەدى، سونداي-اق ۇزىن شاشتى سۋرەتكە كەدەرگى جاساماۋى ءۇشىن توبەگە جيناپ تاستاۋ ۇسىنىلادى. زەرتتەۋ تەك تىك جاعدايدا جۇرگىزىلەدى، سوندىقتان بۇل جاتقان ناۋقاسقا تاعايىندالمايدى. فليۋورو­گر­افيا كەزىندە رەنتگەنولوگتىڭ بارلىق ۇسى­نىس­تارىن ءدال ورىنداۋ كەرەك. سۋرەت بارىنشا تەرەڭ دەمالعاندا جاسالادى، بۇل كەزەڭدە وكپە جاقسى اشىلىپ، تولىق سۋرەتتى الۋعا مۇمكىندىك بەرەدى.

ارينە وكپە فليۋوروگرافياسى پاتولوگيا تۋرالى ناقتى اقپارات بەرمەيدى، بىراق وكپە تىندەرىندەگى وزگەرىستەردى، سۇيىقتىقتار مەن جاڭا وسكىن جاسۋشالارىنىڭ پايدا بولۋىن دەر كەزىندە دياگنوستيكالاۋعا مۇمكىندىك بەرەدى.

 

 

سوڭعى جاڭالىقتار

قىلمىستىق ءىس قوزعالدى

ايماقتار • كەشە

باستى اقپارات (21.02.2020)

ۆيدەو • 21 اقپان، 2020

ۇقساس جاڭالىقتار