كورمەگە ەكى مىڭ جىلدان استام تاريحى بار تاراز قالاسىندا جۇرگىزىلگەن ارحەولوگيالىق قازبا جۇمىستارى كەزىندە تابىلعان قۇندى جادىگەرلەر مەن كونە شاھار تاريحىنا بايلانىستى ستەندتەر جانە ءتۇرلى جادىگەرلەر قويىلدى. ونىڭ ىشىندە ءارتۇرلى كەزەڭدەگى مىس مونەتالارى, ياعني تۇرگەش, قاراحان تيىندارى, سونىمەن قاتار قولا بۇيىمدارىنا جاتاتىن شىراعداندار, جۇمىرتاستار, قۇمىرالار, تاعارا, جيناق ساندىقشالارى جانە سۋ قۇبىرلارى سياقتى جادىگەرلەر دە بار. «كورمە مۇعالىمدەر مەن وقۋشىلاردىڭ كوڭىلىنەن شىقتى. مۇندا كەلۋشىلەر ەجەلگى تارازدا قولونەردىڭ قانداي تۇرلەرىنىڭ دامىعاندىعىن كورىپ, ءتۇرلى جادىگەرلەرمەن تانىستى. سونىمەن قاتار, اتا-بابالارىمىز قالدىرعان تاريحي-مادەني مۇرانى قىزىعۋشىلىقپەن تاماشالادى. ال, كوركەم ۇيىرمەلەرگە قاتىسىپ, تاريحتانۋمەن شۇعىلدانىپ جۇرگەن بالالارعا اتالعان كورمە ۇلكەن شابىت بەرەدى دەگەن ويدامىز», دەيدى «ەجەلگى تاراز ەسكەرتكىشتەرى» تاريحي-مادەني قورىق-مۋزەيىنىڭ ديرەكتورى نۇرلان بىقىباەۆ.
جالپى, بۇل كورمە جەتكىنشەكتەردىڭ ۇلكەن قىزىعۋشىلىعىن تۋدىرعان جوبا بولدى دەۋگە بولادى. كورمە كەزىندە جاس دومبىراشىلار كۇي قويىلىمىن قويىپ ەل ىقىلاسىنا بولەنسە, تاريحي جادىگەرلەردى اينىتپاي قاعاز بەتىنە تۇسىرگەن جاس سۋرەتشىلەر كوپشىلىكتىڭ كوزايىمىنا اينالدى. ەكى كۇن بويى ۇيىمداستىرىلعان كورمەنى 1300-گە جۋىق وقۋشى تاماشالادى. سونىمەن قاتار, ۇلتتىق قۇندىلىقتاردى جاس ۇرپاققا ناسيحاتتاۋ ماقساتىندا جانە بالعىنداردى جادىگەرلەرمەن جەتە تانىستىرۋ ءۇشىن وقۋشىلارعا ارنايى سۇراقتار دا قويىلدى. جىل باسىندا باستاۋ العان « ۇلى دالا جاۋھارلارى» اتتى جىلجىمالى كورمە اۋليەاتا جەرىندە جىل سوڭىنا دەيىن جالعاسادى.
جامبىل وبلىسى
