رۋحانيات • 20 قاڭتار، 2020

«اباي ءار ءۇيدىڭ تورىندە» كىتاپ سىيلاۋ اكتسياسى باستالدى

141 رەتكورسەتىلدى

س.تورايعىروۆ اتىنداعى پاۆلودار وبلىستىق امبەباپ عىلىمي كىتاپحاناسى «اباي ءار ءۇيدىڭ تورىندە» كىتاپ سىيلاۋ اكتسياسىن باستادى.

اتالعان شارا قازاقتىڭ ۇلى ويشىلى، فيلوسوف، اقىن، اعارتۋشى اباي قۇنانباي ۇلىنىڭ تۋعانىنا 175 جىل تولۋىنا وراي اقىننىڭ مەرەيتويىن كەڭ كولەمدە اتاپ ءوتۋ ماقساتىندا ۇيىمداستىرىلۋدا. اكتسيا اياسىندا قوعامدىق ورىنداردا قالا تۇرعىندارى مەن قوناقتارى اراسىندا كەمەڭگەر تۇلعا تۋرالى ساۋالنامالار جۇرگىزىلۋدە. سونداي-اق شارا بارىسىندا اباي شىعارمالارى، سونىڭ ىشىندە ولەڭدەرى مەن قارا سوزدەرىن مانەرلەپ وقىعان، كومپوزيتوردىڭ اندەرىن ناقىشىنا كەلتىرە شىرقاعان قالا تۇرعىندارى مەن قوناقتارىنا ابايدىڭ كىتاپتارى سىيعا بەرىلدى.

اكتسيانىڭ العاشقى شاراسى پاۆلودار قالاسىنداعى «Batyr mall» ساۋدا جانە ويىن-ساۋىق ورتالىعىندا ءوتتى. ەڭ العاشقى بولىپ ساۋالناماعا جاۋاپ بەرۋشى – پاۆلودار مەملەكەتتىك پەداگوگيكالىق ۋنيۆەرسيتەتىنىڭ 2-كۋرس ستۋدەنتى ءدىلناز كارىموۆا اقىننىڭ «جاسىمدا عىلىم بار دەپ ەسكەرمەدىم» ولەڭىن مانەرلەپ وقىپ بەردى.  

- مەن اباي اتامىزدىڭ بىرنەشە ولەڭىن جاتقا بىلەمىن. قازاقتىڭ باسقا دا كلاسسيك قالامگەرلەرىن ءسۇيىپ وقيمىن. سونىڭ ىشىندە اباي اتامىزدىڭ ورنى بولەك. تاۋ تۇلعانىڭ شىعارمالارىن ءار قازاق ءبىلۋى ءتيىس. ول ۇلتىمىزدىڭ تەمىرقازىعى، - دەدى ءدىلناز كارىموۆا.

كىتاپحانا باسشىسىنىڭ ورىنباسارى بارشاگۇل بايجانوۆا ساۋدا ورتالىعىندا اينالاسى ءبىر ساعاتتىڭ ىشىندە 20 شاقتى كىتاپ سىيعا تارتىلعانىن ايتتى.

- بۇگىن اكتسيامىزدىڭ العاشقى كۇنى. ساۋدا ۇيىندە شاراعا قاتىسۋشىلاردىڭ سانى كوپ بولدى. كوبىسى اقىننىڭ ولەڭدەرىن وقۋدا. كەيبىر قاتىسۋشىلار ابايدىڭ اندەرىن ورىندادى. جالپى، جاۋاپ بەرگەندەردىڭ باسىم بولىگى جاستار. جاس بۋىننىڭ اباي شىعارماشىلىعىن بىلگەنى كوڭىل قۋانتادى. بۇل اكتسيانىڭ استارىندا ۇلكەن ءمان بار. ۇلى ويشىلدىڭ كىتابى ءار ءۇيدىڭ تورىندە تۇرۋى ءتيىس، - دەدى بارشاگۇل بالتاعۇلقىزى.

ايتا كەتەيىك، «اباي ءار ءۇيدىڭ تورىندە» اكتسياسى جىل سوڭىنا دەيىن جالعاسىن تاپپاق. اكتسيا قوعامدىق ورىنداردا ۇيىمداستىرىلاتىن بولادى. كىتاپحانا ۇجىمى اباي شىعارماشىلىعىن كوپشىلىك اراسىندا ناسيحاتتاۋ ماقساتىندا بىرقاتار تىڭ جوبالاردى ازىرلەۋدە. سونىڭ ءبىرى برايل قارپى بويىنشا كوزى كورمەيتىن جانە ناشار كورەتىن وقىرماندارعا ارنالعان اباي ولەڭدەرىنىڭ توپتاماسى. اتالعان جوبا بويىنشا بۇگىندە وبلىستىق كىتاپحانادا قىزۋ جۇمىس جۇرگىزىلۋدە. بۇدان دا باسقا ابايدىڭ 175 جىلدىعىنا ارنالعان قىزىقتى جوبالار كىتاپحانا وقىرماندارى مەن ەرتىس-بايان ءوڭىرىنىڭ تۇرعىندارىنا الداعى ۋاقىتتا ۇسىنىلاتىن بولادى.

سوڭعى جاڭالىقتار

ىستىق تاماق تاراتتى

قازاقستان • بۇگىن، 17:59

جاقسى اكىم جالعىز جۇرەدى

تانىم • بۇگىن، 17:02

بەتپەردە كيگەن كوكتەم

تانىم • بۇگىن، 16:55

ۇقساس جاڭالىقتار