«باتىس» وق-دا اسكەري جەكپە-جەكتەن اشىق چەمپيونات ءوتتى

ايماقتار • 20 قاڭتار، 2020

«باتىس» وق-دا اسكەري جەكپە-جەكتەن اشىق چەمپيونات ءوتتى

اتىراۋ قالاسىندا اقتوبە، اقتاۋ، اتىراۋ گارنيزوندارىنىڭ اسكەري قىزمەتشىلەرى مەن ۇلتتىق ۇلان، ۇلتتىق قاۋىپسىزدىك كوميتەتىنىڭ شەكارا قىزمەتى اسكەري قىزمەتشىلەرىنىڭ قاتىسۋىمەن «قازاق جاۋىنگەرى» جارىستارى ءوتتى. بۇل تۋرالى «باتىس» وق ءباسپاسوز قىزمەتى حابارلادى.

گۇلايىم ءداۋىتباي

جارىس اتىراۋ قالاسىنىڭ ورتالىق دەنە شىنىقتىرۋ جانە ساۋىقتىرۋ كەشەنىنىڭ بازاسىندا ءوتتى. چەمپيوناتقا اتىراۋ، اقتاۋ جانە اقتوبە گارنيزوندارىنان 10 كوماندا 100-گە جۋىق سپورتشى جاۋىنگەرلەر قاتىستى.

چەمپيونات 9 ءتۇرلى سالماق دارەجەسى بويىنشا وتكىزىلدى، ولار 55 كگ دەيىن، 60 كگ دەيىن، 65 كگ دەيىن، 70 كگ دەيىن، 75 كگ دەيىن، 80 كگ دەيىن، 85 كگ دەيىن، 90 كگ دەيىن، 95 كگ دەيىن جانە 95 كگ جوعارى سالماق دارەجەلەرى.

وڭىرلىك قولباسشىلىقتىڭ اسكەرلەرى قولباسشىسى پولكوۆنيك نۇرلان الدياروۆ «بۇگىنگى كۇنى اسكەري جەكپە-جەك قورعانىس ءمينيسترى گەنەرال-مايور نۇرلان بايۇزاق ۇلى ەرمەكباەۆتىڭ جەتەكشىلىگىمەن ۇلكەن جەتىستىكتەرگە جەتىپ، اسكەري جانە ازاماتتىق ورتادا زور قولداۋ كورۋدە. بۇل تەندەنتسيا جىلدان جىلعا اسكەري جەكپە-جەك سايىسىن قارۋلى كۇشتەردىڭ باستى سپورت تۇرىنە اينالدىرىپ، قارىشتاپ داميتىنىنا سەنەمىن. بۇگىنگى بوز كىلەمگە شىعۋعا بەل بۋعان، ەرجۇرەك جاۋىنگەرلەرگە كەزدەسۋلەردە بارىن سالىپ، تازا، ءارى ءادىل ۇرىس كورسەتۋدى تىلەيمىن» دەدى ءوز سوزىندە.

چەمپيوناتتىڭ قورتىندىسى بويىنشا جالپى ەسەپتەگى ءبىرىنشى ورىندى اقتوبە قالاسىنىڭ 30238 اسكەري ءبولىمى، ال ەكىنشى جانە ءۇشىنشى ورىنداردى اتىراۋ قالاسىنىڭ 41433 جانە 2016 اسكەري بولىمدەرى ەنشىلەدى. جەڭىمپازدار باعالى سىيلىقتارمەن قوسا گراموتا جانە مەدالدەرمەن ماراپاتتالدى. ەندىگى كەزەكتە، جەڭىمپازدار قۇرامىنان وڭىرلىك قولباسشىلىقتىڭ قۇراما كومانداسى جاساقتالىپ، ولار اقپان ايىندا الماتى قالاسىندا وتەتىن قارۋلى كۇشتەردىڭ چەمپيوناتىنا دايىندالاتىن بولادى.

اسكەري جەكپە-جەك ۇرىسى كلاسسيكالىق جەكپە-جەك ۇرىسىنان ءوزىنىڭ ەكيپيروۆكاسىمەن ەرەكشەلەنەدى. اسكەريلەر ۇستىنە جازدىق دالالىق كوستيۋم مەن قورعانىس ساۋىتىن كيىپ ۇرىسادى. ونىڭ تەحنيكالىق ارسەنالى قول، اياق، جانە تىزەمەن جاسالاتىن سوققىلاردان قۇرالعان. ادەتتە سپورتشىلار سامبو مەن ۇلتتىق كۇرەستىڭ لاقتىرۋ ادىستەرىن، كاراتەدەگى اياق جانە بوكستاعى قول سوققىلارىن، سونىمەن قوسا تۇنشىقتىرۋ جانە اۋىرتۋ ادىستەرىن قولدانۋ ارقىلى ۇرىستى جۇرگىزەدى.