قوعام • 20 قاڭتار، 2020

لاۋرا دەمەسىنوۆا: ەل يگىلىگىنە ارنالعان باستاما

87 رەتكورسەتىلدى

مەملەكەت باسشىسى قاسىم-جومارت توقاەۆتىڭ باستاماسىمەن پرەزيدەنتتىك جاستار كادر رەزەرۆى جوباسى ىسكە استى. پرەزيدەنتتىك جاستار كادر رەزەرۆىنە بارلىعى 13 مىڭنان استام ءوتىنىم بەرىلىپ، ۇلتتىق كوميسسيا وتىرىسىنىڭ قورىتىندىسى بويىنشا ىرىكتەلگەن 300 ۇمىتكەردىڭ ءتىزىمى جاريالاندى.

اسىعى الشىسىنان تۇسكەن 300-ءدىڭ اراسىندا بولۋ مەن ءۇشىن ماقتانىش دەپ بىلەمىن. ويتكەنى ىرىكتەلگەندەر تىزى­مىنە ەنۋ حالىق ءۇشىن قىزمەت ەتۋىمىزگە، مەم­لە­كەتىمىزدى ودان ءارى دامىتۋعا زور ۇلەس قوسۋعا مۇمكىندىك بەرەدى. ەل بولاشا­عى – جاستار دەسەك، كادرلىق رەزەرۆكە ەنۋ وسى جولدا ايانباي تەر توگۋگە ارتىلعان سەنىم.

مەملەكەت باسشىسى قاسىم-جومارت توقاەۆ پرەزيدەنتتىڭ كادرلىق رەزەرۆىمەن كەزدەسۋىندە اتالعان جوباعا ەرەكشە نازار اۋداردى. «بۇل – جاس بۋىن وكىلدەرىنىڭ جاۋاپتى قىزمەتكە كەلۋى ءۇشىن جاسالىپ وتىرعان يگى باستاما. وسى رەتتە وزدەرىڭىز سياقتى ءبىلىمدى ءارى تالاپتى ازاماتتارعا ۇلكەن ءۇمىت ارتامىز. سىزدەر جاڭا قازاقستاننىڭ دامۋىنا ايانباي ۇلەس قوساسىزدار دەپ سەنەمىن. ەلىمىزدىڭ الدىندا بيىك ماقساتتار تۇر. ەڭ الدىمەن مەملەكەتىمىزدى ودان ءارى وركەندەتىپ، تاۋەلسىزدىگىمىزدى نىعايتۋعا ءتيىسپىز. سونداي-اق ازاماتتاردىڭ ءال-اۋقاتىن ارتتىرىپ، تۇرمىس ساپاسىن جاقسارتۋىمىز كەرەك»، دەگەن ەدى قاسىم-جومارت توقاەۆ.

جالپى، كەيىنگى 3 اي بىزگە مارافون سەكىلدى بولاتىن. بىرنەشە سىناق پەن تەستتەن ءوتىپ، ەلىمىزدىڭ بارلىق ايماقتارىنان جاڭا دوستار تاپتىق. ولاردىڭ ءبارى – اقىلدى، تالانتتى جاس­تار. ماسەلەن، كادرلىق رەزەرۆكە ەنگەن جاستار جيىندا كوپتەگەن ماڭىزدى ماسەلەنى كوتەردى. مۇنىڭ ءبارى، ارينە، جاستارىمىزدىڭ ەل بولاشاعىنا بەيجاي قارامايتىنىن بايقاتادى.

وسى ورايدا، مىنا نارسەنى ەسكەرگەن ءجون. ىرىكتەۋ كەزەڭىنەن سۇرىنبەي ءوتىپ، ءوز قاتارىمىزدىڭ الدى بولۋىمىز ەل الدىنداعى جاۋاپكەرشىلىگىڭىزدى ارتتىرا ءتۇستى. بۇل – قازاقستاننىڭ قارقىندى دامىپ، ەلىمىزدىڭ ەرتەڭى جارقىن بولۋ جولىندا ۇلت ءۇشىن، ەل ءۇشىن، حالىق ءۇشىن ايانباي تەر توگۋ. مۇنى مەملەكەت باسشىسى قاسىم-جومارت توقاەۆ تا كادرلىق رەزەرۆ مۇشەلەرىمەن وتكەن كەزدەسۋدە اتاپ كورسەتتى.

تاريحقا كوز جۇگىرتسەك، ءبىلىمدى جانە بىلىكتى ازاماتتاردىڭ ورتاق مۇددەگە توپتاسقانىن بايقايمىز. ماسەلەن، الاشورداشىلار ەل ءۇشىن ەڭبەك ەتەتىن، ۇلتتى بيىككە جەتەلەيتىن، جاڭاشا دامۋعا باستايتىن شوعىر قالىپتاستىردى. وسى ورايدا، پرەزيدەنتىمىزدىڭ الاش ارداقتىسى ءاليحان بوكەيحاننىڭ: «ۇلتقا قىزمەت ەتۋ – بىلىمنەن ەمەس، مىنەزدەن» دەپ ايتقانىن تىلگە تيەك ەتۋى بەكەر ەمەس. سول كەزەڭدە حالىق ءۇشىن ايانباي ەڭبەك ەتكەندەردىڭ باسىم بولىگى «وردا بۇزار» جاستىڭ اينالاسىنداعى ازاماتتار ەكەنىن كورەمىز. ەندەشە، پرەزيدەنتتىڭ كادرلىق رەزەرۆىن ۇيىمداستىرىپ، جاستاردى جاۋاپتى قىزمەتكە تاعايىنداۋ جاڭا سەرپىن بەرەتىنى انىق.

مەملەكەت باسشىسى ق.توقاەۆتىڭ رەزەرۆكە ەنگەن جاستارمەن كەزدەسۋىندە «مەملەكەتتىك باسقارۋداعى كەز كەلگەن وزگەرىس مۇقيات زەردەلەنگەن، ۇزاق مەرزىمدى ستراتەگياعا ساي جۇرگىزىلۋى كەرەك. كادرلىق ساياسات مۇندا ماڭىز­دى رولگە يە. بۇل – ەڭ الدىمەن، مەملە­كەتتىڭ جاڭا كادرلىق ساياساتىنا قاتىستى ماسەلە. ونىڭ باستى مىندەتى – مەم­لەكەتتىك اپپاراتتى جەتىلدىرۋ جانە باسشىلاردىڭ جاڭا بۋىنىنا جول اشۋ. پرەزيدەنتتىك كادر رەزەرۆىنىڭ نەگىز­گى كوزدەگەن ماقساتى دا – وسى. بۇگىنگى جاستار – مەملەكەتتىك باسقارۋ جۇيەسى­نىڭ بولاشاعى. ارقايسىڭىزدان ەلدى دامى­تۋعا تىڭ سەرپىن بەرەتىن جاڭا يدەيا مەن ناتيجەلى جۇمىس كۇتەمىز» دەۋى دە كوپ نارسەنى اڭعارتادى.

قازىردىڭ وزىندە رەزەرۆكە وتكەندەردىڭ اراسىنان 55 ازامات جاڭا قىزمەتكە بەكىتىلدى. ولاردىڭ كەيبىرى ورتالىق مەملەكەتتىك ورگاندارداعى باسشىلىق لاۋازىمعا تاعايىندالدى. سونداي-اق بيىل رەزەرۆتەگى 100 ادامدى قىزمەتكە تاعايىنداۋ جوسپارلانعان.

الداعى ۋاقىتتا رەزەرۆكە ەنگەندەر مەملەكەتتىك ورگاندار مەن ۇلتتىق كوم­پا­نيالارعا جاۋاپتى قىزمەتكە جىبەرىلمەك. ەندەشە، كادرلىق رەزەرۆتىڭ الەۋەتىن تولىق پايدالانۋعا زور مۇمكىندىك بار.

 

لاۋرا دەمەسىنوۆا،

پرەزيدەنتتىك جاستار كادر رەزەرۆىنىڭ «Bolashaq» قاۋىمداستىعىنىڭ اتقارۋشى ديرەكتورى

 

سوڭعى جاڭالىقتار

كوروناۆيرۋسسىز قوستاناي

ايماقتار • كەشە

ۇقساس جاڭالىقتار