ۇكىمەت • 19 قاڭتار، 2020

اباي تۋرالى فيلم تۇسىرۋگە وتىنىشتەر قاڭتاردىڭ سوڭىنا دەيىن قابىلدانادى

105 رەتكورسەتىلدى

ۇلتتىق كينونى قولداۋ مەملەكەتتىك ورتالىعى «اباي» دەرەكتى ءفيلمىن، سونىمەن قاتار تولىق مەتراجدى كارتينا تۇسىرۋگە دايىندىق ۇستىندە. وسى شارانىڭ اياسىندا ورتالىق ارنايى كونكۋرس جاريالاپ وتىر. بۇل تۋرالى مادەنيەت جانە سپورت مينيسترلىگنىڭ ءباسپاسوز قىزمەتى حابارلادى.

«2020 جىلدىڭ قاڭتار ايىنىڭ سوڭىنا دەيىن بارلىق تۇسكەن وتىنىشتەر قارالىپ، ساراپتامالىق كەڭەستىڭ قورىتىندىسى بويىنشا ۆەدومستۆوارالىق كوميسسياعا قوسىمشا قاراۋ ءۇشىن جىبەرىلەدى. كوميسسيا مۇشەلەرى شەشىم شىعارادى» دەدى ۇكقمو ءوندىرىس بويىنشا باسقارما توراعاسىنىڭ ورىنباسارى ولجاباي مۇسابەكوۆ.

ونىڭ ايتۋىنشا، فيلم كوميسسيا مۇشەلەرىنىڭ ۇسىنىستارىنا سايكەس تاڭدالىپ، تۇسىرىلەدى.

«بۇگىنگى تاڭدا كونكۋرسقا قاتىسۋعا التى ءوتىنىم كەلىپ ءتۇستى، ونىڭ ىشىندە فيلم-وپەرا، ەكى تاريحي مەلودراما، 30 سەريادان تۇراتىن دەرەكتى فيلم، 15 سەريالى قىسقامەترلى فيلم جانە تاعى ءبىر تولىقمەتراجدى فيلم بار. قوسىمشا وتىنىمدەردى كۇتەمىز. مەنىڭ ويىمشا، قاڭتاردىڭ سوڭىنا دەيىن بۇدان دا كوپ ۇسىنىستار بولادى» دەيدى ول.

ايتا كەتەيىك، بيىل ەلىمىز اقىن، فيلوسوف، اعارتۋشى جانە ويشىل – ۇلى ابايدىڭ 175 جىلدىعىن اتاپ وتۋگە دايىندالىپ جاتىر. مەرەيتوي قارساڭىندا قازاقستاندا جانە شەتەلدەردە 500-گە جۋىق مەرەكەلىك ءىس-شارا ۇيىمداستىرىلاتىن بولادى.

سوڭعى جاڭالىقتار

ەسىك نەگە «تەسىك»؟

قوعام • كەشە

ۇقساس جاڭالىقتار