رۋحانيات • 19 قاڭتار، 2020

«استانا وپەرا» تەاترىندا ا.قۇنانباي ۇلىنىڭ 175 جىلدىعىنىڭ سالتاناتتى اشىلۋ ءراسىمى وتەدى

160 رەتكورسەتىلدى

21 قاڭتاردا (ساعات 15.00-دە) نۇر-سۇلتان قالاسى «استانا وپەرا» مەملەكەتتىك وپەرا جانە بالەت تەاترىندا قازاق حالقىنىڭ ۇلى اقىنى، ويشىل-كەمەڭگەرى اباي قۇنانباي ۇلىنىڭ 175 جىلدىعىنىڭ سالتاناتتى اشىلۋ ءراسىمى جانە قازاقستان ونەر شەبەرلەرىنىڭ كونتسەرتى وتەدى. بۇل تۋرالى مادەنيەت جانە سپورت مينيسترلىگىنىڭ ءباسپاسوز قىزمەتى حابارلادى.

اباي قۇنانباي ۇلى – ۇلى اقىن جانە كومپوزيتور، ويشىل، اعارتۋشى جانە قوعام قايراتكەرى. ابايدىڭ الەمدىك تانىلۋىنىڭ ەداۋىر كورىنىسى تەك ادەبي ىزدەنىستەرىنىڭ ارقاسىندا عانا ەمەس. ول ادەبيەتتىڭ شەگىندە عانا ەڭبەك ەتكەن جوق. اقىن ءۇشىن ادەبيەت جالپى ادام رۋحىنىڭ شەكسىز الەمىنە دەگەن وزىندىك التىن قاقپا. 

«بيىل اباي قۇنانباي ۇلىنىڭ تۋعانىنا 175 جىل تولادى. حالقىمىزدىڭ ۇلى پەرزەنتىنىڭ مەرەيتويىن لايىقتى اتاپ ءوتۋ ءۇشىن ارنايى قۇرىلعان كوميسسيا دايىندىق جۇمىستارىن باستاپ كەتتى. مەملەكەت كولەمىندە جانە حالىقارالىق دەڭگەيدە اۋقىمدى ءىس-شارالار ۇيىمداستىرۋ جوسپارلانىپ وتىر. بىراق مۇنىڭ ءبارى توي تويلاۋ ءۇشىن ەمەس، وي-ءورىسىمىزدى كەڭەيتىپ، رۋحاني تۇرعىدان دامۋىمىز ءۇشىن وتكىزىلمەك» دەپ جازدى قازاقستان رەسپۋبليكاسىنىڭ پرەزيدەنتى ق.ك. توقاەۆ ءوزىنىڭ «اباي جانە ءححى عاسىرداعى قازاقستان» اتتى ماقالاسىندا.

2020 جىلدىڭ 21 قاڭتارىندا اباي قۇنانباي ۇلىنىڭ 175 جىلدىعىن مەرەكەلەۋدىڭ باستالۋى رەسمي جاريالانادى جانە قازاقستان رەسپۋبليكاسى مادەنيەت جانە سپورت مينيسترلىگى وسىعان وراي قازاقستاننىڭ ونەر شەبەرلەرىنىڭ كونتسەرتىن ۇيىمداستىرادى.

«استانا وپەرا» تەاترىنىڭ ساحناسىندا ۇلى ابايدىڭ ولەڭدەرى مەن اندەرى كسرو جانە قازاقستاننىڭ حالىق ءارتىسى، قازاقستاننىڭ ەڭبەك ەرى اسانالى ءاشىموۆ، قازاقستاننىڭ حالىق ارتىسى، قازاقستاننىڭ ەڭبەك ەرى روزا رىمباەۆا، كسرو جانە قازاقستاننىڭ حالىق ارتىسى الىبەك دىنىشەۆ، قازاقستاننىڭ ەڭبەك سىڭىرگەن ارتىسى، مەملەكەتتىك سىيلىقتىڭ يەگەرى مايرا مۇحامەدقىزى، قازاقستاننىڭ ەڭبەك سىڭىرگەن قايراتكەرى تامارا اسار، حالىقارالىق جانە رەسپۋبليكالىق كونكۋرستاردىڭ لاۋرەاتتارى مەن ەلىمىزدىڭ جاس دارىندارىنىڭ ورىنداۋىندا، «استانا وپەرا» مەملەكەتتىك وپەرا جانە بالەت تەاترىنىڭ سيمفونيالىق وركەسترىنىڭ سۇيەمەلدەۋىمەن شىرقالاتىن بولادى.

سوڭعى جاڭالىقتار

ەسىك نەگە «تەسىك»؟

قوعام • كەشە

ۇقساس جاڭالىقتار