ايماقتار • 17 قاڭتار، 2020

باتىس قازاقستاندا جاڭا جوبالار ماقۇلداندى

14 رەتكورسەتىلدى

ورال قالاسىندا ءوڭىر باسشىسى عالي ەسقاليەۆتىڭ توراعالىق ەتۋىمەن ينۆەستيتسيا تارتۋ، ينۆەستيتسيالىق كليماتتى جاقسارتۋ جانە ەكسپورتتى دامىتۋ بويىنشا وڭىرلىك كەڭەستىڭ كەزەكتى وتىرىسى ءوتتى. كەڭەستە ينۆەستورلار تاراپىنان بالىق شارۋاشىلىعى كەشەنى، گولف الاڭى، جەكە مەكتەپ، سپورت كەشەنى، ساۋدا ءۇيى سياقتى جاڭا جوبالار ۇسىنىلىپ، قولداۋ تاپتى.

سوڭعى ەكى جىلدا وڭىردە 468 ملرد تەڭگەنىڭ 15 ينۆەستيتسيالىق جوباسى ماقۇلدانعان ەكەن. قازىر ولار ءوز كەزەگىمەن جۇزەگە اسىپ جاتىر. «AQJAIYQ» اكك» ۇك» اق باسقارما توراعاسىنىڭ ورىنباسارى تولەگەن مىرزابەكوۆتىڭ ايتۋىنشا، وڭىرلىك كەڭەستىڭ سوڭعى جيىنىندا تالقىلانعان ءۇش جوبا دا جوسپارعا سايكەس كەلە جاتىر.

- بۇگىن تالقىلاۋعا ۇسىنىلىپ وتىرعان 4 جوبا – ءبىزدىڭ ءوڭىر، ءتىپتى قازاقستاننىڭ باتىس ايماعى ءۇشىن مۇلدەم جاڭا، تىڭ باستامالار. جوبالاردىڭ جالپى قۇنى – 26 ملرد تەڭگەنى قۇرايدى. بۇل باستامالار تولىق قۋاتىنا ەنگەن كەزدە 370 جاڭا جۇمىس ورنى اشىلادى دەپ كۇتىپ وتىرمىز. ءبىز ءۇشىن ءار ينۆەستور ماڭىزدى. وڭىردە تۋريزم، سپورت، ءبىلىم سالاسى دامۋى ءۇشىن بارلىق قولداۋ كورسەتەتىن بولامىز. ينۆەستورلارعا تابىس تىلەيمىز، - دەدى كەڭەستى جۇرگىزگەن باتىس قازاقستان وبلىسىنىڭ اكىمى عالي ەسقاليەۆ.

كەڭەس تالقىلىسىنا ۇسىنىلعان العاشقى جوبا - «Aquazor» جشس ۇسىنعان جابىق سۋ قويماسىندا تەڭىز بالىقتارىن ءوسىرۋ ءىسى. بۇل جوبا العاش رەت 2019 جىلى قىركۇيەك ايىندا وتكەن «KazInWest» بيزنەس فورۋمىندا تانىستىرىلعان بولاتىن. ودان بەرى وتكەن ۋاقىت ىشىندە ينۆەستورلار بايتەرەك اۋدانىنان بالىق شارۋاشىلىعى ءۇشىن قاجەتتى جەر تەلىمىن تاڭداپ ۇلگەرگەن. ارينە، باتىس قازاقستان وبلىسىندا بۇعان دەيىن بەكىرە تۇقىمداس بالىق وسىرۋگە باعىتتالعان جوبا بار بولاتىن. بىراق تەڭىز جاندىكتەرى - باررامۋندي الابۇعاسى مەن كلاري جايىنى اق جايىق وڭىرىندە تۇڭعىش رەت وسىرىلگەلى وتىر. شەتەلدىك ينۆەستورلار ءوڭىردىڭ كولىك لوگيستيكاسىن، ياعني دايىن ءونىمدى قازاقستان مەن رەسەي فەدەراتسياسىنا تاراتۋ مۇمكىندىگىن دە جوعارى باعالاعان. 31 ملن ەۆرو جۇمسالاتىن جوبا-كەشەندە جىلىنا 3 مىڭ توننا ءونىم شىعارىلماق. الماتى قالاسىنان سكايپ ارقىلى تىكەلەي بايلانىسقا شىققان كومپانيا اكتسيونەرى الەكساندر ترەبۋحيننىڭ ايتۋىنشا، بۇل جوبا قالدىقسىز تەحنولوگيا بويىنشا جۇمىس ىستەمەك. كەشەن قالبىرداعى ونىمدەر، ىستىق جانە سۋىق كۇيدە قاقتالعان بالىق جانە بالىق ونىمدەرى، جارتىلاي دايىن تاعامدار، بالىق ۇنى ت.ب. ءونىم شىعارادى. كەشەننىڭ قۇرىلىسىنا 120 ادام تارتىلسا، قولدانىسقا بەرىلگەننەن كەيىن جاڭادان 70جۇمىس ورنى اشىلادى دەپ كۇتىلۋدە. ءونىم قۋاتتىلىعى 1500 توننانى قۇرايتىن ءبىرىنشى كەزەڭنىڭ ىسكە قوسىلۋى 2021 جىلدىڭ ءتورتىنشى توقسانىنا، ال ەكىنشى كەزەڭىن باستاۋ 2023 جىلدىڭ ءبىرىنشى توقسانىنا جوسپارلانعان. مەملەكەت، ياعني باتىس قازاقستان اكىمدىگى ءوز تاراپىنان جوباعا قولداۋ كورسەتىپ، بايتەرەك اۋدانى اۋماعىنان جەر تەلىمىن بەرەدى.

بۇدان كەيىن «Golf&Resort «AQJAIYQ» جشس ديرەكتورى باتىربەك سەيىتبەكوۆ ءسوز الىپ، بايتەرەك اۋدانى اۋماعىندا گولف الاڭىن سالۋ جوباسىمەن تانىستىردى. بۇل جوباعا 30 ملن. اقش دوللارى كولەمىندە شەتەلدىك ينۆەستيتسيا قۇيىلماق. جالپى اۋماعى 80 گەكتاردى قامتيتىن اۋماققا 18 شۇڭقىرلى گولف الاڭى، گولف-اكادەميا، كلۋب ءۇيى، قوناقۇي مەن مەيرامحانا، باسقا دا سپورتتىق الاڭدار سالىنادى دەپ جوبالانعان. نىساننىڭ قۇرىلىسىنا 50 ادام جۇمىلسا، جوبا ىسكە قوسىلعاننان كەيىن دە 50 ادامعا جۇمىس بەرىلمەك. جوبانىڭ ءبىرىنشى كەزەڭى 2021 جىلدىڭ ەكىنشى توقسانىندا ىسكە قوسىلادى دەپ كۇتىلۋدە. بۇل جوباعا دا مەملەكەت تاراپىنان قولداۋ رەتىندە جەر تەلىمى بولىنەدى.

- ءبىزدىڭ وڭىردە تابىسى مول شەتەلدىك مۇناي-گاز كومپانيالارى بار، رەسەيدىڭ ءىرى قالالارى دا الىس ەمەس. وبلىستىڭ ترانزيتتىك الەۋەتى جوعارى. سوڭعى جىلدارى تۋريزم سالاسى ەرەكشە دامىپ كەلەدى. اۋەجايدا جاڭا تەرمينالدىڭ قۇرىلىسى اياقتالىپ، زاماناۋي قوناقۇيلەر پايدالانۋعا بەرىلگەن سوڭ شەتەلدىك تۋريستەر تاسقىنى دا كوبەيۋى ءتيىس. سوندىقتان گولف الاڭى دا سۇرانىسقا يە بولادى دەگەن ويدامىن، - دەدى وبلىس باسشىسى عالي ەسقاليەۆ.

«ح. قاپانوۆ اتىنداعى ورال حالىقارالىق گيمنازياسى» جشس-نىڭ ديرەكتور-قۇرىلتايشىسى حايدار قاپانوۆ ورال قالاسىنان جەكە مەكتەپ عيماراتىن سالۋدى ۇسىنىپ وتىر. جوبانىڭ ينۆەستيتسيا كولەمى شامامەن 500 ملن. تەڭگەنى قۇرايدى. بۇل وڭىردەگى ەڭ ۇلكەن جەكە مەكتەپ بولماق. جاڭا مەكتەپتە 550 وقۋشى، ال ەكى اۋىسىمدا جۇمىس جاساسا، 1100 وقۋشى ءبىلىم الادى.

- بۇل جاڭادان، تاقىر جەردەن باستالىپ وتىرعان بيزنەس ەمەس. بۇل سالادا كوپجىلدىق تاجىريبەمىز بار. قازىر بالاباقشامىز، باستاۋىش مەكتەبىمىز جۇمىس ىستەپ تۇر. ءوزىمىزدىڭ بىلىكتى ماماندارىمىز بار. جاڭا جوبا «اتامەكەن» وداعىندا دا تالقىلاندى، قولداۋعا يە بولدى. بۇگىنگى كەڭەستىڭ ماقۇلداۋى وزگە ينۆەستورلارعا دا جاقسى بەلگى بولدىدەپ ويلايمىن، - دەيدى حايدار قاپانوۆ.

ايتا كەتەيىك، «ح. قاپانوۆ اتىنداعى ورال حالىقارالىق گيمنازياسى» جشس-نىڭ مەنشىگىندە جالپى اۋماعى 5 مىڭ ش.م. قۇرايتىن بالاباقشا جۇمىس ىستەپ تۇر. ال بيىل قۇرىلىسىن باستاعالى وتىرعان مەكتەپ عيماراتىن 2021 جىلدىڭ ءبىرىنشى توقسانىندا ىسكە قوسۋ جوسپارلانعان. قۇرىلىس بارىسىندا 50، ال مەكتەپ ىسكە كىرىسكەننەن كەيىن 85 جاڭا جۇمىس ورنى اشىلادى دەپ كۇتىلۋدە. حايدار قاپانوۆ جوسپارلارى ءساتتى جۇزەگە اسسا، بەس جىل ىشىندە وڭىردە وسىنداي 15 مەكتەپ اشۋدى كوزدەپ وتىر.

«مەملەكەت تاراپىنان ينۆەستيتسيانى 8 جىل بويىنا قايتارۋ، سونداي-اق بارلىق جۇمىس ىستەۋ كەزەڭىندە وپەراتسيالىق شىعىنداردى وتەۋ تۇرىندە قولداۋ كورسەتىلەدى. قازىرگى تاڭدا ينۆەستور مەن قر ءبىلىم جانە عىلىم مينيسترلىگىنىڭ «قارجى ورتالىعى» اق اراسىندا مەملەكەتتىك قولداۋ تۋرالى كەلىسىمگە قول قويىلدى. اتاپ وتەرلىگى، ورتا ءبىلىم بەرۋ قىزمەتىنىڭ بەلگىلەنگەن كولەمى حالىق ءۇشىن تەگىن كورسەتىلەدى»، – دەپ اتاپ ءوتتى ءوڭىر باسشىسى.

باتىس قازاقستان وبلىسىنا ينۆەستيتسيا تارتۋ، ينۆەستيتسيالىق كليماتتى جاقسارتۋ جانە ەكسپورتتى دامىتۋ بويىنشا وتكەن وڭىرلىك كەڭەستە 600 ورىندىق «بايتەرەك» سپورتتىق كەشەنى، «№1 ساۋدا ءۇيى» جوبالارى دا تالقىعا سالىندى. جوبا اۆتورلارى «BIMS» جشس-نىڭ اتقارۋشى ديرەكتورى ماحامبەت سۇلتانعاليەۆ پەن «اشىق جول» جشس-نىڭ قۇرىلتايشىسى ۆەنيامين مۇقاتاەۆ ءار جوبانىڭ ءجون-جوسىعىن ءتۇسىندىرىپ، تۇرعىندارعا قىزمەت كورسەتۋ جاقساراتىنىن ايتتى.

ءوڭىر باسشىسى بۇل جوبالارعا مەملەكەت تاراپىنان «بيزنەستىڭ جول كارتاسى – 2025» باعدارلاماسى اياسىندا سىياقىنىڭ پايىزدىق مولشەرلەمەسىن سۋبسيديالاۋ بويىنشا قولداۋ كورسەتىلەتىندىگىن ايتتى.

 

باتىس قازاقستان

سوڭعى جاڭالىقتار

بەتپەردە كيگەن كوكتەم - 7

قوعام • بۇگىن، 16:07

Samsung تاعى نە پاتەنتتەدى؟

تەحنولوگيا • بۇگىن، 15:23

تاسقىنعا – توسقىن

ايماقتار • بۇگىن، 13:25

قايىقشى اتانىڭ حيكاياسى

رۋحانيات • بۇگىن، 12:39

تويدىڭ سوڭى توپىرلاعان اۋرۋ

ايماقتار • بۇگىن، 10:22

ۇقساس جاڭالىقتار