ايماق باسشىسى مەن ينۆەستورلار كەزدەسۋىندە وبلىستا جاڭارتىلاتىن ەنەرگيا كوزدەرىن پايدالاناتىن ەلەكتر ستانتسيالارى جوبالارىن جۇزەگە اسىرۋ جونىندە مەموراندۋمعا قول قويىلدى.
200 مۆت كۇن ەلەكتر ستانتسياسى قۇرىلىسىنىڭ قۇنى 100 ملن اقش دوللارى. جوبانى جۇزەگە اسىرۋ ءۇشىن قىزىلوردا قالاسىنىڭ سول جاعالاۋىنان 400 گەكتار جەر تاڭدالعان. جوبا 2020 جىلدىڭ اقپان ايىندا باستالماق. وسىدان كەيىن ەكىنشى كەزەڭ اياسىندا جىل سوڭىنا قاراي ەلەكتر ستانتسياسىنىڭ قۇرىلىسى باستالىپ, ول ءبىر جىلدان كەيىن قولدانىسقا بەرىلەدى دەپ جوسپارلانىپ وتىر.
ايماق باسشىسى مەملەكەتىمىزدە, ونىڭ ىشىندە سىر وڭىرىندە دە شەتەلدىك ينۆەستورلارعا قولايلى جاعدايلار جاسالعانىن جانە ەكى مەملەكەت اراسىندا بۇنداي جوبالاردى جۇزەگە اسىرۋ ءتيىمدى ەكەنىن اتاپ ءوتتى.
- الەمدە قالىپتاسقان كۇردەلى ەكونوميكالىق جاعدايعا بايلانىستى وڭىرلىك ساۋدا-ەكونوميكالىق ىنتىماقتاستىقتى كەڭەيتۋدىڭ ماڭىزى زور. ەكى جاقتى جۇمىس ناتيجەسىندە سوڭعى 5 جىلدا قازاقستاننىڭ پورتۋگاليامەن ءوزارا ساۋداسى 2,3 ملرد اقش دوللارىنا جەتتى. ونىڭ ىشىندە يمپورت كولەمى – 81,2 ملن اقش دوللارى. قازاقستاندىق ەكسپورتتالۋشى ونىمدەر قاتارىندا: مۇناي, ماقتا, قارا مەتالل بار. ال, پورتۋگاليادان قازاقستانعا ەلەكتر ماشينالارى, سۋ كولىگى, فارماتسەۆتيكالىق ونىمدەر كەلەدى. بۇل رەتتە قىزىلوردا وبلىسىن ينۆەستيتسيا تارتۋ سەكتورى رەتىندە تاڭداعاندارىڭىزعا قۋانىشتىمىز. ايماقتا تابيعي رەسۋرستار سانى جەتەرلىك. وبلىستىڭ جەر قويناۋىندا مەندەلەەۆتىڭ كەستەسىندەگى بارلىق ەلەمەنتتەر بار, - دەدى وبلىس اكىمى.
وڭىردە جاڭارتىلاتىن ەلەكتر ەنەرگياسىنىڭ كوزدەرىن دامىتۋ قولعا الىنعان. قازىرگى تاڭدا ۇلىبريتانيالىق, فرانتسيالىق جانە بولگاريالىق ينۆەستورلاردىڭ قاتىسۋىمەن وبلىستا وسى باعىتتا 3 جوبا ىسكە اسىرىلۋدا.
