مىسالعا, جاڭا جىل الماتى وبلىسى, ىلە اۋدانى بورالداي اۋىلدىق وكرۋگىنىڭ اۋماعىندا بوي كوتەرگەن جايناق اۋىلىنىڭ تۇرعىندارى ءۇشىن جاپپاي سوتقا شاقىرتۋ الۋمەن باستالدى. اۋىل تۇرعىندارىنىڭ اتىنان بۇقارالىق اقپارات قۇرالدارى وكىلدەرىنە حابارلاسقان زاڭگەر نۇرلان بايعازيەۆتىڭ ايتۋىنشا, الماتى وبلىسىنىڭ جەر قاتىناستارى باسقارماسى ەلدى مەكەن اۋماعىنداعى 203 جەر تەلىمىنىڭ يەسىن سوتقا بەرىپ, قۇجاتتارعا بەرىلگەن جەكەمەنشىك قۇقىعىن زاڭسىز دەپ تانۋدى تالاپ ەتىپ وتىر ەكەن. تۇرعىندار رەسمي مەكەمەنىڭ بۇل تالابىن تۇسىنبەي, نارازىلىق بىلدىرۋدە. ويتكەنى تۇرعىنداردىڭ قولىندا جەرگە زاڭدى يەلىك ەتۋگە بەرىلگەن مەملەكەتتىك اكتى بار, ەلدى مەكەن اۋماعىندا تۇرعىن ءۇي سالۋعا رۇقسات بەرىلگەنى جايىندا دا قۇجاتتارى تۇگەل. جانە باسپاناعا مۇقتاج ادامدار جەر تەلىمدەرىن بورالداي اۋىلدىق وكرۋگى اكىمىنىڭ شەشىمىمەن جەكەمەنشىككە اينالدىرعان تۇلعالاردان ساتىپ العان. اۋەلگىدە اۋماقتاعى تەلىمدەر ءۇشىن تۇرعىندار 1 ملن تەڭگەدەن 2 ملن 500 مىڭ تەڭگەگە دەيىن قولما-قول اقشانى ساناپ بەرگەن.
ماسەلەگە وراي وبلىستىق باسقارمانىڭ دا ءوز ءۋاجى بار ەكەن. ماماندار اۋماقتىڭ باس جوسپارىنىڭ وزگەرۋىنە بايلانىستى, ەلدى مەكەن ورنالاسقان جەر مەملەكەت قاجەتى ءۇشىن قايتارىلۋى كەرەك دەپ وتىر. تۇرعىندار مەن اتقارۋشى بيلىك اراسىنداعى تەكەتىرەسكە اينالعان داۋلى ىسكە قاتىستى ءادىل شەشىمدى ەندى سوت ايتۋى ءتيىس.
جالپى, الماتى وبلىسىنىڭ اۋماعىندا زاڭسىز تۇرعىن ءۇي قۇرىلىسى ازايماي وتىر. بۇل ءۇردىس جىل سايىن سوتقا جۇگىنگەن جەكە ادامداردىڭ قاتارىن كوبەيتە تۇسۋدە. ءمالىم بولعان دەرەكتەرگە جۇگىنسەك, 2018 جىلى الماتى وبلىسىنىڭ مامانداندىرىلعان اۋدانارالىق ەكونوميكالىق سوتى رۇقساتسىز سالىنعان تۇرعىن ءۇي قۇرىلىسىن زاڭداستىرۋعا قاتىستى جالپى سانى 47 ءىس قاراپ, 11 ءىس بويىنشا وڭ شەشىم شىعارىپتى. قالعان 35 وتىنىشكە وراي زاڭ تالاپتارىنىڭ ورىندالماعانى انىقتالىپ, ءىس كەرى قايتارىلعان. وندىرىسكە جىبەرىلگەن 1 ءىس توقتالىپ, زاڭسىزدىقتىڭ جولى كەسىلگەن. ال وتكەن 2019 جىلدىڭ 11 ايى ارالىعىندا سوت تورەشىلەرىنە رۇقساتسىز سالىنعان تۇرعىن ءۇي قۇرىلىسىن زاڭداستىرۋعا قاتىستى 33 ءوتىنىش تۇسكەن. زەردەلەۋدەن وتكەننەن كەيىن 3 ءوتىنىش قاناعاتتاندىرىلىپ, 30 ءىس بويىنشا تىركەلگەن قۇرىلىستى زاڭداستىرۋ بولمايدى دەگەن شەشىم شىعارىلىپتى.
ايتپاقشى, الماتى اۋەجايىنىڭ ماڭىڭدا بولعان ۇشاق اپاتىنان كەيىن مەملەكەت باسشىسى قاسىم-جومارت توقاەۆ اۋماقتا سالىنعان قۇرىلىستاردىڭ زاڭدىلىعىن تەكسەرۋگە تاپسىرما بەرگەن بولاتىن. قازىر سىبايلاس جەمقورلىققا قارسى ءىس-قيمىل اگەنتتىگى الماتى وبلىسىنىڭ تالعار اۋدانىنا قاراستى گۇلدالا اۋىلىنداعى جەر تەلىمدەرىنە قاتىستى تەكسەرۋ جۇرگىزۋدە. جاقىندا تەرگەۋ جۇمىسىنىڭ العاشقى ناتيجەلەرىن حابارلاعان پرەمەر-ءمينيستردىڭ ورىنباسارى رومان سكليار تالعار اۋداندىق اكىمدىگىنىڭ قىزمەتكەرلەرى ءوز قۇزىرەتىن اسىرا پايدالانىپ, حالىقارالىق اۋەجاي ماڭىنا ءۇي سالۋ ءۇشىن جەر تەلىمدەرىن جەكەشەلەندىرۋگە رۇقسات بەرگەنىن ايتقان ەدى.
– 2015-2019 جىلدارى الماتى وبلىسى, تالعار اۋدانى اكىمدىگىنىڭ لاۋازىمدى تۇلعالارى قىزمەتتەرىن اسىرا پايدالانىپ, اۋەجايعا جاقىن اۋماقتان جەكە شارۋاشىلىق جۇرگىزۋگە, تۇرعىن ءۇي قۇرىلىسىن سالۋعا جەر بەرگەنى انىقتالدى. ەرەجە بويىنشا سانيتارلىق قورعانىس ايماعىنا جاقىن ماڭعا قانداي دا ءبىر قۇرىلىس نىسانىن تۇرعىزۋعا نەمەسە باۋ-باقشا ءوسىرىپ, جەكە ساياجاي سالۋعا رۇحسات جوق, – دەدى پرەمەر-ءمينيستردىڭ ورىنباسارى رومان سكليار.
الماتى وبلىسى
