ورتالىق بۇعان دەيىن قالالىق جۇمىسپەن قامتۋ جانە الەۋمەتتىك باعدارلامالار جانە ازاماتتىق حال اكتىلەرىن تىركەۋ بولىمىمەن ءبىر عيماراتتا جۇمىس ىستەپ كەلگەن ەدى. جاڭا فورماتتاعى اتاۋلى الەۋمەتتىك كومەككە (ااك) قۇجات قابىلداۋعا وراي بۇل مەكەمەلەر ارقىلى قىزمەت الۋشىلاردىڭ سانى بىرنەشە ەسەگە ۇلعايىپ, عيماراتتىڭ تارلىعى سەزىلە باستاعان بولاتىن.
وسىعان بايلانىستى كوپ بالالى انالاردىڭ سۇرانىسىن قاناعاتتاندىرۋ, كەلۋشىلەرگە جايلى جاعداي جاساۋ ماقساتىندا قالا اكىمى نۇرلىبەك نالىباەۆتىڭ تاپسىرماسىمەن جۇمىسپەن قامتۋ ورتالىعى جالپى اۋماعى 750 شارشى مەتر بولاتىن عيماراتقا كوشىرىلدى.
«باقىتتى وتباسى» اتاۋىمەن «OPEN SPACE» فورماتىندا ءوز جۇمىسىن باستاعان بۇل ورتالىقتا قىزمەت الۋشىلارعا بارلىق جاعدايلار جاسالعان, 150 ادامعا ارنالعان كۇتۋ زالى, بالالارعا ارنالعان ويىن بۇرىشى بار.
ورتالىقتا جۇمىسسىز ازاماتتاردى جۇمىسپەن قامتۋ, از قامتىلعان وتباسىلارعا كاسىپكەرلىك باستامالار مەن كاسىپتىك باعدار بەرۋ, مەملەكەتتىك باعدارلامالار اياسىندا گرانتتىق قارجىلار قاراستىرۋ, قايتا دايارلاۋ كۋرستارىن ۇيىمداستىرۋ جۇمىستارى جۇزەگە اسىرىلادى. الداعى ۋاقىتتا ورتالىقتان زاڭگەر مەن پسيحولوگ مامان كەڭەس بەرەتىن ورىن, انالار بولمەسىن اشۋ جوسپارلانۋدا.
جالپى جىل باسىنان قالالىق «جۇمىسپەن قامتۋ ورتالىعى» جاڭا فورماتتاعى اتاۋلى الەۋمەتتىك كومەككە 700-دەن استام ءوتىنىم قابىلداسا, «جاستار تاجىريبەسى» ارقىلى 125 جاسقا, الەۋمەتتىك جۇمىسپەن قامتۋ ارقىلى 80 ادامعا, 450 ازاماتقا قوعامدىق جۇمىسقا جانە 250-دەن استام قالا تۇرعىنىنا تۇراقتى جۇمىس ورىندارىنا جولداما بەرگەن.
