وسىدان 4 جىل بۇرىن قۇرىلىپ, ەشكىمنىڭ نۇسقاۋىنسىز الەۋمەتتىك جوبالاردى جۇزەگە اسىرا باستاعان ولار بىلتىرعى جاستار جىلىندا رەسمي تۇردە تىركەۋدەن ءوتتى. اۋدان باسشىلىعى جاستاردىڭ جۇمىس جوسپارىمەن تانىسىپ, ولاردىڭ الەۋمەتتىك دۇكەن اشۋىنا سەپتىگىن تيگىزدى. كەنتتەگى «ورداكەنت» رەسۋرستىق ورتالىعىنان ارنايى بولمە بەردى.
ەرىكتىلەر وتكەن جىلى ءوز قاتارلارىن «تازالىق تابالدىرىقتان باستالادى» اتتى 2 كۇندىك اكتسياعا جۇمىلدىردى. ناۋرىز مەرەكەسىنە وراي قايىرىمدىلىق شاراسىن وتكىزىپ, تالاي جاننىڭ جانىنا شۋاق سەبەتىن يگىلىكتى ءىس ۇيىمداستىردى. تانىمال ايتىسكەر اقىن اقمارال لەۋباەۆا باستاماشى بولعان «اناعا حات», «اكەگە حات» جوبالارىن جاڭاقورعاندا جالعاستىردى. بار ۋاقىتىن ۇيالى تەلەفونعا تەلمىرۋمەن وتكىزەتىن جاستارعا اتا-اناسىنا حات جازدىرىپ, ۇزدىك شىققاندار اۋداندىق مادەنيەت ۇيىندە ماراپاتتالدى. ولارعا تابىس ەتىلگەن باعالى سىيلىقتاردى جەرگىلىكتى كاسىپكەرلەردى جاعالاعان وسى ەرىكتى جاستار تاپتى.
جاستار ۇيىمداستىرعان جاقسى ءىستىڭ ءبىرى – باسپانا قيىندىعىن تارتقان وتباسىلارعا اسار ادىسىمەن ءۇي سالىپ بەرۋ. 2018 جىلى ءبىر وتباسىنا 4 بولمەلى ءۇي سالىپ بەرسە, بىلتىر تاعى ەكى شاڭىراقتى قۋانىشقا بولەپ, ولارعا جاڭا ءۇيدىڭ كىلتىن تابىس ەتتى. كۇزدە تاعى ءبىر ءۇيدىڭ ىرگەتاسىن قالادى, كۇن جىلىنا قۇرىلىس جالعاسادى.
جاڭالىقشىل جاستار الەۋمەتتىك كومەك سۇراۋشىلار اراسىندا ساۋالداما جۇرگىزىپ, وعان قاتىسقانداردىڭ يكەمىنە قاراي قۇرال-جابدىقتار الىپ بەرىپ, بيزنەسكە باۋلۋعا باستاماشى بولدى. بىلتىر وسى جوبا اياسىندا 3 وتباسىنا تىگىن ماشيناسى, تاعى ءبىر ۇيگە ەلەكتر پەشى, تۇشپارا جاساپ, كاسىپ باستاعان تۇرعىنعا مۇزداتقىش ساتىپ الىپ بەردى.
«اۋىلدان – وليمپياداعا» اتتى جوبا شەڭبەرىندە وڭىردەن شىققان سپورتشىلار مەن جاستاردىڭ كەزدەسۋىن ۇيىمداستىردى. ارىستاعى توتەنشە جاعدايعا بايلانىستى 12 توننا ازىق-ت ۇلىك, كيىم-كەشەك پەن 2 ميلليون تەڭگە جيناپ, ونى اپات ابىرجىتقان اعايىنعا تابىس ەتتى. ەرىكتىلەر ەڭبەگى ەسكەرىلىپ, ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىنىڭ «اتامەكەن» كىشى جوباسى اياسىنداعى «جومارت جۇرەك» وبلىستىق كونكۋرسىندا «جاڭارعان جاڭاقورعان جاستارى» «جىلدىڭ ۇزدىك ۇيىمى» نوميناتسياسىنا يە بولدى.
بيىلعى ۆولونتەر جىلى جاڭاقورعاندىق جاستاردىڭ جاندارىنا جىگەر, ىستەرىنە سەرپىن بەرەدى. وسى جىلى دا ەرىكتىلەردىڭ جاقسى ىستەرى جالعاسىن تابا بەرمەك.
قىزىلوردا
