بيىل 12 قىركۇيەك پەن 4 قازان ارالىعىندا بالتىق جاعالاۋىندا جالاۋى جەلبىرەيتىن دۇنيەجۇزىلىك دوپ دوداسىنا ءار توپتان ۇزدىك شىققان كوماندالار بىردەن جولداما الادى. سونداي-اق ەكىنشى ورىن العاندار دا ءوزارا كۇش سىناسىپ, سول ماتچتاردا جەڭىسكە جەتسە, ءدال سونداي قۇرمەتكە بولەنەدى. قازاقستان قۇراماسى كىمدەرمەن كەزدەسەتىنىن ءبىز جوعارىدا ايتتىق. ال وزگە توپتاردا مىنا مەملەكەتتەردىڭ ورەندەرى ونەر كورسەتەدى:
«ا» توبى – پورتۋگاليا, يتاليا, بەلارۋس, فينليانديا.
«ۆ»توبى – يسپانيا, سەربيا, ۋكراينا, فرانتسيا.
«س» توبى – رەسەي, ازەربايجان, سلوۆاكيا, حورۆاتيا.
بىردەن ايتا كەتەيىك, جەرلەستەرىمىز ءۇشىن جەرەبە ءساتتى ءتۇستى. ءبىزدىڭ توپتا اتاعى الىسقا جايىلعان بىردە-ءبىر كوماندا جوق. بارلىق قارسىلاستارىمىزدىڭ دەڭگەيلەرى شامالاس. ماسەلەن, چەحيا فۋتزالشىلارى وسىعان دەيىن جەتى مارتە ۇيىمداستىرىلعان الەم چەمپيوناتىنا ءۇش رەت قاتىسىپ, 2004 جانە 2012 جىلدارى ەكىنشى كەزەڭدە وينادى. ودان ارىگە شامالارى جەتپەدى. ال ەۋروپا بىرىنشىلىگىندە سەگىز رەت باق سىنادى. 2003 جىلعى ەۋروپا بىرىنشىلىگىن وتە تاماشا باستاعان چەحتار جارتىلاي فينالدا ۋكراينادان (1:5) تاس-تالقان بولىپ ۇتىلدى. ول كەزدە ءۇشىنشى ورىن ءۇشىن كەزدەسۋ وتكىزىلمەگەندىكتەن, جۇلدە بۇيىرمادى.
ەسەسىنە 2010 جىلى ايتۋلى ەلدىڭ ويىنشىلارى قولا مەدالدى يەلەندى. شيرەك فينالدا يتاليادان (3:3, پەنالتيدەن – 3:1) ايلاسىن اسىرعان ولار جارتىلاي فينالدا يسپانيادان (1:8) ويسىراي جەڭىلدى. شەشۋشى سىندا چەحيانىڭ وكىلدەرى ازەربايجاننىڭ (5:3) وسال تۇسىن تاپتى.
سلوۆەنيا وسى كۇنگە دەيىن دۇنيەجۇزىلىك دوپ دودالارىنا بىردە-ءبىر رەت قاتىسقان ەمەس. ال قارت قۇرلىقتىڭ باستى جارىسىندا التى مارتە ونەر كورسەتتى. ءتورت رەت توپتىق سايىستا سۇرىنسە, 2014 جانە 2018 جىلدارى شيرەك فينالعا دەيىن جەتتى. العاشىندا يسپانياعا (0:4) جول بەرسە, ودان كەيىن رەسەيدەن (0:2) ۇتىلدى.
رۋمىنيانىڭ دا الەم چەمپيوناتىنا ءالى جولى تۇسپەگەن ەكەن. ەسەسىنە ەۋروپا بىرىنشىلىگىندە ءتورت رەت وينادى. 2007 جىلى ولار توپتىق تۋرنيردە ءسۇرىندى. 2012 جىلى شيرەك فينالعا اۋپىرىمدەپ ءجۇرىپ جەتكەنىمەن, يسپانياعا (3:8) جارىتىپ قارسىلىق كورسەتە العان جوق. 2014 جىلى دا ءدال سول مەجەدەن كورىندى. بۇل جولى رۋمىنداردىڭ جولىن رەسەي (0:6) بوگەدى. 2018 جىلى سلوۆەنيادا جالاۋى جەلبىرەگەن جارىستىڭ العاشقى كەزەڭىنەن اسا الماي, ەلدەرىنە ەڭسەلەرى تۇسكەن كۇيدە ورالدى.
جوعارىدا اتالعان ءۇش كومانداعا قاراعاندا قازاقستاننىڭ تابىسى الدەقايدا قوماقتى. سوناۋ 1999 جانە 2000 جىلدارى جەرلەستەرىمىزدىڭ ازيا چەمپيوناتىندا جەڭىس تۇعىرىنا كوتەرىلگەنىن جانكۇيەرلەر ۇمىتا قويعان جوق. مالايزيادا قولا مەدال الساق, تايلاندتا كۇمىسپەن كۇپتەلدىك. ۋەفا-عا وتكەننەن كەيىن دە ءبىراز بەلەستەردى باعىندىردىق. 2016 جىلى بەلگرادتاعى باسەكەدە رەسەيدى (1:2) العا جىبەرىپ, ءوز توبىمىزدا ەكىنشى ورىندى ەنشىلەدىك. شيرەك فينالدا ايگىلى يتاليانى (5:2) شاڭ قاپتىرىپ كەتتىك. جارتىلاي فينالدا داڭقى الىسقا تاراعان يسپانياعا (3:5) ءالىمىز جەتپەدى. ال قولا مەدال ءۇشىن تارتىستا سەربيانى (5:2) سان سوقتىردىق.
2018 جىلى سلوۆەنيادا وتكەن جارىستا رەسەي (1:1) مەن پولشانى (5:1) ارتقا تاستاپ, توپتىق تۋرنيردە كوش باستادىق. شيرەك فينالدا سەربيامەن جولىمىز قايتا ءتۇيىستى. بۇل جولى دا ءبىزدىڭ جىگىتتەردىڭ (3:1) مىسى باسىم بولدى. جارتىلاي فينالدا يسپانيامەن (5:5) تەڭ وينادىق. بىراق پەنالتي سوعۋ بارىسىندا پيرەنەي تۇبەگى تۇلەكتەرىنىڭ باعى جاندى. ال ءۇشىنشى ورىن ءۇشىن وتكەن باسەكەدە رەسەيدەن (0:1) ۇتىلدىق.
الەم چەمپيوناتىندا قازاقستان قۇراماسى ەكى رەت ونەر كورسەتتى. عاسىرلار توعىسىندا گۆاتەمالادا جالاۋى جەلبىرەگەن جارىستا وتانداستارىمىز برازيليا (1:12), پورتۋگاليا (2:6) جانە گۆاتەمالادان (5:6) جەڭىلىپ, توپتىق تۋرنيردە كوش سوڭىندا قالىپ قويدى.
2016 جىلى قازاقستاندىق فۋتزالشىلار الەمدىك دودادا ەكىنشى مارتە بوي كورسەتتى. يت ارقاسى قيانداعى كولۋمبيادا وتكەن جارىستا ءوز توبىمىزدا ەكىنشى ورىندى يەلەندىك. تۋرنير بارىسىندا ارگەنتينادان (0:1) ۇتىلعانىمىزبەن, كوستا-ريكا (3:1) مەن سولومون ارالدارىنان (10:0) باسىم تۇستىك. بىراق 1/8 فينالدا ازۋلى يسپانياعا تاپ بولدىق. بۇل جولى دا الەمنىڭ ەكى جانە ەۋروپانىڭ جەتى دۇركىن چەمپيونى دەگەن دارداي اتاعى بار كومانداعا ءالىمىز جەتپەدى. بۇل كەزدەسۋ 2:5 ەسەبىمەن اياقتالعان ەدى.
مىنە, بيىل 12 قىركۇيەك پەن 4 قازان ارالىعىندا ليتۆادا وتەتىن الەم چەمپيوناتىنا جولداما الۋ ءۇشىن جەرلەستەرىمىز تاياۋ كۇندەرى جوعارىدا اتالعان كوماندالارمەن كۇش سىناسادى.
