فوتو: reuters.com
كۋۆەيت تۋى ىلىنگەن Al-Salmi تانكەرىنە جاسالعان بۇل سوققى 28 اقپاندا اقش پەن ءيزرايلدىڭ يرانعا قارسى شابۋىلىنان بەرى پارسى شىعاناعى مەن ورمۇز بۇعازىندا ساۋدا كەمەلەرىنە قارسى زىمىراندار مەن جارىلعىش دروندار ارقىلى جۇزەگە اسقان شابۋىلداردىڭ جالعاسى. وسى شابۋىلدان كەيىن مۇناي باعاسى قايتادان كۇرت ءوستى. اتالعان تانكەر شامامەن 2 ميلليون باررەل مۇناي تاسىمالداي الاتىن جانە ونىڭ قازىرگى نارىقتاعى قۇنى 200 ميلليون دوللاردان اسادى.
كەمەنىڭ يەسى – Kuwait Petroleum Corp كومپانياسىنىڭ حابارلاۋىنشا, شابۋىل سەيسەنبىگە قاراعان ءتۇنى بولعان. سونىڭ سالدارىنان ءورت شىعىپ, كەمە كورپۋسى زاقىمدانعان. سوققىدان زارداپ شەككەندەر تۋرالى اقپارات تۇسپەگەن. كەيىننەن دۋباي بيلىگى تانكەرگە درون ارقىلى جاسالعان شابۋىلدان كەيىن شىققان ءورتتىڭ تولىقتاي باقىلاۋعا الىنعانىن حابارلادى.
مۇناي مەن جانارماي باعاسىنىڭ قىمباتتاۋى اقش-تاعى ءۇي شارۋاشىلىقتارىنىڭ قارجىلىق جاعدايىنا اسەر ەتىپ, قاراشا ايىندا وتەتىن ارالىق سايلاۋ الدىندا ترامپ پەن ونىڭ رەسپۋبليكالىق پارتياسى ءۇشىن ساياسي ماسەلەگە اينالا باستادى. بۇعان دەيىن ولار ەنەرگيا باعاسىن تومەندەتىپ, ەلدەگى مۇناي-گاز ءوندىرىسىن ارتتىرۋعا ۋادە بەرگەن ەدى.
GasBuddy دەرەكتەرىنە سايكەس, دۇيسەنبى كۇنى اقش-تا بەنزيننىڭ ورتاشا بولشەك باعاسى سوڭعى ءۇش جىلدان بەرى العاش رەت ءبىر گاللون ءۇشىن 4 دوللاردان استى. بۇل جاھاندىق جەتكىزىلىمنىڭ قىسقارۋىنا بايلانىستى اقش مۇنايىنىڭ باعاسى ءبىر باررەل ءۇشىن 101 دوللاردان جوعارى كوتەرىلۋىمەن بايلانىستى.
قاقتىعىسۋشى تاراپتاردىڭ شابۋىلدارى باسەڭدەر ەمەس.
سوڭعى كۇندەرى يرانمەن وداقتاس حۋسيتتەر يزرايلگە زىمىراندار مەن دروندار ارقىلى سوققى بەرىپ, قاقتىعىسقا قوسىلدى. ال تۇركيا يراننان ۇشىرىلعان بالليستيكالىق زىمىراننىڭ ەل اۋە كەڭىستىگىنە كىرىپ, ناتو-نىڭ اۋە قورعانىس جۇيەلەرى ارقىلى جويىلعانىن حابارلادى.
ءوز كەزەگىندە يزرايل تەگەرانداعى اسكەري ينفراقۇرىلىم نىساندارىنا جانە بەيرۋتتاعى يران قولدايتىن «حەزبوللا» ۇيىمىنىڭ وبەكتىلەرىنە زىمىراندىق سوققىلار جاسادى. سونىڭ سالدارىنان ليۆان استاناسىنىڭ ءۇستىن قارا ءتۇتىن تورلادى.
قازاقستاننىڭ مۇنايىن تاسىمالدايتىن تانكەرلەر شابۋىلعا ۇشىرادى
سەيسەنبى كۇنى يزرايل قالاعا سوققى جاسالاتىنى تۋرالى ەسكەرتۋ جاساعاننان كەيىن, كوپ ۇزاماي تەگەراننىڭ شىعىس جانە باتىس بولىكتەرىندە جارىلىستاردىڭ داۋىسى ەستىلدى. Tasnim اگەنتتىگىنىڭ حابارلاۋىنشا, پيرۋزي اۋدانىندا ەلەكتر قۋاتى ءوشىپ, يراننىڭ ەنەرگەتيكا مينيسترلىگى ونى قالپىنا كەلتىرۋ جۇمىستارىن باستاعان.
يزرايل اسكەرى سەيسەنبىگە قاراعان ءتۇنى ليۆاننىڭ وڭتۇستىگىندە ءتورت ساربازىنىڭ قازا تاپقانىن مالىمدەدى. بۇعان دەيىن ءدال وسى ايماقتا بۇۇ-نىڭ يندونەزيادان كەلگەن ءۇش بىتىمگەرى ەكى بولەك وقيعادا كوز جۇمعان.
