سارىكول اۋىلدىق وكرۋگى قۇرامىنداعى اباي اۋىلىنىڭ تۇرعىندارىن تولعاندىراتىن ماسەلەلەردىڭ ءبىرى دارىگەرلىك امبۋلاتوريانىڭ قىسقارۋى مەن اۋىل ماڭىنداعى «اقساي» ارناسىنا توسپا سالۋ بولىپ وتىر. ايماق باسشىسى اۋىل تۇرعىندارىنا دارىگەرلىك امبۋلاتوريا جابىلمايتىنىن, تەك حالىق سانىنىڭ جەتىسپەۋىنە بايلانىستى فەلدشەرلىك-اكۋشەرلىك پۋنكت بولىپ وزگەرەتىنىن ءتۇسىندىردى. اتاۋى وزگەرگەنىمەن حالىققا بۇرىنعىشا دارىگەرلىك كومەك كورسەتىلە بەرەدى. ال, «اقساي» ارناسىنا توسپا سالۋ ءۇشىن قازالى اۋدانىنىڭ اكىمدىگى ءتيىستى جۇمىستار جاساپ جاتقانىن جەتكىزدى. الدىمەن بۇل جەرلەردىڭ يەسى بار-جوعى انىقتالىپ, اۋداننىڭ كوممۋنالدىق مەنشىگىنە الىنادى. مۇنان سوڭ ءتيىستى باسقارماعا توسپا سالۋ ءۇشىن ۇسىنىس بەرىلەدى.
ايتەكە بي كەنتىنە جاقىن ورنالاسقان ق.ءپىرىموۆ اۋىلىندا 5 جاسقا دەيىنگى 125 بالا بار. ونىڭ 50-ءى عانا № 92 مەكتەپ جانىنداعى شاعىن ورتالىقتا تاربيەلەنۋدە. سوندىقتان قۇمجيەك اۋىلدىق وكرۋگىنە بالاباقشا سالۋ قاجەتتىگى تۋىنداپ وتىر. سونداي-اق, تۇرعىندار اۋىلعا گاز جەلىسىن تارتۋ ماسەلەسىن دە كوتەردى.
اۋدان ورتالىعىنان 110 شاقىرىم قاشىقتىقتاعى شاكەن اۋىلى تۇرعىندارى كوپتەن بەرى كۇرمەۋى شەشىلمەي كەلگەن جول, ۇيالى بايلانىس, ينتەرنەت جانە تازا اۋىز سۋ سياقتى ماسەلەلەردى ۇسىندى. وبلىس اكىمى وسى اۋىلدىق وكرۋگكە قاراستى ءشيلى ەلدى مەكەنىندە دە بولىپ, تۇرعىنداردىڭ جاي-كۇيىمەن تانىستى.
«باتىس ەۋروپا – باتىس قىتاي» حالىقارالىق اۆتوجولىنىڭ بويىندا ورنالاسقان اقسۋات اۋىلىندا بىلتىر ساياباق سالىنىپ, بالاباقشا قۇرىلىسى باستالدى, كوشەلەر جوندەلدى. ەندى مايلىباس اۋىلدىق وكرۋگىنىڭ ورتالىعىنا گاز جەلىسىن تارتىپ, اۋىلعا كلۋب سالىنسا دەگەن ۇسىنىس ايتتى. ال, وكرۋگكە قاراستى بايقوجا ەلدى مەكەنىنىڭ تۇرعىندارى وسىنداعى توپتىق سۋ جۇيەسىن جاڭعىرتۋ قاجەتتىگىن كوتەردى.
ايماق باسشىسى بايقوجا توپتىق سۋ جۇيەسىن قايتا جاڭعىرتۋ ءۇشىن جوبا-سمەتالىق قۇجاتتارى دايىن ەكەندىگىن, ونى ساراپتامادان وتكىزۋ ءۇشىن وبلىستىق بيۋدجەتتەن ءتيىستى قارجى بولىنگەنىن جەتكىزدى. ال, كلۋب پەن بالاباقشا سالۋ, گاز جەلىسىن تارتۋ جەرگىلىكتى كاسىپكەرلەرمەن بىرلەسىپ مەملەكەتتىك-جەكەشەلىك ارىپتەستىك نەگىزىندە قاراستىرىلادى.
قىزىلوردا وبلىسى
