وسى جيىن بارىسىندا رەسپۋبليكامىزدىڭ باس كومانداسى ەكى جولداستىق كەزدەسۋ وتكىزۋدى جوسپارلاپ وتىر. اتاپ ايتساق, 27 ناۋرىزدا ليتۆا جانە 30 ناۋرىزدا ارمەنيا فۋتبولشىلارىمەن شەبەرلىك بايقاسامىز.
بالتىق جاعالاۋىنىڭ وكىلدەرى قازىرگى كەزدە فيفا رەيتينگىندە جەرلەستەرىمىزدەن 13 ساتى تومەن تۇر. ياعني, ءبىز – 118, ال ولار – 131-ورىندى يەلەنۋدە. قازىرگى كەزدە ۆالداس ۋربوناس باپتايتىن ايتۋلى كوماندا ساپىندا ەۋروپانىڭ جاسىل الاڭجارىندا اسقان شەبەرلىگىمەن وقشاۋلانىپ جۇرگەن ويىنشىنىڭ جوق ەكەنىن ايتا كەتەيىك.
قازاقستان نەمەسە ليتۆامەن سالىستىرعاندا, ارمەنيا قۇراماسىنىڭ جاعدايى ءبىرشاما جاقسى. فيفا رەيتينگىندە ولار 102-ورىندى ەنشىلەۋدە. بۇل كوماندانىڭ بۇگىنگى تاڭداعى باستى جۇلدىزى گەنريح محيتاريان ەكەنى داۋسىز. ءار جىلدارى دونەتسكىنىڭ «شاحتەر», دورتمۋندتىڭ «بورۋسسيا» جانە انگليانىڭ «مانچەستەر يۋنايتەد» پەن «ارسەنال» كلۋبتارىندا جاسىنداي جارقىراعان ول بۇل كۇندەرى يتاليانىڭ «روماسىندا» تابىستى ونەر كورسەتىپ ءجۇر.
