قىزىلوردا وبلىسىنىڭ اكىمى اۋىل تۇرعىندارىمەن كەزدەستى

كەشە ايماق باسشىسى قازالى اۋدانىنىڭ جانقوجا باتىر، بەكارىستان بي اۋىلدارى مەن ارال اۋدانىنا قاراستى 12 ەلدى مەكەندە بولىپ، تۇرعىندارمەن كەزدەستى. قازالى اۋدانىنداعى بەكارىستان بي اۋىلىنىڭ تۇرعىندارى ايماق باسشىسىنا اۋىز سۋ ماسەلەسى مەن سپورت كەشەنىن سالۋ تۋرالى ءوتىنىش ايتتى. ءوڭىر باسشىسى اۋىز سۋ ماسەلەسى بيىل ءوز شەشىمىن تاباتىنىن جانە سپورت كەشەنىن جەرگىلىكتى كاسىپكەرلەرمەن بىرلەسىپ مەملەكەتتىك-جەكەشەلىك ارىپتەستىك نەگىزىندە سالۋ جولدارى قاراستىرىلىپ وتىرعانىن جەتكىزدى.

مۇنان سوڭ ايماق باسشىسى ارال اۋدانىنىڭ ەڭ شالعاي ورنالاسقان قاراتەرەڭ، قاراشالاڭ، بوگەن اۋىلدارىندا بولىپ، حالىقتىڭ تۇرمىس-تىرشىلىگىمەن تانىستى. اۋىل تۇرعىندارى جول، ۇيالى بايلانىس جەلىسىن ورناتۋ،  بالاباقشا عيماراتى مەن اۋىلدىق كلۋبتى جاڭارتۋ، اياق سۋ پروبلەماسى سەكىلدى ماسەلەلەر كوتەردى.

ارالدىقتار ءۇشىن اسىرەسە امانوتكەل اۋىلى تۇسىندا ورنالاسقان قالقىمالى كوپىردى جاڭارتىپ، قاراشالاڭ ەلدى مەكەنىنىڭ جولىن جوندەۋ وزەكتى ماسەلە بولىپ وتىر. قۋانىشبەك دوسمايىل ۇلى قالقىمالى كوپىردى جاڭارتۋ ءۇشىن ءتيىستى جۇمىستار اتقارىلاتىنىن ايتتى، ال قاراشالاڭداعى جول بيىل جوندەلەدى.