ون ەكى زياتكەرلىك مەكتەپتەن كەلگەن 100-گە جۋىق وقۋشى جارىستى تارتىستى باسەكەلەر مەن دوستىق احۋالدا وتكىزدى. ۇيىمداستىرۋشىلاردىڭ ايتۋىنشا, مۇنداي شارالار سپورتقا دەگەن سۇيىسپەنشىلىكتى ەسەلەندىرىپ, كوماندالىق رۋح پەن زياتكەرلەردىڭ ءوزارا ىنتىماقتاستىعىن نىعايتا تۇسەدى.
ۇلدار اراسىنداعى I ورىندى شىمكەنت قالاسىنداعى حيميا-بيولوگيالىق باعىتتاعى نازارباەۆ زياتكەرلىك مەكتەبىنىڭ وقۋشىلارى يەلەندى. جۇلدەلى II جانە III ورىنداردى ورالداعى فيزيكا-ماتەماتيكالىق جانە قاراعاندىداعى حيميا-بيولوگيالىق باعىتتاعى زياتكەرلىك مەكتەپتەردىڭ سپورتشىلارى ءبولىپ الدى.
ال قىزدار اراسىندا وتكەن تارتىستى باسەكەنىڭ جەڭىمپازدارى بولىپ اقتوبەنىڭ فيزيكا-ماتەماتيكا باعىتىنداعى زياتكەرلىك مەكتەپ بۇرىمدىلارى تانىلدى. ەكىنشى ورىندى قاراعادىنىڭ حيميا-بيولوگيالىق باعىتتاعى زياتكەرلىك مەكتەپ ارۋلارى يەمدەنسە, ءۇشىنشى ورىن نۇر-سۇلتان قالاسىنىڭ IB مەكتەبىنە بۇيىردى.
«ەڭ الدىمەن, وسىنداي شارا ۇيىمداستىرعان «نازارباەۆ زياتكەرلىك مەكتەپتەرى» دەربەس ءبىلىم بەرۋ ۇيىمىنا ۇلكەن العىسىمىزدى بىلدىرەمىز. وسىنداي شارالاردىڭ ارقاسىندا ءبىز باسقا بالالارمەن تىعىز قارىم-قاتىناس ورناتىپ, جاڭا دوستار تاپتىق. جەڭىسىمىز ءبىز ءۇشىن وتە قۇندى. ارينە, وعان جەتۋ وڭاي بولعان جوق. دەسە دە, جەڭىسكە دەگەن سەنىمدىلىك, جىلدار بويعى دايىندىق بىزگە دەمەۋ بولدى. سونداي-اق, بىزگە قولداۋىن اياماعان اقتوبە قالاسىنىڭ حيميا-بيولوگيا باعىتىنداعى نازارباەۆ زياتكەرلىك مەكتەبىنە العىسىمىز زور!», - دەپ ءبولىستى ءوز اسەرىمەن اقتوبە قالاسىنداعى فيزيكا-ماتەماتيكا باعىتىنداعى نازارباەۆ زياتكەرلىك مەكتەبى قىزدار كومانداسىنىڭ مۇشەسى ديلناز جالماعانبەت.
سونداي-اق, سپارتاكيادا بارىسىندا جاقسى ويىن كورسەتكەن سپورتشىلار ارنايى نوميناتسيالارمەن ماراپاتتالدى. «ۇزدىك ويىنشى» اتالىمى ەلوردالىق نۇراسىل جاقانوۆ پەن اقتوبەلىك مەدينا ديۋسەمبيناعا بەرىلسە, قاراعاندىلىق ۆلاديسلاۆ نەسۆەلدين مەن ۆالەريا سوتنيكوۆا «ۇزدىك ورتالىق ويىنشىلار» بولىپ تانىلدى. «ۇزدىك شابۋىلشى» اتالىمىن شىمكەنتتىك ءالي سۇلەيمەن مەن استانالىق سۇلتانقىزى بينازير السا, «ۇزدىك قورعاۋشى» اتالىمى ورالدىق ەرداۋلەت يسماناليەۆ پەن شىمكەنتتىك الينا بورگۋلگە بۇيىردى.
جارىس جەڭىمپازدارى مەن جۇلدەگەرلەرىنە كۋبوكتار, مەدالدار جانە ارنايى ديپلومدار تابىس ەتىلدى.
الماتى
