- پارتيا ليدەرى ن.ءا. نازارباەۆتىڭ كەلىسىمىمەن ارمان قىرىقباەۆ Nur Otan-نىڭ حاتشىسى بولىپ تاعايىندالدى. ونىڭ پارتياداعى, سونداي-اق ورتالىق جانە جەرگىلىكتى مەملەكەتتىك ورگاندارداعى مول جۇمىس تاجىريبەسى الداعى مىندەتتەردى تابىستى ىسكە اسىرۋىنا مۇمكىندىك بەرەتىنىنە سەنىمدىمىن, - دەپ جازدى باۋىرجان بايبەك.
ارمان قىرىقباەۆ – قازاق مەملەكەتتىك باسقارۋ اكادەمياسىنىڭ, سونداي-اق قر ءسىم ديپلوماتيالىق اكادەمياسىنىڭ تۇلەگى. ءار جىلدارى Nur Otan پارتياسىندا, سىرتقى ىستەر مينيسترلىگىندە جۇمىس ىستەدى.
سونداي-اق ول قوعامدىق-ساياسي جۇمىس دەپارتامەنتىنىڭ ديرەكتورى, مادەنيەت كوميتەتىنىڭ توراعاسى, مادەنيەت جانە اقپارات ۆيتسە-ءمينيسترى, قاراعاندى وبلىسى اكىمىنىڭ ورىنباسارى, «ەگەمەن قازاقستان», «كازاحستانسكايا پراۆدا» رەسپۋبليكالىق باسىلىمدارى, «قازاقفيلم» اق, «Nur Media» جشس ديرەكتورلار كەڭەسىنىڭ توراعاسى جانە ت.ب. بىرقاتار قىزمەتتە جۇمىس ىستەدى. 2015 جىلدان باستاپ 2019 جىلعا دەيىن الماتى قالاسى اكىمىنىڭ ورىنباسارى بولىپ, وندا ىشكى ساياسات, ءبىلىم بەرۋ, دەنساۋلىق ساقتاۋ سياقتى سالالاردى قاداعالادى.
پارتيا حاتشىسى رەتىندە ارمان قىرىقباەۆ قوعامدىق-ساياسي باعىتقا, قوعامدىق ساياسات ينستيتۋتى, «جاس وتان» جق, ساراپشىلار قاۋىمداستىعىمەن بىرلەسىپ جۇمىس ىستەۋ سياقتى باعىتتارعا جاۋاپتى بولادى.
توراعانىڭ ءبىرىنشى ورىنباسارى ونىڭ پارتياداعى, سونىمەن قاتار ورتالىق جانە جەرگىلىكتى مەملەكەتتىك ورگاندارداعى مول جۇمىس تاجىريبەسىنىڭ ارقاسىندا, ول العا قويعان بارلىق ماقساتتار مەن تاپسىرمالاردى تابىستى جۇزەگە اسىراتىنىنا سەنىم ءبىلدىردى.
ال وسىعان دەيىن پارتيا حاتشىسى قىزمەتىن اتقارعان عابيدۋللا وسپانقۇلوۆ ۇكىمەت قاۋلىسىمەن اقپارات جانە قوعامدىق دامۋ ۆيتسە-ءمينيسترى بولىپ تاعايىندالدى. ول جاستاردى قولداۋ جانە ازاماتتىق قوعاممەن ءوزارا بايلانىس سالالارىن قاداعالايدى.
باۋىرجان بايبەك وعان اتقارعان جۇمىستارى ءۇشىن العىسىن ءبىلدىرىپ, تابىس تىلەدى. ونىڭ ايتۋىنشا, سوڭعى التى ايدا پارتيا الاڭدارىندا مەملەكەتتىك ءتىلدى, ۇلتتىق مادەنيەتتى دامىتۋ, بالالاردىڭ قۇقىعىن قورعاۋ ماسەلەلەرى بويىنشا كوپتەگەن جۇمىس اتقارىلىپ, وڭىرلەردەگى جاستارىمەن جۇمىس كۇشەيتىلدى.
