– بۇگىنگى قوعام مۇعالىمدەرگە ۇلكەن مىندەتتەر جۇكتەپ وتىر. ول ءپان مۇعالىمى عانا ەمەس, بالانىڭ بولاشاعىنا باعدارشى بولا الاتىن تۇلعاعا اينالۋى كەرەگىن ۋاقىتتىڭ ءوزى دالەلدەۋدە. وسى تۇرعىدان كەلگەندە, ۋنيۆەرسيتەتتىڭ 2025 جىلعا دەيىنگى دامۋ ستراتەگياسىندا ناقتى كورسەتىلگەندەي, ەلىمىزدەگى تۇڭعىش پەداگوگيكالىق ۋنيۆەرسيتەت – مىقتى پەداگوگ مامانداردى دايىندايتىن ۇستاحاناعا اينالۋ كەرەك دەلىنگەن. وسى ستراتەگيالىق باعىتتى نەگىزگە الا وتىرىپ, ۇلى اقىن اباي قۇنانباي ۇلىنىڭ اتىن يەلەنىپ وتىرعان پەداگوگيكالىق ۋنيۆەرسيتەت بولعاندىقتان, مۇنداي شارالاردىڭ ۇيىمداستىرىلۋى زاڭدىلىق. بۇل – بۇگىن ينستيتۋت كولەمىندە ءوتىپ جاتسا, بولاشاقتا ۋنيۆەرسيتەت, رەسپۋبليكالىق دەڭگەيدە وتكىزسەك دەگەن جوسپارىمىز بار. سونىمەن قاتار وسىنداي بايقاۋلار ارقىلى ۇستازداردىڭ باسەكەلەستىگىن ارتتىرۋدى ماقسات تۇتىپ وتىرمىز. باسەكەلەستىك بار جەردە ساپا بار, ساپا بار جەردە ءبىلىم بار. ءبىز قوعامعا ءبىلىمدى, زامان تالابىنا ساي, ءۇش ءتىلدى قاتار مەڭگەرگەن پەداگوگ مامانداردى دايارلاۋىمىز قاجەت. بايقاۋ ەكى كەزەڭنەن تۇردى. بۇل جاي ساباقتار ەمەس, زامان تالابىنا ساي, جاڭا تەحنولوگياعا, جاڭارتىلعان باعدارلاماعا نەگىزدەلگەن ساباق وتكىزۋ كەرەك بولدى, – دەيدى جاراتىلىستانۋ جانە گەوگرافيا ينستيتۋتى ديرەكتورىنىڭ وقۋ ىستەرى جونىندەگى ورىنباسارى ءلاززات دەمەۋوۆا.
ال بايقاۋعا قاتىسۋشىلار وسى تالاپتاردى ورىنداۋعا تىرىسىپ باقتى. شەبەرلىك دارىستەرىنە بەيجاي قاراماي, ءبىر-بىرىنەن ۇيرەندى, تاجىريبە الماستى, وسال جەرلەرىن بايقادى. ادىلقازىلار القاسىنا ينستيتۋتتىڭ عىلىمي جۇمىس جانە حالىقارالىق ىنتىماقتاستىق جونىندەگى پرورەكتورى اقتولقىن قۇلساريەۆا جەتەكشىلىك ەتتى.
ساراپشى رەتىندە باسقا ينستيتۋتتاردىڭ تاجىريبەلى پروفەسسور-وقىتۋشىلارى – فيلولوگيا عىلىمدارىنىڭ كانديداتى, پروفەسسور گۇلجيان شاحارمان, فيلولوگيا عىلىمدارىنىڭ دوكتورى, پروفەسسور رايگۇل راحمەتوۆا, پەداگوگيكا عىلىمدارىنىڭ كانديداتى باعدات قوسانوۆ, پەداگوگيكا عىلىمدارىنىڭ كانديداتى ەسەنگەلدى تۇياقوۆ سياقتى ۇستاز عالىمدار قاتىسىپ, ءوز ويلارىمەن ءبولىستى. سونىمەن بىرگە كونكۋرسقا قاتىسۋشىلار «پورتفوليو» دايىنداپ, ياعني وزدەرىنىڭ مەتوديكالىق كابينەتتەرىنىڭ «ساندىعىن» اشتى. ياعني, پورتفوليو – بۇل ۇستازدىڭ بارلىق ەڭبەگىنىڭ جيىنتىعى, ناتيجەسى دەسە بولادى. سونىمەن بايقاۋدا ۇستازدار وزدەرى تۋرالى مالىمەت بەرە وتىرىپ, ساباقتا قانداي تەحنولوگيانى, ادىستەمەنى پايدالاناتىنى تۋرالى باياندادى. سونداي-اق جاس ۇرپاقتى تاربيەلەۋدە قانداي تىڭ جۇمىستار اتقارىپ وتىرعاندارىمەن ءبولىستى. ۇستازداردىڭ سوزگە شەشەندىگى, ءسوزىنىڭ جۇيەلىگى, بالانى باۋراپ الۋ قاسيەتى, ويىن جەتكىزە ءبىلۋى دە سىنعا ءتۇستى. وقىتۋشىلار ابايدىڭ قارا سوزدەرىن, ولەڭىن وقىپ, ءانىن سالىپ, ونەرلى ەكەندىكتەرىن دە بايقاتتى.
قورىتا كەلگەندە, ءبىرىنشى ورىندى حيميا عىلىمدارىنىڭ كانديداتى ايمانكۇل مەيىرمانوۆا, ەكىنشى ورىندى حيميا عىلىمدارىنىڭ كانديداتى دينارا قاسىمبەكوۆا, ءۇشىنشى ورىندى پەداگوگيكا عىلىمدارىنىڭ كانديداتى زۋلفيا ونەرباەۆا يەلەندى. جۇلدەلى بولعان ۇستازدار قارجىلاي سىيلىقتار مەن سەرتيفيكاتتارعا يە بولدى.
الماتى
