اتالعان نىساننىڭ اشىلۋ سالتاناتىندا قازاقستاننىڭ جانە قىرعىزستاننىڭ حالىق ءارتيسى, مەملەكەتتىك سىيلىقتىڭ لاۋرەاتى التىنبەك قورازباەۆ ءسوز سويلەپ, جامبىلدىقتاردى بۇگىنگى مەرەكەمەن قۇتتىقتادى. سونىمەن قاتار, كەيىنگى كەزدە جامبىل وبلىسىنىڭ جاڭا ارناعا تۇسكەنىن, مۇندا اتقارىلىپ جاتقان ناتيجەلى جۇمىستاردىڭ بار ەكەنىن ايتتى. سونىمەن قاتار, «اۋەندەر الەمى» الاڭىنىڭ اشىلۋى اۋليەاتا وڭىرىنەن شىققان ونەر ادامدارىنا دەگەن ەرەكشە قۇرمەت ەكەنىن جەتكىزدى. بۇدان كەيىن جامبىل وبلىسىنىڭ اكىمى اسقار مىرزاحمەتوۆ «اۋەندەر الەمى» الاڭىنا ەسىمدەرى جازىلعان ونەرپازدارعا ارنايى كۋالىك سەرتيفيكاتىن تابىستادى. ولاردىڭ قاتارىندا ايگىلى «دوس-مۇقاسان» ءانسامبلىنىڭ نەگىزىن قالاۋشى مۇرات قۇسايىنوۆ, حالىق ءارتيسى التىنبەك قورازباەۆ, سونىمەن قاتار گۇلميرا اقۇرپەكوۆا, اۋەزحان سالابەكوۆ, گۇلنۇر ومىرباەۆا جانە تاعى دا باسقا ونەر ادامدارى بار.
اۋليەاتادا ورنالاسقان «اۋەندەر الەمى» اتتى اللەيا قازاق ونەرى قايراتكەرلەرىنىڭ شىعارماشىلىعىن ناسيحاتتاپ, ولاردىڭ ونەگەلى ءومىر جولىن بۇگىنگى ۇرپاققا ۇلگى ەتۋ ماقساتىندا اشىلىپ وتىر. ال, الاڭنىڭ ورتاسىنا بيىكتىگى 6,5 مەتر بولاتىن ونەر يەلەرىنىڭ قۇرمەتىنە ارنالعان ستەللا قويىلعان. ستەللانىڭ اينالاسىنا 30 تاس تۇعىر قويىلعان. ولارعا قويىلعان 60 جۇلدىز بەلگىسىنە ەلىمىزدىڭ ونەرىنە ەلەۋلى ەڭبەك سىڭىرگەن تۇلعالاردىڭ ەسىمدەرى جازىلعان. ال, ستەللانىڭ تۇعىرىنا جامبىل جاباەۆ, بالۋان شولاق, ىقىلاس دۇكەن ۇلى, كەنەن ازىرباەۆ سىندى ايگىلى تۇلعالاردىڭ ونەر تۋرالى قاناتتى سوزدەرى قاشالىپ جازىلعان.
