وسى جىلدىڭ قىركۇيەگىنەن بەرى ايماقتىڭ تۇكپىر-تۇكپىرىندە بەكسۇلتان بايكەنجەەۆ شىعارماشىلىعىنا ارنالعان كەشتەر ءوتتى. سولاردى قورىتىندىلاعان شارا – رەسپۋبليكالىق «سىرداريا» انشىلەر كونكۋرسى جۋىردا جاڭاقورعان كەنتىندە ۇيىمداستىرىلدى. ماناپ كوكەنوۆ اتىنداعى اۋداندىق مادەنيەت ۇيىندە وتكەن شارا الدىندا جينالعاندار كومپوزيتور ەسكەرتكىشىنە گۇل شوقتارىن قويىپ, رۋحىنا قۇرمەت تانىتتى.
وبلىستىق حالىق شىعارماشىلىعىن دامىتۋ جانە مادەني-پروديۋسەرلىك ورتالىعى مەن اۋداندىق مادەنيەت جانە تىلدەردى دامىتۋ ءبولىمى ۇيىمداستىرعان بايقاۋدا ەلىمىزدىڭ ءار تۇكپىرىنەن جينالعان 15 ءانشى باق سىنادى. ەلىن انمەن الديلەگەن دارىننىڭ رۋحىن ۇلىقتاۋعا ارنالعان كەشتى اۋدان اكىمىنىڭ ورىنباسارى عالىمجان سوپبەكوۆ اشىپ, ۇمىتكەرلەرگە ساتتىلىك تىلەدى.
بايقاۋدىڭ شارتى بويىنشا ونەرپازدار اۋەلى بەكسۇلتان بايكەنجەەۆتىڭ تۋىندىسىن, سوسىن حالىق ءانىن ورىنداۋى ءتيىس بولدى.
بەلگىلى ءانشى, بەكسۇلتاننىڭ شاكىرتى دۇيسەنحان سىزدىقوۆ باستاعان قازىلار القاسىنىڭ ۇيعارىمىمەن ميراس اجيكوۆ (باتىس قازاقستان), ءالفارابي بەكارىس ۇلى (شيەلى), ءادىلحان ماقساتباەۆ (قازالى), ەربول رايسوۆ (شيەلى), سالجەكەن باقىتبەك (قازالى), جاندوس سانسىزباەۆ (قىزىلوردا), جۇلدىز شۇكىرباەۆا (شىمكەنت) جانە باعلان شۋباەۆقا (جامبىل وبلىسى) ىنتالاندىرۋ سىيلىعى بەرىلدى. ءۇشىنشى ورىن جۇلدەسى مۇحتار بايجانوۆ (ارال), ايبول ءابدىراسىل (قىزىلوردا) جانە ايبەك شۇكىروۆكە (قىزىلوردا) بۇيىردى. شاراعا ماڭعىستاۋ وبلىسىنان كەلىپ قاتىسقان مارات سافاروۆ پەن قىزىلوردالىق يسلام ناعىزحان ەكىنشى ورىنعا لايىقتى بولدى. ءبىرىنشى ورىندى تۇركىستان وبلىسىنان كەلگەن اسىلبەك بەيىسوۆ السا, باس جۇلدە يەگەرى الماتى وبلىسىنىڭ وكىلى يساحان سۇلەيمەنوۆكە بۇيىردى.
كەشتە بەلگىلى انشىلەر جەڭىس ىسقاقوۆا, دۇيسەنحان سىزدىقوۆ, ساۋران ەلەۋوۆ, اقمارال نوعايباەۆا مەن جەرگىلىكتى ونەرپازدار كومپوزيتور تۋىندىلارىن ورىنداپ, ونەر يەسىنىڭ ەل رۋحانياتىنداعى ورنەكتى جولى وشپەيتىندىگىن كورسەتتى.
