پريۆوكزالنىي كوشەسىندەگى جەكەمەنشىك ۇيلەردىڭ ءبىرىنىڭ «كوكشەتاۋ سۋ ارناسى» كاسىپورنىنا 15 مىڭ تەڭگە كولەمىندە قارىزى بار. بۇعان دەيىن بىرنەشە ەسكەرتۋ العان ءۇي يەسى قارىزىن تولەۋگە قاراجاتىنىڭ جوقتىعىن ايتىپ الاقان جايىپ وتىر. دەگەنمەن, قارىزدى وتەۋ پارىز. بۇل ءۇي ۋاقىتشا جەلىدەن اجىراتىلدى.
– بۇل قاراجات بىرەۋلەر ءۇشىن از عانا سوما بولىپ كورىنۋى مۇمكىن. ال ءبىزدىڭ مەكەمە ءۇشىن ايتارلىقتاي قارجى. ويتكەنى ەڭبەككەرلەردىڭ ەڭبەكاقىسى. ولاردىڭ دا اتا-انالارى, وتباسى بالالارى بار. سوندىقتان, تۇتىنعان ءونىمنىڭ اقىسىن ۋاقىتىلى تولەۋ قاجەت, – دەيدى «كوكشەتاۋ سۋ ارناسى» كاسىپورنىنىڭ ءبولىم جەتەكشىسى اسەل ەسەنعوجينا.
جۇمابەك تاشەنوۆ كوشەسىندە ورنالاسقان 54-ءشى ۇيدەگى پاتەرلەردىڭ ءبىرى دە سۋدان اجىراتىلدى. ءۇي يەسى كاسىپورىنعا 20 مىڭ تەڭگە بەرەشەك. ءۇي يەسى اقىنى تولەگەنىن ايتۋدا, بىراق قولىندا تۇبىرتەك جوق.
– كۇنىنە شامامەن 10 شاقتى ءۇيدى سۋدان اجىراتامىز. كراندى جاۋىپ, ءمور باسىپ, بەكىتەمىز. ءۇي يەسى اقى تولەگەن سوڭ ۇيگە قايتا سۋ بەرىلەدى. ەگەر ءۇي يەسى بەكىتىلگەن كراندى ءوز ەركىمەن قوسىپ السا, ارينە, ايىپپۇل سالىنادى,–دەيدى «كوكشەتاۋ سۋ ارناسى» كاسىپورنىنىڭ ينسپەكتورى نۇرجان پوشانوۆ.
كاسىپورىن قىزمەتكەرلەرى بۇعان دەيىن 86 پاتەر مەن جەكەمەنشىك ءۇيدى اۋىزسۋدان اجىراتقان. سوت ورىنداۋشىلارىندا وندىرىستە 1500-دەن اسا ءىس جاتىر. ول قۇجات بويىنشا ءوندىرىلۋى ءتيىس قاراجات 58 ميلليون تەڭگەدەن اسادى.
