ىشكى ىستەر ءمينيسترى ە. تۇرعىمباەۆ وسى جىلدىڭ 16-22 جەلتوقسان ارالىعىندا ەلىمىزدە 104 جول-كولىك وقيعاسى تىركەلىپ, سولاردىڭ سالدارىنان 39 ادام قازا تاۋىپ, 158 ادام ءتۇرلى دەنە جاراقاتتارىن العانىن ايتتى.
اۋا-رايى جاعدايلارى جولدارداعى جاعدايعا كەرى اسەرىن تيگىزدى. تەمپەراتۋرانىڭ ءنول گرادۋسقا دەيىن كۇرت كوتەرىلۋى جانە سونىڭ سالدارىنان كوكتايعاقتىڭ قالىپتاسۋى, سونىمەن قاتار جاڭبىر مەن قاردىڭ جاۋىنىڭ, تۇماننىڭ اسەرىنەن جولدىڭ كورىنۋىنىڭ شەكتەلۋى — قالا سىرتىنداعى جولدارداعى اپاتتىلىقتىڭ ارتۋىنا اكەلىپ سوقتى.
وتكەن اپتادا پوليتسيا توتەنشە جاعدايلار بولىمشەلەرىمەن جانە «قازاۆتوجول» ۇك» اق-مەن بىرگە 11 وبلىستا رەسپۋبليكالىق جانە جەرگىلىكتى ماڭىزى بار جولداردا كولىك قۇرالدارىنىڭ قوزعالىسىن شەكتەدى.
جالپى ۇزىندىعى شامامەن 7,5 مىڭ شاقىرىم بولاتىن رەسپۋبليكالىق ماڭىزى بار جولداردىڭ 57 ۋچاسكەسى جابىلدى (7,272 كم).
ەڭ قيىن جاعداي شىعىس قازاقستان, اقتوبە, جامبىل جانە باتىس قازاقستان وبلىستارىندا بايقالدى.
ىشكى ىستەر ورگاندارى كوممۋنالدىق قىزمەتتەرمەن جانە جەرگىلىكتى اتقارۋشى ورگاندارمەن بىرلەسىپ, كەپتەلىستەردى جويۋ, جولداردى تازارتۋ, ينەرتتى ماتەريالداردى سەبۋ, ەۆاكۋاتسيالاۋ جانە ازاماتتارعا شۇعىل كومەك كورسەتۋ شارالارىن ورىندادى.
شامامەن 1 مىڭ اۆتوماشينا كەپتەلىستە قالعان, بارلىعى قار قۇرساۋىنان 120-دان استام اۆتوماشينا مەن 900-دەن استام ادام ەۆاكۋاتسيالاندى. ەۆاكۋاتسيالانعان ازاماتتار جاقىن ماڭداعى ەلدى مەكەندەردە ورنالاسقان جىلىتۋ پۋنكتتەرىنە ورنالاستىرىلدى. وڭىرلەردە ازاماتتارعا كومەك كورسەتۋ ءۇشىن جەدەل شتابتار قۇرىلدى.
ادامداردى قۇتقارۋعا تجك-ءنىڭ 200-دەن استام قىزمەتكەرى مەن 300 پوليتسيا قىزمەتكەرى, 170 بىرلىك قۇتقارۋ تەحنيكاسى مەن پوليتسيا ماشينالارى, سونداي-اق جەرگىلىكتى اتقارۋشى ورگاندار مەن جول قىزمەتتەرىنىڭ ارنايى تەحنيكالارى تارتىلعان.
قازىرگى ۋاقىتتا شىعىس قازاقستان, اتىراۋ, اقمولا, قوستاناي, قىزىلوردا, پاۆلودار, سولتۇستىك قازاقستان جانە تۇركىستان وبلىستارىندا كۇردەلى جاعداي ساقتالۋدا.
«جۇرگىزۋشىلەر مەن جولاۋشىلاردىڭ قاۋىپسىزدىگىن قامتاماسىز ەتۋ وتە ماڭىزدى ماسەلە. تاياۋ ۋاقىتتا, بولجام بويىنشا, الدا بوراندار بولىپ, اۋا تەمپەراتۋراسى تومەندەيدى. بارلىق قىزمەتتەر بۇعان دايىن بولۋى كەرەك», — دەدى ا. مامين.
ۇكىمەت باسشىسى وڭىرلەردىڭ اكىمدىكتەرىنە جولداردا جىلىتۋ جانە تاماقتاندىرۋ پۋنكتتەرىن ۇيىمداستىرۋعا جاردەمدەسۋدى تاپسىردى.
«يندۋستريا جانە ينفراقۇرىلىمدىق دامۋ مينيسترلىگىنە جانە قازاۆتوجولعا جولداردى قاردان جانە مۇزدان تازارتۋعا تەحنيكانى بارىنشا تارتۋدى تاپسىرامىن. قر ءىىم اۆتوتراسسالاردا كەزەكشىلىك پەن قاۋىپسىزدىكتى قامتاماسىز ەتۋ جۇمىسىن جالعاستىرسىن», — دەدى ا. مامين.
