IDC اناليتيكتەرىنىڭ Microsoft كورپوراتسياسىنا ارناپ جۇرگىزگەن «ورتالىق جانە شىعىس ەۋروپاداعى تسيفرلى داعدىلاردىڭ جاعدايى» (The State of Digital Skills in CEE) اتتى جاڭا زەرتتەۋى قىزىقتى ناتيجەلەردى كورسەتىپ وتىر. ماسەلەن, بۇلتتىق تەحنولوگيالاردى ەندىرىپ جاتقان شىعىس جانە ورتالىق ەۋروپاداعى كومپانيالاردا ات بىلىكتىلىگى بار ماماندارعا دەگەن قاجەتتىلىك باسقا كومپانيالارعا قاراعاندا 35%-عا جوعارى ەكەن. وسىنىڭ ناتيجەسىندە بيزنەس قازىردىڭ وزىندە تاجىريبەلى كادرلاردىڭ تاپشىلىعىنا تاپ بولىپ وتىر: وسى ەلدەردەگى قىزمەتكەرلەردىڭ 3,5%-ى عانا بۇگىنگى كۇنى ات بىلىكتىلىگىنىڭ تالاپتارىنا تولىعىمەن جاۋاپ بەرە الادى. ءتيىستى شارالار قابىلدانباسا, سۇرانىس پەن ۇسىنىس اراسىنداعى الشاقتىق ارتا بەرمەك.
قازاقستان ەكونوميكاسىنىڭ دامۋ قارقىنىن شاپشاڭداتىپ, ازاماتتاردىڭ ءومىر ساپاسىن كوتەرۋگە باعىتتالعان «تسيفرلى قازاقستان» باعدارلاماسىن جۇزەگە اسىرۋ اياسىندا مەملەكەتتىك قىزمەتتەردىڭ ەلەكتروندىق فورماتقا ءوتۋى 2020 جىلعا قاراي 80%-دى قۇراۋى ءتيىس. ءبىرىنشى كەزەكتە, اقپاراتتىق-كوممۋنيكاتسيالىق تەحنولوگيالار سالاسىنداعى مامانداردىڭ اسا تاپشى بولۋىنا بايلانىستى قازاقستان بۇل كوزدەگەن ماقساتىنا جەتپەي قالۋى مۇمكىن.
قازىر وزەكتى بولىپ وتىرعان بەس داعدىلارعا اناليتيكتەر اۆتوماتتاندىرۋ جانە روبوتتاندىرۋ, ۇلكەن دەرەكتەردى تالداۋ, جاڭا ساۋلەتتەرگە ءوتۋ (ماسەلەن, بۇلتتىق), موبيلدىلىك جانە نەتۆوركينگ سىندى بىلىمدەردى جاتقىزىپ وتىر. تاياۋ 2-3 جىلدا بىرلەسكەن جۇمىستى جۇرگىزۋ ءۇشىن قوسىمشالاردى قولدانا ءبىلۋ, سونداي-اق, اقپاراتتىق قاۋىپسىزدىك پەن دەرەكتەردى قورعاۋ سالاسىنداعى بىلىمدەر اسا كوكەيتەستى بولا تۇسپەك.
2019 جىلدىڭ ساۋىرىندە ءال-فارابي اتىنداعى قازۇۋ-دە Microsoft-تىڭ ات-اكادەمياسىنىڭ اشىلۋ سالتاناتى ءوتتى. اكادەميا تەحنولوگياعا باعدارلانعان ەكونوميكادا جەتىستىككە جەتۋ ءۇشىن قاجەتتى وقۋ باعدارلامالارىن ۇسىنادى.
ءال-فارابي اتىنداعى قازۇۋ, Satbayev University جانە «Astana IT University» سىندى وقۋ ورىندارىمەن ءوزارا تۇسىنىستىك تۋرالى مەموراندۋمدارعا قول قويىلدى. مامىلەلەردىڭ شارتى «تسيفرلى قازاقستان» مەملەكەتتىك باعدارلاماسىنىڭ مىندەتتەرىن جۇزەگە اسىرۋ اياسىندا ۋنيۆەرسيتەتتەردى تسيفرگە كوشىرۋ جوبالارىن, Microsoft-تىڭ ءبىلىم بەرۋگە ارنالعان وزىق تەحنولوگيالارى مەن شەشىمدەرىن قولدانا وتىرىپ ءبىلىم بەرۋ ۇدەرىسىن دايىنداۋعا باعىتتالعان.
«Microsoft بولاشاق بۋىندى جارقىن تسيفرلىك كەلەشەككە دايىنداۋ ءۇشىن قازاقستاننىڭ ءبىلىم بەرۋ سەكتورىندا باستامالاردى جۇزەگە اسىرىپ جاتىر. قاي ءپاندى الماساق, ات داعدىلارى مەن قۇزىرەتتىلىكتەرىن مەڭگەرۋدىڭ ءرولى ارتىپ كەلە جاتقاندىعى انىق, سوندىقتان ءبىز وسى تەحنولوگيالار مەن قۇرالداردى ءاربىر ازامات ءۇشىن قولجەتىمدى ەتۋگە كومەكتەسىپ جاتىرمىز», - دەپ اتاپ ءوتتى Microsoft قازاقستان ءبىلىم بەرۋ سەكتورىمەن جۇمىس جۇرگىزۋ جونىندەگى باسشىسى نۇرلان جانىبەك.
IDC زەرتتەۋى قازاقستانعا قاتىستى اسا وپتيميستىك باعالاۋ بەرىپ وتىر: قازاقستان IT نارىعىندا ساپالى وزگەرىستەردەن ءوتۋ ءۇشىن بۇكىل قاجەتتى العىشارتتار بار. IDC اناليتيكتەرىنىڭ پىكىرىنشە, نارىقتىڭ وڭ قارقىنمەن دامۋى بيزنەس پەن مەملەكەتتىڭ Iت-ساياساتتا ساپالى وزگەرىستەردى جۇزەگە اسىرۋعا قانشالىقتى دايىن بولۋىمەن بايلانىستى بولماق.
