بيعاش اۋىلىندا بارماق باتىردىڭ قۇرمەتىنە ۆولەيبول ءتۋرنيرى وتكىزىلدى. جوڭعار باسقىنشىلارىنا قارسى كۇرەستە ەرەن ەرلىك كورسەتىپ, ۇلان-عايىر قازاق دالاسىن جاۋدان ازات ەتۋ جولىندا ءومىرىن قۇربان ەتكەن ءباھادۇردى ەسكە الۋ ماقساتىندا بيىل تۇڭعىش رەت ۇيىمداستىرىلعان تۋرنير ەندى جىل سايىن ءداستۇرلى تۇردە وتكىزىلىپ تۇرماق. اۋدان اكىمى اسحات سمايلوۆ جارىستىڭ اشىلۋ سالتاناتىندا وسىلاي دەدى.
ۋاق بارماق باتىر قازاق تاريحىندا وزىندىك ورنى بار تۇلعا. قاراكەرەي قابانباي باتىردىڭ سەنىمدى سەرىگى, قول باستاعان ءباھادۇر. قازاق دالاسىن باسقىنشىلاردان ازات ەتۋ جولىندا ءومىرىن قيعان ۇلت باتىرى.
«باتىر بەيىتى بيعاش اۋىلىنا قاراستى قىزىلبۇلاق اۋماعىندا, كوكپەكتى وزەنىنىڭ جاعاسىندا. ەلىمىزدىڭ بارلىق اۋماعىن مەكەن ەتەتىن ۇرپاقتارى جينالىپ, باتىردىڭ باسىنا قۇلپىتاس, اۋدان ورتالىعىنا كەۋدەمۇسىن ورناتتى. 2017 جىلى اۋدان ورتالىعىندا بارماق باتىردى ەسكە الۋعا ارنالعان فۋتبول ءتۋرنيرى وتكىزىلدى. اعىمداعى جىلى قوعام بەلسەندىلەرى تاراپىنان تولاعاي اۋىلىنداعى نەگىزگى مەكتەپ پەن اۋدان ورتالىعىنداعى ءبىر كوشەگە ەسىمىن بەرۋ جونىندە ۇسىنىستارىن ايتتى. اۋدان اكىمى اسحات سمايلوۆتىڭ تىكەلەي مۇرىندىق بولۋىمەن وتكىزىلىپ وتىرعان ۆولەيبول ءتۋرنيرى باتىر بابانىڭ ەسىمى ۇرپاق جادىندا ماڭگىلىك جاڭعىرىپ, ۇمىتىلىپ قالمايتىنىن انىق كورسەتەدى. 1992 جىلدان بەرى قاڭىراپ بوس تۇرعان بيعاش مەكتەبىنىڭ سپورت زالى بيىل قايتا جوندەۋدەن وتكىزىلىپ, سوڭعى 30 جىلداعى العاشقى ۇلكەن شارانىڭ بارماق باتىر رۋحىنا ارنالعانى كوپ نارسەنى اڭعارتادى.
ءتۋرنيردى ۇيىمداستىرۋ جۇمىستارىنىڭ باسىندا سپورت ءبولىمىنىڭ باسشىسى ەرجان كارىباەۆ, تاجىريبەلى مامان ءسابيت تەمىرحانوۆ, جاتتىقتىرۋشى التاي ماقسۇت ۇلى, ءبىلىم ءبولىمىنىڭ مامانى تالعات قاساينوۆ ءجۇردى. مەكتەپ ۇجىمى دا ەرەكشە ازىرلەنىپتى. اۋىلداعى ءاربىر شارانىڭ الدىڭعى شەبىنەن تابىلاتىن ارداگەر قادىر سەمباي ۇلى بۇل جولى دا بەلسەندىلىك تانىتتى. سايىس قورىتىندىسىندا ساقا ويىنشى كارىم باستاعان سامارلىق جاس ۆولەيبولشىلار بارماق باتىر ءتۋرنيرىنىڭ جەڭىمپازى اتاندى. اققالا قۇراماسى 2 ورىندى مىسە تۇتتى. كوكجايىق قۇراماسى 3 ورىندى ولجالادى» دەيدى اۋداندىق «جۇلدىز» گازەتىنىڭ رەداكتورى دارحان بەردىبەك.
شىعىس قازاقستان وبلىسى,
كوكپەكتى اۋدانى
