سەنات توراعاسى وتىرىس بارىسىندا بيۋرو مۇشەلەرىنە ءبىلىم بەرۋ, دەنساۋلىق ساقتاۋ جۇيەلەرىن تسيفرلاندىرۋ مەن اۋىلدارداعى ينتەرنەت ماسەلەلەرىن شەشۋدى تاپسىردى. داريعا نازارباەۆانىڭ ايتۋىنشا, قازىر ايماقتاردا ينتەرنەت جوق جانە ول مۇعالىمدەر جۇكتەمەسىن ۇلعايتادى دەگەن سىلتاۋمەن «كۇندەلىك» ەلەكتروندىق كۇندەلىگى سەرۆيسىنىڭ جۇمىسى شەكتەلە باستادى. ء«اربىر جەكەلەگەن جاعدايدىڭ شەشىمىن ىزدەستىرۋ كەرەك. اكىمدىكتەر مەن جەرگىلىكتى ءبىلىم باسقارمالارىنا ەلەكتروندى كۇندەلىك نەگە ءتيىمسىز؟ ويتكەنى ول بارلىق ءبىلىم بەرۋ, تەستىلەۋ, ساباققا قاتىسۋ, ساباق وتكىزۋ جۇيەسىن اشىق كورسەتەدى. «كۇندەلىك» بارلىق ساباقتاردىڭ بولاتىنىن الدە قاعازدا عانا قالاتىنىن انىقتاپ بەرەدى. بۇگىنگى كۇنى ەلەكتروندى كۇندەلىك وقۋشىلاردىڭ ۇلگەرىم دەڭگەيىن, مۇعالىمدەردىڭ وزدەرىنىڭ دايىندىعىن – وسىنىڭ ءبارىن كورسەتىپ وتىر. بۇل ولارعا ءتيىمسىز», دەدى د.نازارباەۆا.
سەنات توراعاسى سونداي-اق اۋىلدىق نىساندارعا, ونىڭ ىشىندە الەۋمەتتىك ينفراقۇرىلىم وبەكتىلەرىنە جوعارى جىلدامدىقتاعى ينتەرنەت جۇرگىزۋ ءۇشىن اكىمدىكتەرگە بولىنگەن قاراجاتتى يگەرۋدى تەكسەرۋ قاجەتتىگى تۋرالى دا ايتتى.
داريعا نازارباەۆا ينتەرنەت تاريفتەرىنە دە نازار اۋداردى. ء«بىزدىڭ مەديتسينالىق مەكەمەلەر مەن جالپى ءبىلىم بەرۋ مەكەمەلەرىنە ينتەرنەت تاريفتەرى نەگە ءبىر ەسە جوعارى, ال جىلدامدىعى نەگە ءبىر ەسە تومەن؟ «قازاقتەلەكوم» جىل سايىن وسى ماقساتتارعا مەملەكەتتەن سۋبسيديا العاننىڭ وزىندە وسىنداي. مۇنىڭ دا ءتۇيىنىن شەشۋ كەرەك», - دەدى ول.
سەنات توراعاسى وتىرىستى قورىتىندىلاي كەلىپ, دەپۋتاتتاردىڭ ەل ايماقتارىنا الداعى ساپارىنا توقتالدى. «مەنىڭ ويىمشا, ايماق باسشىلارى سيرەك باراتىن ەڭ شالعاي ەلدى مەكەندەردە بولعان جاقسى. وسى ساپارلار كەزىندە دەپۋتاتتاردىڭ نەگىزگى ماقساتى سايلاۋشىلاردىڭ اماناتتارىن جيناۋ جانە ازاماتتاردىڭ وزەكتى ماسەلەلەرىن شەشۋ بولۋى ءتيىس. جاڭا جىلدا سەناتتا وڭىرلەر كۇندەرىن وتكىزۋدى جوسپارلاپ وتىرمىز, ول اقپارات بىزگە وتە قاجەت بولادى», دەدى جوعارعى پالاتا باسشىسى.
