قارا ءسوزدىڭ حاس شەبەرىنىڭ بىلتىر لوندوندا اعىلشىن تىلىندە جارىق كورگەن كىتابىنىڭ ءبىر داناسى دا زالدىڭ تورىنەن ورىن الىپتى. ادەبي زالدىڭ اشىلۋ سالتاناتىندا قوناقتارعا كىتاپحانا سايتىنداعى «ورالحان بوكەي الەمى» پاراقشاسى تانىستىرىلدى. كىتاپحانا ديرەكتورى حابيبا اقجىگىتوۆانىڭ ايتۋىنشا, ورالحان بوكەيگە قاتىستى بارلىق مالىمەتتەردى, جازۋشىنىڭ كىتاپتارىن, ايتقان سوزدەرىن, جازعان كۇندەلىكتەرىن, قالامگەر جايىنداعى ەستەلىكتەردى, ماقالالاردى, فيلمدەردى, عىلىمي جۇمىستاردى وسى پاراقشادان كورۋگە بولادى.
«جازۋشىنىڭ الەمنىڭ وزگە تىلدەرىنە اۋدارىلعان شىعارمالارىن دا سايتتان تابا الاسىزدار. ادەبي زالعا, جاڭادان اشىلعان سايتتاعى پاراقشاعا ماتەريالدار نەبارى 3 ايدىڭ ىشىندە جينالدى. مۇنى ءالى دە تولىقتىراتىن بولامىز. الداعى ۋاقىتتا جازۋشى اتىنداعى ادەبي زالدا ءارتۇرلى كەزدەسۋلەر, شىعارماشىلىق كەشتەر جانە تاعى باسقا دا شارالار ۇيىمداستىرامىز. اي سايىن وسى جەردە ورالحان بوكەيدىڭ ءبىر شىعارماسىن تالقىلاپ وتىرۋ جوسپارىمىزدا بار. ءسوزدىڭ ورايى كەلگەندە ادەبي زالدى كەرەك-جاراقتارمەن جابدىقتاۋعا كومەكتەسكەن كاسىپكەر عاني شايماردانوۆقا, «كازتسينك» جانە «ورەول LTD» كاسىپورىندارىنا العىسىمدى جەتكىزگىم كەلەدى», دەيدى ول.
ادەبي زالدىڭ اشىلۋىنا شاھارداعى زيالى قاۋىم وكىلدەرىمەن بىرگە جازۋشىنىڭ قارىنداسى عاليا بوكەيقىزى مەن وسكەمەن قالاسىنىڭ اكىمى جاقسىلىق ومار قاتىسىپ, ورالحان بوكەيدىڭ ادەبي زالىنىڭ اشىلۋى شاھاردىڭ مادەني ومىرىندەگى ايتۋلى جاڭالىق ەكەندىگىن اتاپ ءوتتى. عاليا بوكەيقىزى ءسوز اراسىندا قازىرگى ۋاقىتتا قاراۋسىز تۇرعان كاتونقاراعاي اۋدانىنىڭ شىڭعىستاي اۋىلىنداعى ورالحان بوكەيدىڭ مۋزەيى الداعى ۋاقىتتا نازاردان تىس قالمايتىنىن, وسى ورايدا «ورالحان بوكەي ءۇيى» اتتى حالىقارالىق قور قۇرىلىپ جاتقانىن جەتكىزدى.
