باقىتجان ساعىنتاەۆ «ەركىن ميكروفون» فورماتىندا المالى اۋدانىنىڭ تۇرعىندارىمەن ەكىنشى مارتە كەزدەسۋىن وتكىزدى. اعىمداعى جىلدىڭ 28 تامىزىندا وتكەن العاشقى كەزدەسۋدە اكىم تۇرعىنداردىڭ جۇزگە جۋىق سۇراقتارىنا جاۋاپ بەرىپ, شەشىلۋ جولدارىنا قاتىستى دەرەكتەرمەن بولىسكەن بولاتىن.
قالا اكىمدىگىنىڭ ءباسپاسوز قىزمەتى مالىمەتى بويىنشا, 1932 جىلى قۇرىلعان المالى اۋدانى مادەني جانە قوعامدىق ءومىردىڭ تاريحي ورتالىعى بولىپ سانالادى. اۋداندا سۋمەن, جىلۋمەن, كارىزبەن جانە ەلەكترمەن قامتاماسىز ەتۋ ماسەلەسى تولىق شەشىلگەن دەگەنمەن ۋربانيستيكا جانە جايلى ورتا ماسەلەلەرى ءالى دە وزەكتى بولىپ تابىلادى.
اۋداندا تاعى 18 كم تروتۋار سالۋ جانە حالىقتىڭ مۇمكىندىگى شەكتەۋلى توبى ءۇشىن 28 كم جولدى رەكونسترۋكتسيالاۋ قاجەت. 26 ۋچاسكە ماڭىنا سىرتقى جارىق ورناتىلادى, سونىمەن قاتار 49 اۋلا ايماعى مەن 68 كوشەگە قوسىمشا جارىق بەرىلەدى.
پوليتسيانىڭ جاڭا سەرۆيستىك جۇمىسىنىڭ ارقاسىندا اۋداندا ادامدار كوپ جينالاتىن ورىندار مەن ستيحيالى ساۋدا ۋچاسكەلەرىنە پوليتسيانىڭ ءۇش ءمودۋلدى پوستىسى قويىلدى, ولاردىڭ كومەگىنە 175 تۇرعىن جۇگىنگەن.
2016-2017 جىلدارى جوندەلگەن اۋلا ىشىندەگى ايماقتارداعى بالالار جانە سپورت الاڭدارىن قايتا قالپىنا كەلتىرۋ قيىنعا سوعۋدا. سول كەزدە سالىنعان 221 اۋلاداعى سپورت جانە ويىن الاڭدارى كەلەر جىلى جوندەلەدى. اۋداندا كەلەر جىلى 192 اۋلا جوندەلەدى, قالعان 52 اۋلا 2021 جىلى جاڭارادى.
جەكە ينۆەستورلاردىڭ كومەگىمەن ەسكى ۇيلەردىڭ پروبلەماسى شەشىلۋدە, اعىمداعى جىلى اۋداندا 7 ەسكى ءۇي سۇرىلگەن, 52 وتباسى باسپاناسىن جاقسارتقان. جالپى, وسى ماسەلەنى ۇتىمدى شەشۋ ءۇشىن قالالىقتاردىڭ بەلسەندىلىك تانىتۋلارى جانە ينۆەستور ۇسىنعان نۇسقا بويىنشا ءبىراۋىزدان شەشىم قابىلداعاندارى ءجون.
وقۋشى ورنىنىڭ تاپشىلىعىن جويۋ ءۇشىن رايىمبەك داڭعىلى مەن تىلەنديەۆ كوشەسى بويىندا 1000 ورىندى مەكتەپ سالۋ جوسپارلانعان. ايتا كەتەرلىگى, كەلەر جىلى №144 مەكتەپ-گيمنازيا جانىنان قوسالقى نىسان سالۋ ءۇشىن قۇجاتتار ازىرلەنۋدە.
كەزدەسۋدە پيك-تەردىڭ جۇمىسىنا جانە «الماتىتەلەكوم» كومپانياسىنىڭ بايلانىس قىزمەتىنە كوپ شاعىم ايتىلدى. دەگەنمەن, تۇرعىندار ەكولوگيا مەن جاسىلداندىرۋدى جاقسارتۋ, ونىڭ ىشىندە شىرشا باعىن ءبولۋ بويىنشا ۇسىنىستارىن ايتتى. سونىمەن قاتار, تۇرعىندار كوشەلەردەگى قوقىس جاشىكتەرىنىڭ ازدىعىنا, پاركتەر مەن كوڭىل كوتەرەتىن ورىنداردا قاۋىپسىزدىكتى قامتاماسىز ەتۋگە نازار اۋداردى.
اۋدان تۇرعىندارىن قوعامدىق كولىكتىڭ جۇمىسى دا تولعاندىرادى. الماتى اكىمى ب. ساعىنتاەۆ اۆتوبۋستار تاپشىلىعى قالا جانە جەكە اۆتوپاركتەر ەسەبىنەن تولىعاتىنىن اتاپ ءوتتى. تروللەيبۋستار قوزعالىسىنا دا ەش شەكتەۋ بولمايتىنىن ايتقان ب. ساعىنتاەۆ كەلەسى جىلى بايلانىس جەلىلەرى مەن ينفراقۇرىلىمىنىڭ جاڭاراتىنىن ايتتى. كەزدەسۋ بارىسىندا اكىم تۇرعىنداردى قالا ءومىرىن جاقسارتۋعا بەلسەندى بولۋعا شاقىردى.
