«ساحناگەر - 2019» ۇلتتىق تەاتر سىيلىعىمەن ماراپاتتاۋ شاراسىنا ورال تەاترىنان ءۇش ادام شاقىرىلعان بولاتىن. سونىڭ ءبىرى – ۇجىمنىڭ ارداگەرى, قازاق سسر-ءى مەملەكەتتىك سىيلىعىنىڭ لاۋرەاتى, قازاقستاننىڭ ەڭبەك سىڭىرگەن ءارتيسى, كۇنى كەشە عانا پرەزيدەنت جارلىعىمەن «پاراسات» وردەنىمەن ماراپاتتالعان سەردەش قاجىمۇراتوۆ «تەاتر ونەرىنىڭ دامۋىنا قوسقان ەرەكشە ۇلەسى ءۇشىن» نوميناتسياسى بويىنشا ماراپاتتالىپ, 500 مىڭ تەڭگەلىك سەرتيفيكاتقا يە بولدى.
ال «ەڭبەك داڭقى» توسبەلگىسىنىڭ يەگەرى ەرجان قاجىموۆتى شارانى ۇيىمداستىرۋشىلار ەلىمىزدەگى «ەڭ ۇزدىك دىبىس رەجيسسەرى» دەگەن اتاققا لايىق كورىپ, 1 ميلليون تەڭگەلىك سىياقىمەن ماراپاتتادى. ال بولاشاعىنان ءۇمىت كۇتتىرەتىن جاستارعا بەرىلەتىن ء«ۇمىت» سىيلىعى (150 مىڭ تەڭگە) «ونەر سالاسىنىڭ ۇزدىگى» توسبەلگىسىنىڭ يەگەرى نارگيز شادىەۆاعا بۇيىردى.
ەلىمىزدىڭ ەڭ ۇلىق مەرەكەسى – تاۋەلسىزدىك مەيرامى تۇسىندا ەلوردادا ەلەنىپ, جوعارى جۇلدەگە يە بولعان ارىپتەستەرىن حاديشا تەاترىنىڭ ۇجىمى اۋەجايدان سالتاناتپەن قارسى الدى. ايتا كەتەرلىك ءجايت – ورال تەاترى تۇڭعىش قويىلىمىن 1993 جىلى ءدال وسى تاۋەلسىزدىك مەرەكەسى تۇسىندا كورەرمەنگە ۇسىنعان بولاتىن.
باتىس قازاقستان
