ۇكىمەت • 19 جەلتوقسان، 2019

ۇكىمەت دەنساۋلىق ساقتاۋدى دامىتۋدىڭ 2020-2025 جىلدارعا ارنالعان مەملەكەتتىك باعدارلاماسىن بەكىتتى

153 رەت كورسەتىلدى

پرەمەر-مينيستر اسقار ءماميننىڭ توراعالىعىمەن وتكەن ۇكىمەت وتىرىسىندا دەنساۋلىق ساقتاۋ سالاسىن دامىتۋدىڭ 2016-2019 جىلدارعا ارنالعان «دەنساۋلىق» مەملەكەتتىك باعدارلاماسىن ىسكە اسىرۋ قورىتىندىلارى جانە 2020-2025 جىلدارعا ارنالعان جوباسى قارالدى. بۇل تۋرالى پرەمەر-ءمينيستردىڭ ءباسپاسوز قىزمەتى حابارلادى.

دەنساۋلىق ساقتاۋ ءمينيسترى ە. ءبىرتانوۆ وتكەن كەزەڭدە قول جەتكىزىلگەن ناتيجەلەر جانە جاڭا مەملەكەتتىك باعدارلامانىڭ نەگىزگى باعىتتارى تۋرالى، ۇلتتىق عىلىمي كارديوحيرۋرگيالىق ورتالىقتىڭ باسقارما توراعاسى يۋ. پيا مەديتسينالىق قاۋىمداستىقتىڭ پوزيتسياسى تۋرالى باياندادى. 

3 جىل ىشىندە «دەنساۋلىق» مەملەكەتتىك باعدارلاماسىن ىسكە اسىرۋعا شامامەن 513 ملرد تەڭگە ءبولىندى. ەلىمىزدە نەگىزگى مەديتسينالىق-دەموگرافيالىق كورسەتكىشتەر جاقساردى، ورتاشا ءومىر ءسۇرۋ ۇزاقتىعى 73 جاسقا جەتتى.

«تۇڭعىش پرەزيدەنت – ەلباسى نۇرسۇلتان ءابىش ۇلى نازارباەۆ مەديتسينالىق كومەكتىڭ ساپاسىن جاقسارتۋ، العاشقى مەديتسينالىق-سانيتاريالىق كومەككە جۇمسالاتىن شىعىستاردى 60%-عا دەيىن ۇلعايتۋ بويىنشا ناقتى تاپسىرمالار بەردى. مەملەكەت باسشىسى قاسىم-جومارت كەمەل ۇلى توقاەۆ اۋرۋلاردىڭ الدىن الۋ جانە سالاۋاتتى ءومىر سالتىن ناسيحاتتاۋ بويىنشا شارالار قابىلداۋدى، مەديتسينالىق ۇيىمداردىڭ قادامدىق قولجەتىمدىلىگىن قامتاماسىز ەتۋدى تاپسىردى»، دەدى ا. مامين.

ۇكىمەت باسشىسى جاڭا مەملەكەتتىك باعدارلاما اياسىندا حالىقتى سالاۋاتتى ءومىر سالتىنا بەيىمدەۋ ءۇشىن قوعامدىق دەنساۋلىق ساقتاۋ قىزمەتى جاڭعىرتىلاتىنىن اتاپ ءوتتى. جالپى سالاۋاتتى ءومىر سالتى مادەنيەتىن قالىپتاستىرۋعا باعىتتالعان شارالاردى كەڭەيتۋ جوسپارلانعان. 

«مەديتسينالىق كومەك ساپاسىن ارتتىرۋ، دەنساۋلىق ساقتاۋدىڭ بىرىڭعاي تسيفرلىق كەڭىستىگىن قۇرۋدى اياقتاۋ بويىنشا شارالار قابىلدانادى. ول ءۇشىن اۋرۋلاردى ەرتە انىقتاۋعا ىنتالاندىرۋ ماقساتىندا ەمحانالار مەن اۋرۋحانالاردى قارجىلاندىرۋ جەتىلدىرىلەدى»، دەدى ا. مامين. 

پرەمەر-مينيستر بارلىق وڭىرلەردە مەديتسينالىق قىزمەت كورسەتۋدىڭ جاڭا تەحنولوگيالارى ەنگىزىلىپ جاتقان العاشقى مەديتسينالىق كومەك كورسەتۋدىڭ وزىق تاجىريبە ورتالىقتارىن دامىتۋ جالعاساتىنىن اتاپ ءوتتى. 

مەديتسينا قىزمەتكەرلەرىنىڭ ستاتۋسىن ارتتىرۋ ءۇشىن مەديتسينالىق كادرلىق رەسۋرستاردىڭ ۇلتتىق جۇيەسى قۇرىلادى.

«دارىگەرلەر مەن مەيىربيكەلەردىڭ جالاقىسى ورتا ەسەپپەن 2 ەسە ارتىپ، ولاردى الەۋمەتتىك قولداۋ شارالارى كۇشەيتىلەدى، سونداي-اق كاسىبي جاۋاپكەرشىلىك شارالارى دا كۇشەيتىلەدى. جالپى ءبىر دارىگەردىڭ جۇكتەمەسى ەكونوميكالىق ىنتىماقتاستىق جانە دامۋ ۇيىمىنىڭ دەڭگەيىنە دەيىن ازايادى (1500 ادامعا 1 دارىگەر)»، دەدى ا. مامين. 

ۇكىمەت باسشىسى مەديتسينا سالاسىنداعى ينۆەستيتسيالىق احۋالدى تۇبەگەيلى جاقسارتۋ جانە جوبالىق باسقارۋدى ەنگىزۋ جوسپارلارىن اتاپ ءوتتى.

«العاش رەت سالاعا 2،8 ترلن تەڭگە قارجى ءبولۋ جوسپارلانعان، سونىڭ ىشىندە، 2،2 ترلن جەكە ينۆەستيتسيالار. وسى قاراجات ەسەبىنەن 431 دەنساۋلىق ساقتاۋ وبەكتىسى سالىنادى، ونىڭ ىشىندە 10 مىڭ ورىنعا ارنالعان، حالىقارالىق دەڭگەيدەگى 19 كوپسالالى اۋرۋحانا مەملەكەتتىك-جەكەشەلىك ارىپتەستىك مەحانيزمى ارقىلى سالىنادى. بۇل اۋرۋحانالارداعى ەمدەۋ ورىندارىن 50%-عا ۇلعايتۋعا، مەديتسينالىق نىساندارىنىڭ توزۋىن 56%-دان 38%-عا دەيىن ازايتۋعا مۇمكىندىك بەرەدى»، دەدى ا. مامين.

پرەمەر-مينيستر وسى شارالاردىڭ بارلىعى مەديتسينالىق ينفراقۇرىلىمدى جاقسارتۋعا جانە اۋرۋ-سىرقاۋدىڭ دەڭگەيىن ازايتۋعا جانە قازاقستاندىقتاردىڭ ورتاشا ءومىر ءسۇرۋ ۇزاقتىعىن 2025 جىلعا قاراي 75 جاسقا دەيىن جەتكىزۋگە ىقپال ەتەتىنىن اتاپ ءوتتى.

سوڭعى جاڭالىقتار

ۇقساس جاڭالىقتار