«جاڭا اكىمنىڭ الدىنا ءوڭىردىڭ الەۋمەتتىك-ەكونوميكالىق دامۋى بويىنشا ماڭىزدى مىندەتتەر قويىلدى. تۇڭعىش پرەزيدەنت – ەلباسى نۇرسۇلتان ءابىش ۇلى نازارباەۆ پەن مەملەكەت باسشىسى قاسىم-جومارت كەمەل ۇلى توقاەۆ اتىراۋ وبلىسىنىڭ دامۋىنا ەرەكشە كوڭىل ءبولىپ وتىر, ماحامبەت جولداسعالي ۇلىنىڭ زور سەنىمدى اقتايتىنىنا سەنەمىن», دەدى ا. مامين.
پرەمەر-مينيستر بۇرىنعى اكىم نۇرلان نوعاەۆقا اتقارعان جۇمىسى ءۇشىن العىس ءبىلدىرىپ, جاڭا قىزمەتىندە تابىس تىلەدى.
ماحامبەت دوسمۇحامبەتوۆ - 1960 جىلى 25 جەلتوقساندا گۋرەۆ قالاسىندا (قازىرگى اتىراۋ) دۇنيەگە كەلگەن. ي. م. گۋبكين اتىنداعى ماسكەۋ مۇناي جانە گاز ينستيتۋتىن «گەولوگيا جانە مۇناي, گاز كەن ورىندارىن بارلاۋ» ماماندىعى بويىنشا جانە قازاق مەملەكەتتىك زاڭ ۋنيۆەرسيتەتىن «ىسكەرلىك اكىمشىلەندىرۋ ماگيسترى» ماماندىعى بويىنشا بىتىرگەن.
ەڭبەك جولىن 1983 جىلى «ەمبىمۇناي» بىرلەستىگىنىڭ بالىقشى بارلاۋ بۇرعىلاۋ باسقارماسىنىڭ گەولوگى بولىپ باستاعان.
ءتۇرلى جىلدارى «ەمبىمۇناي» ءوب, «مۇناي» بك, «ەمبىمۇنايگاز» گەولوگى, «قازاقويل» ۇمك جاق گەولوگيا دەپارتامەنتىنىڭ ديرەكتورى بولىپ جۇمىس ىستەدى, «قازمۇنايگاز» ۇك اق, «قازگەرمۇناي» بك, «ماڭعىستاۋمۇنايگاز» اق گەولوگيا دەپارتامەنتتەرىن باسقاردى. 2013 جىلدىڭ قىركۇيەك ايىنان 2015 جىلدىڭ قاڭتار ايى ارالىعىندا «ەمبىمۇنايگاز» اق باس ديرەكتورى, باسقارما توراعاسى قىزمەتىن اتقاردى, 2015 جىلدىڭ قاڭتارىنان 2016 جىلدىڭ قاراشا ايى ارالىعىندا – «قازمۇنايگاز» ۇك اق ءىرى جوبالار بويىنشا باسقارما توراعاسىنىڭ ورىنباسارى.
2016 جىلدىڭ قاراشا ايىنان باستاپ وسى ۋاقىتقا دەيىن قازاقستان رەسپۋبليكاسىنىڭ ەنەرگەتيكا مينيسترلىگىنىڭ ءبىرىنشى ورىنباسارى لاۋازىمىندا بولدى.
