جەكە تۇلعالار مەن جەكە كاسىپكەرلەردىڭ سالىق تولەۋ پروتسەسىن جەڭىلدەتۋ ءۇشىن جۇرگىزىلگەن جۇمىس ناتيجەسىندە 2020 جىلدىڭ 1 قاڭتارىندا «سالىق ءاميانى» تەتىگى ىسكە قوسىلادى. بۇل – ءبىر شوتتان تولەم قابىلداۋ جانە وڭدەۋ قىزمەتى, سالىق تولەۋشىنىڭ ءوتىنىشىنسىز ونلاين رەجىمدە ەسەپكە الۋ جۇيەسى. ءىس-شارا بارىسىندا «سالىق ءاميانىنىڭ» جۇمىسىمەن قارجى ۆيتسە-ءمينيسترى رۋسلان ەڭسەباەۆ تانىستىردى.
«كوپتەگەن ازامات سالىق تولەۋدە قيىندىقتارعا تاپ بولادى. مىسالى, سالىق تولەۋشى وزىنە قاجەت مىڭنان استام دەرەكتەمەنىڭ تورتەۋىن – بسك, ستك, بەنەفيتسياردىڭ بسن جانە سوماسىن كورسەتۋى كەرەك ەدى. ولاردىڭ بىرەۋىنىڭ دۇرىس كورسەتىلمەۋى بيۋدجەتكە تولەمنىڭ دۇرىس اۋدارىلماۋىنا, سايكەسىنشە ايىپپۇل مەن وسىمپۇلعا سەبەپ بولاتىن. ەندى قارجى مينيسترلىگىنىڭ جۇيەلى جۇمىسىنىڭ ارقاسىندا سالىقتى بالاما تۇردە «سالىق ءاميانىن» تولتىرۋ ارقىلى تولەۋگە بولادى. بۇل قىزمەت سالىق تولەۋشىگە ونىڭ اعىمداعى جانە الداعى بيۋدجەتتىك مىندەتتەمەلەرى تۋرالى اقپارات بەرەدى. سالىق تولەۋدىڭ دەرەكتەمەلەرى سالىق تولەۋشى كورسەتپەي-اق اۆتوماتتى تۇردە تولتىرىلادى, بۇل سالىقتىڭ كەپىلدى جەتكىزىلۋىن قامتاماسىز ەتەدى», دەدى ر.ەڭسەباەۆ.
«سالىق ءاميانىنىڭ» ءموبيلدى نۇسقاسى مەملەكەتتىك كىرىستەر كوميتەتىنىڭ e-Salyq ءموبيلدى قوسىمشاسىنىڭ پلاتفورماسىندا جۇمىس ىستەيدى. egov.kz پورتالىندا, جەلتوقسان ايىنىڭ سوڭىنان باستاپ «قازاقستان حالىق بانكى» اق ءموبيلدى قوسىمشاسىندا, 2020 جىلدان باستاپ Kaspi.kz ءموبيلدى قوسىمشاسىنا دا ەنگىزىلەتىن بولادى.
قارجى مينيسترلىگى ءمان بەرىپ وتىرعان باسىمدىقتاردىڭ ءبىرى – قوعام مەن بيزنەستى ساپالى مەملەكەتتىك قىزمەتتەرمەن قامتاماسىز ەتۋ جانە بارىنشا اشىق قىزمەت ەتۋ. وسىعان وراي «تسيفرلى قازاقستان» مەملەكەتتىك باعدارلاماسى اياسىندا قىزمەتتەردى Open API فورماتىنا ەنگىزۋ, سونىمەن قاتار سالىق تولەۋ ءتارتىبىن جەڭىلدەتەتىن قىزمەتتەردى قۇرۋ بويىنشا كوپتەگەن جۇمىستار اتقارىلۋدا.
بۇگىنگى تاڭدا ەلەكتروندى مەملەكەتتىك ساتىپ الۋ ۆەب-پورتالى ارقىلى مالىمەتتەردى بەرۋ بويىنشا 60-تان استام مەملەكەتتىك قىزمەت ەنگىزىلدى. «ەلەكتروندى قارجى ورتالىعى» اق باسقارما توراعاسىنىڭ ورىنباسارى دارحان ءبىرجانوۆ ەلەكتروندى مەملەكەتتىك ساتىپ الۋ پورتالىنىڭ جانە «اشىق بيۋدجەت» قىزمەتتەرىنىڭ بىرىڭعاي قىزمەتى تۋرالى ايتتى.
«قازىر ەلەكتروندى مەملەكەتتىك ساتىپ الۋ پورتالىنا 160-تان استام ۇيىم تىركەلگەن. جۇيەدە تاپسىرىس بەرۋشىلەردىڭ تاۋار جەتكىزۋگە, جۇمىسقا, قىزمەتكە سۇرانىسى, ساتىپ الۋ پروتسەدۋرالارى, ەلەكتروندى كەلىسىمشارتتار جاساۋ جانە ولاردىڭ ورىندالۋى تۋرالى مالىمەتتەر جاريالانادى», دەدى د.ءبىرجانوۆ.
قازىرگى ۋاقىتتا ەكىنشى دەڭگەيلى بانكتەر, IT-نارىق وكىلدەرى وسى API قىزمەتتەرىنە قول جەتكىزدى. ولار API دەرەكتەرىنە نەگىزدەلگەن جەكە جانە زاڭدى تۇلعالاردىڭ قارجى مينيسترلىگىنىڭ قۇرىلىمدىق بولىمشەلەرىمەن ءوزارا ارەكەتتەسۋىن جەڭىلدەتۋگە كومەكتەسەتىن جاڭا قىزمەتتەر ۇسىنباق.
