ۇمىتكەرلەردى ىرىكتەۋ ءتورت كەزەڭدە وتكىزىلدى. ولار اسكەري بولىمدەر مەن مەكەمەلەردە, وڭىرلىك قولباسشىلىقتار مەن اسكەر تەكتەرىندە, اسكەر تۇرلەرى مەن قارۋلى كۇشتەر اۋقىمىندا. جاۋىنگەرلىك ەڭبەكتەرى «اسكەر تارلانى» جۇلدەسىنە لايىقتى دەپ تانىلعان اسكەري قىزمەتشىلەر ەلىمىزدىڭ ءتۇرلى وڭىرلەرىنەن تاڭدالىنىپ الىنعان.
سونىمەن قاتار ىرىكتەۋ كەزىندە جاۋىنگەرلىك دايارلىق بويىنشا اي سايىنعى باقىلاۋ ساباقتارىنىڭ, باقىلاۋ جانە قورىتىندى تەكسەرۋلەردىڭ ناتيجەلەرى, اسكەري قىزمەتشىنىڭ جاۋىنگەرلىك جانە مەملەكەتتىك-قۇقىقتىق دايارلىق ءىس-شارالارىنا بەلسەندى قاتىسۋى, ونىڭ قىزمەتتىك سيپاتتاماسى, تارتىپتىك جازالاردىڭ جانە اكىمشىلىك قۇقىق بۇزۋشىلىقتاردىڭ بولماۋى, مورالدىق-ىسكەرلىك قاسيەتتەرى, سونداي-اق پسيحولوگيالىق تۇراقتىلىق دەڭگەيى ەسكەرىلدى.
18 اسكەري ماماندىق بويىنشا ۇزدىك اسكەري قىزمەتشىلەر انىقتالدى. ءبىر جۇلدە وتكەن جىلى جاۋىنگەرلىك دايارلىق ناتيجەلەرىندە ەڭ جوعارعى ناتيجەگە قول جەتكىزگەن كىشى سەرجانت ەسبولات ۋسناتدينوۆقا بەرىلدى.
اسكەري قىزمەتشى جاۋىنگەرلىك ماشينا ەكيپاجىن باسقارىپ, ءوزىنىڭ قىزمەتتەستەرىنە ۇلگى بولا الادى. ۇزدىك ۇشقىش ارميا حالىقارالىق ويىندارىنىڭ بىرنەشە مارتە جەڭىمپازى, اۋقىمدى وقۋ-جاتتىعۋلاردىڭ قاتىسۋشىسى اۆياتسيالىق ەسكادريليا كومانديرى مايور ەرمەك مۇحانوۆ اتاندى.
سوڭعى ۋاقىتتا اسكەري-تەڭىز كۇشتەرىندە بولىمشەسى الدىڭعى قاتاردا كورىنگەن مينالىق-تارتقىش كورابلدىڭ كومانديرى 3-ءشى دارەجەلى كاپيتان مەدەت سۇلتانوۆ ۇزدىك تەڭىزشى جۇلدەسىنە يە بولدى. قازاقستاندىق اسكەردە ۇزدىك مەرگەن اتاعى, تۇراقتى تۇردە حالىقارالىق سايىستار مەن وقۋ-جاتتىعۋلارىندا ءوزىنىڭ شەبەرلەگىن دالەلدەپ جۇرگەن سەرجانت بەكتوراز نۇرسۇلتانعا بەرىلدى. بارلاۋ-ىزدەستىرۋ ارەكەتتەرىن شەبەر مەڭگەرگەن جانە قول استىنداعىلاردى ۇيرەتە بىلگەن 3-ءشى سىنىپتى سەرجانت ءازيز سىندارقۇلوۆ ۇزدىك بارلاۋشى دەپ تانىلدى.
بىتىمگەرشىلىك ميسسيا قۇرامىندا بەيبىتشىلىك پەن قاۋىپسىزدىكتى قولداۋ بويىنشا مىندەتتەردى ۇلگىلى ورىنداعانى ءۇشىن «جىل بىتىمگەرى» نوميناتسياسى بويىنشا كاپيتان ارمان تاستانبەكوۆ جەڭىمپاز اتاندى. ول چەحيا مەن ءۇندىستاندا بىتىمشىلەردى دايارلاۋ كۋرسىنان ءوتتى, بۇۇ-نىڭ ليۆان ميسسياسىنا جىبەرەر الدىندا ءۇشىنشى قازاقستاندىق بىتىمگەرشىلىك روتاسىن دايىنداۋعا قاتىستى, بەيبىتشىلىك پەن حالىقارالىق ىنتىماقتاستىقتى نىعايتۋعا قوسقان ۇلەسى ءۇشىن ماراپاتتارى بار.
اۋماقتى مينادان تازارتۋعا بايلانىستى, بىلگىر جانە جانكەشتى ارەكەتى ءۇشىن ۇزدىك ساپەر رەتىندە ينجەنەلىك-ساپەرلىك ۆزۆودتىڭ اعا سەرجانتى جانىبەك بەكجانوۆ تانىلدى. جاۋىنگەرلىك دايارلىق پەن تاپسىرىلعان قارۋ-جاراقتىڭ جاۋاپتى ساقتاعانى ءۇشىن سەرجانت ەلدار تۇراقبايدىڭ ەڭبەگى جوعارى باعالاندى. قارۋ-جاراق كومانديرى ۇزدىك ارتيللەريست دەپ تانىلدى.
ەڭ ۇزدىك بايلانىسشى ارميالىق حالىقارالىق ويىنداردىڭ «سەنىمدى قابىلداۋ» بايقاۋىنىڭ جەڭىمپازى, راديوپەلەنگاتسيا بويىنشا ەڭ ۇزدىك مامان, راديوستانتسيا باستىعى كىشى سەرجانت ديدار سەيسەنباەۆ بولدى. سونداي-اق, ماراپاتتالۋشىلاردىڭ قاتارىندا ەڭبەگى بايقالا بەرمەيتىن, الايدا ونسىز اسكەردى ەلەستەتۋ مۇمكىن ەمەس مامان يەلەرى دە بولدى. ولار: ماتەريالدىق-تەحنيكالىق قامتاماسىز ەتۋ مامانى, اسكەري پوليتسيا قىزمەتكەرى, اسكەري دارىگەر, سپورتشى, بايلانىسشى, اۋە شابۋىلىنا قارسى قورعانىس سالاسىنىڭ مامانى, تاربيەشى-وفيتسەر جانە وقىتۋشى.
ايتا كەتكەن ءجون, قورعانىس ۆەدومستۆوسى باسشىلىعىنىڭ شەشىمى بويىنشا كونكۋرس جىل سايىن ۇزدىك اسكەري مامانداردى انىقتاۋ جانە كوتەرمەلەۋ, سونداي-اق اسكەري قىزمەتكە قاجەتتى داعدىلاردى ارتتىرۋ ءۇشىن وتكىزىلەدى.
