حاتتاماعا ماسكەۋدە 2018 جىلعى 22 تامىزدا قول قويىلدى جانە وندا «بايتەرەك» عارىش زىمىران كەشەنىن قۇرۋ جونىندەگى جوبانى ىسكە اسىرۋدىڭ نەگىزگى شارتتارى مەن قازاقستاندىق جانە رەسەيلىك تاراپتار اراسىندا جوبانىڭ ىسكە اسىرىلۋىن قارجىلاندىرۋدى ءبولۋ تۋرالى ايتىلادى.
حاتتاما ەرەجەلەرىنە سايكەس قازاقستاندىق تاراپ: رەسەيلىك تاراپ جالعا الاتىن وبەكتىلەر قۇرامىنان شىعارىلعاننان كەيىن بازاسىندا «بايتەرەك» كەشەنىن قۇرۋ كوزدەلەتىن «زەنيت-م» عارىش زىمىران كەشەنىنىڭ جەرۇستى عارىش ينفراقۇرىلىمى وبەكتىلەرىن ۇستاۋدى جانە پايدالانۋدى; «زەنيت-م» عارىش زىمىران كەشەنىنىڭ جەرۇستى عارىش ينفراقۇرىلىمى وبەكتىلەرىن رەكونسترۋكتسيالاۋدى جانە جاڭعىرتۋدى; ستارتتىق جانە تەحنيكالىق كەشەندەردى پايدالانۋ بويىنشا پەرسونالدى دايىنداۋدىڭ وقۋ-جاتتىعۋ قۇرالدارىن جاساۋدى; قازاقستان رەسپۋبليكاسىنىڭ اۋماعىندا تاسىمالداعىش زىمىرانداردىڭ بولىنەتىن بولىكتەرىنىڭ قۇلاۋ اۋداندارىن ءبولۋدى; تەلەكوممۋنيكاتسيالىق جانە اقپاراتتىق قامتاماسىز ەتۋ جۇيەسىن جاڭعىرتۋدى قارجىلاندىرۋدى قامتاماسىز ەتەدى.
سونداي-اق حاتتامامەن «زەنيت-م» عارىش زىمىران كەشەنىنىڭ وبەكتىلەرىن جالداۋدان شىعارۋ جانە ولاردى قازاقستاندىق تاراپقا بەرۋ جانە ەكولوگيالىق قاۋىپسىزدىك دەڭگەيى جوعارى ورتا كلاستى تاسىمالداعىش زىمىرانداردى پايدالانۋ كوزدەلگەن. قارالىپ وتىرعان حاتتامانى راتيفيكاتسيالاۋ جانە ونىڭ كەيىننەن كۇشىنە ەنۋى قازاقستانعا جەرۇستى عارىش ينفراقۇرىلىمىنىڭ مەنشىكتى وبەكتىلەرىن پايدالانا وتىرىپ, ىسكە قوسۋ قىزمەتىن جۇزەگە اسىراتىن مەملەكەتتەردىڭ قاتارىنا قوسىلۋعا مۇمكىندىك بەرەدى.
سونىمەن قاتار بۇگىنگى وتىرىستا دەپۋتاتتار «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ەڭبەك ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ءبىرىنشى وقىلىمدا ماقۇلدادى.
زاڭ جوباسىندا ەڭبەك كودەكسىنە, اكىمشىلىك قۇقىق بۇزۋشىلىق تۋرالى كودەكسىنە, سونداي-اق «اسكەري قىزمەت جانە اسكەري قىزمەتشىلەردىڭ مارتەبەسى تۋرالى» جانە «كاسىپتىك وداقتار تۋرالى» زاڭدارىنا وزگەرىستەر مەن تولىقتىرۋلار ەنگىزۋ كوزدەلىپ وتىر.
اتاپ ايتقاندا, زاڭ جوباسىندا: ەڭبەك شارتتارىن ەسەپكە الۋدى اۆتوماتتاندىرۋ ماقساتىندا ەڭبەك شارتىن ەلەكتروندىق نىساندا جاساسۋ ءتارتىبىن بەكىتۋگە; جۇمىس بەرۋشىلەردىڭ جۇمىسكەرلەرگە ەڭبەك جانە تۇرمىس بويىنشا لايىقتى جاعدايلار جاساۋ جونىندەگى مىندەتىن بەلگىلەۋگە; ازاماتتاردىڭ مەرزىمدى اسكەري قىزمەت وتكەرۋ كەزەڭىندە جۇمىس بەرۋشىنىڭ كورسەتىلگەن ۋاقىت كەزەڭىنە جالاقىسى ساقتالمايتىن دەمالىس بەرۋ جونىندەگى مىندەتىمەن تولىقتىرىلا وتىرىپ, جۇمىس ورنىن ساقتاۋعا; وتباسىنىڭ ناۋقاس مۇشەسىنە كۇتىمدى جۇزەگە اسىراتىن جۇمىسكەرلەرگە تولىق ەمەس جۇمىس ۋاقىتى رەجيمىنە قۇقىق بەرۋگە باعىتتالعان نورمالار, سونداي-اق جۇمىس ورىندارىنداعى كاسىپتىك تاۋەكەلدەردى باعالاۋ جانە باسقارۋ نەگىزىندە ەڭبەكتى قورعاۋدى باسقارۋ جۇيەسىن ەنگىزۋگە باعىتتالعان تۇزەتۋلەر ۇسىنىلىپ وتىر.
زاڭ جوباسىنىڭ نورمالارىن جان-جاقتى تالقىلاۋ ماقساتىندا مۇددەلى مەملەكەتتىك ورگانداردىڭ, سونداي-اق كاسىپتىك وداقتار ورگاندارىنىڭ وكىلدەرىمەن جۇمىس كەزدەسۋلەرى ۇيىمداستىرىلدى. جۇمىس كەزدەسۋلەرىن ەڭبەكتى قورعاۋ جانە ەڭبەك قاۋىپسىزدىگىنە, كاسىپتىك وداقتاردىڭ قىزمەتىن جەتىلدىرۋگە, ەڭبەك سالاسىندا قۇقىقتىق جانە الەۋمەتتىك كەپىلدىكتەردى قامتاماسىز ەتۋگە باعىتتالعان زاڭ جوباسىنىڭ ەرەجەلەرىن ىسكە اسىرۋ تەتىگىمەن بايلانىستى ماسەلەلەر تالقىلاندى.
جالپى وتىرىس سوڭىندا حالىق قالاۋلىلارى ورتالىق مەملەكەتتىك اتقارۋشى ورگانداردىڭ باسشىلارىنا دەپۋتاتتىق ساۋالدار جولدادى. ولار د.مىڭباي, ج.دۇيسەباەۆ, ر.كيم, ا.قوڭىروۆ, د.ەسپاەۆا, ا.پەرۋاشەۆ.
