جولاۋشىلار ءتۇسىپ جاتقاندا ونىڭ تۇساۋكەسەرى جاسالىپ, قىزىل لەنتانى وبلىس اكىمى ارحيمەد مۇحامبەتوۆ پەن FlyArystan كومپانياسىنىڭ ماركەتينگ جانە ساتۋ جونىندەگى ديرەكتورى جانار جايلاۋوۆا كەستى. قوستانايعا ەلوردادان ۇشاقپەن 180 جولاۋشى ۇشىپ كەلدى. وتە جايلى كولىككە راحمەتىن ايتىپ جاتتى.
«بۇل بيۋدجەتتىك كومپانيا ەكەنىن بىلەسىزدەر. جولاۋشىلارعا قولايلى تاريف بولادى. نۇرسۇلتان قالاسىنا قوستانايدان ەڭ كوپ دەگەندە 6 مىڭ تەڭگەمەن جەتەدى ءارى جىلدام. ەكى قالانىڭ ورتاسىنا بارىپ-كەلۋ ءنابارى 12 مىڭ تەڭگە شاماسىندا بولادى. بۇل وتە تومەن باعا. بۇل جەردە ارينە, ەڭ باستىسى ساپا بولىپ تابىلادى» دەدى ارحيمەد بەگەجان ۇلى.
جانار جايلاۋوۆا وسى كومپانيانىڭ رەيستەرى اشىلعالى قازاقستاندا جولاۋشىلار تاسىمالى 30 پايىزعا ارتقانىن ايتتى.
«الداعى ۋاقىتتا قوستانايدان باسقا قالالارعا دا باعىتتار اشىلۋى مۇمكىن. ول ءۇشىن وبلىس اكىمشىلىگىمەن تىعىز جۇمىس ىستەيتىنىمىزگە ءۇمىتتىمىز. شىعىنى تومەن بولسا, بيلەت باعاسىنىڭ قۇنى دا تومەندەيدى» دەدى جانار جايلاۋوۆا.
قولايلى ءارى ارزان كولىك قوستانايلىقتاردىڭ نازارىن بىردەن اۋدارسا كەرەك. وبلىس اكىمىنىڭ ايتۋىنا قاراعاندا, جەلتوقسان ايىنىڭ سوڭىنا دەيىن بارلىق بيلەت ساتىلىپ كەتكەن. ارحيمەد مۇحامبەتوۆ كومپانيا باسشىلىعىنا راحمەتىن ايتىپ, ولارمەن الداعى ۋاقىتتا ىنتىماقتى جۇمىس ىستەۋگە وبلىستىڭ دايىن ەكەنىن دە جەتكىزدى.
«ۇشاقتىڭ قاتىناۋىنا ساپالى قىزمەت كورسەتۋ باستى مىندەتىمىز بولىپ تابىلادى. بيىل قوستاناي اۋەجايىنىڭ ۇشۋ-قونۋ جولاقتارى جاڭعىرتىلدى. ۇزىندىعى 2 شاقىرىم 500 مەتردەن 2 شاقىرىم 800 مەترگە جەتكىزىلدى, ەنى 45 مەتردەن 60 مەترگە كەڭەيتىلدى. ەندى 200 تونناعا دەيىنگى اۋە كەمەلەرىن قابىلداي بەرەدى. سوعان وراي جابدىقتار دا جاڭارتىلدى» دەدى ارحيمەد بەگەجان ۇلى.
وبلىس اكىمى كەلەسى جىلى اۋەجايدىڭ ءوزى جوندەلەتىنىنەن دە حاباردار ەتتى. تەرمينال كەڭەيتىلىپ, جولاۋشىلاردى قابىلداۋعا, شىعارىپ سالۋعا بارلىق جاعداي زاماناۋي دەڭگەيگە جەتكىزىلەتىن بولادى.
