زامانىندا جەتىسۋداعى قانت ءوندىرىسىنىڭ نەگىزگى ۇلەسىن قۇراعان زاۋىتتىڭ ءبىرى وسى قارابۇلاق اۋىلىندا ورنالاسقان ەدى. قازىر ءوندىرىس جۇمىس ىستەمەيدى. كەزىندە سالىنعان عيماراتتار ەندى الەۋمەتتىك ماسەلەگە ارقاۋ بولىپ تۇر. مىسالى, قانت زاۋىتىنىڭ جۇمىسشىلارىنا ارنالعان 30 پاتەرلى تۇرعىن ءۇي 1990 جىلدان بەرى قاراۋسىز تۇر. قازىر بارلىق ينجەنەرلىك جەلىلەر اجىراتىلعان. بىراق, اۋدان اكىمدىگى بۇل كوپ قاباتتى ۇيگە كۇردەلى جوندەۋ جۇرگىزە الماي وتىر. سەبەبى, عيمارات يەسىز دەپ تانىلماعانىمەن, پاتەر يەلەرىنىڭ قولىندا زاڭدى قۇجات بارى كەدەرگى بولۋدا. ال مەنشىك ەگەلەرى اكىمدىكتىڭ تالابىنا مويىنۇسىنار ەمەس. ماسەلە بويىنشا بىرنەشە رەت سوت وتىرىسى وتكەنىمەن, ءىس ناقتى شەشىمىن تاپقان جوق.
ال وسى اۋىلدىڭ بايىرعى تۇرعىنى ەلەنا ۆەليكايا ورتالىق كارىز جۇيەسىنىڭ توزىپ كەتكەنىن ايتادى.
- كارىز جۇيەسىنەن شىققان اعىندى سۋ جىل بويى جاپسارباەۆ كوشەسىنىڭ بويىمەن قانت زاۋىتىنىڭ فيلترلەۋ القابىنا دەيىن اعىپ جاتادى. جاعىمسىز ءيىس جەر-كوكتى الىپ كەتەدى. بۇل ماسەلەدەن وبلىس اكىمىنە دەيىن حاباردار. بىزگە جوبالىق-سمەتالىق قۇجات دايىنداۋعا بيۋدجەتتىك تاپسىرىس بەرىلگەنىن ايتقان, تەك كارىز جۇيەسىنىڭ كۇردەلى جوندەۋى تەزىرەك باستالسا ەكەن, - دەيدى اۋىل تۇرعىنى.
