رەيتينگتىك باسەكەدە جەتى قازاق بوكسشىسى شارشى الاڭعا شىعىپ, التاۋى جەڭىسكە جەتتى. اتاپ ايتساق, ءميراسالى سارسەنوۆ پەن راي سەيتجانوۆ ازىربايجاندىق اسقار راگيموۆ پەن راميز مامادوۆتى, ەلشات نىعمەتوللا مەن نۇرتاس اجبەنوۆ فيليپيندىك كريس الفانتە مەن لەندي كرۋس لەوندى, اباي تولەش چەحيالىق توماش بەزۆودانى ۇپاي ساندارىمەن ۇتتى.
بىردەن ايتا كەتەيىك, بۇل كەزدەسۋلەردىڭ بىرىندە دە جەڭىس جەرلەستەرىمىزگە وڭايلىقپەن كەلگەن جوق. جات ەلدەردەن كەلگەن سپورتشىلاردىڭ بارلىعى دا قارىمدى ەكەن. كاسىپقوي بوكستاعى كارەرالارىن ەندى عانا باستاپ جۇرگەن قازاق جىگىتتەرىنە ءوز جانكۇيەرلەرىن قۋانتۋ ءۇشىن سول جارىستا كوپ تەر توگۋگە تۋرا كەلدى.
دارىندى جاس نۇردوس تولەباي مەن ءازىربايجاننىڭ وكىلى ءنابي ابدۋلاراميزوۆ اراسىنداعى جەكپە-جەك قانا مەرزىمىنەن بۇرىن اياقتالدى. ءبىرىنشى راۋندتا قانداسىمىز قارسىلاسىن بۇيىردەن قاتتى ۇرىپ, قارسىلاسىن اۋىر نوكداۋنعا جىبەردى. ۇزىلىستەن كەيىن قاپ تاۋىنىڭ قىرانى باسەكەنى جالعاستىرۋدان باس تارتتى.
وسى جارىستا وزبەكستاننىڭ ەكى بىردەي ورەنىنىڭ ونەرىن تاماشالادىق. اسىرەسە, ريو وليمپياداسىنىڭ جەڭىمپازى, الەم چەمپيوناتىنىڭ كۇمىس جۇلدەگەرى فازليددين گايبنازاروۆتىڭ اسقان شەبەرلىگىنە ءتانتى بولدىق, داڭقتى بوكسشى ۋكراينالىق ۆلاديسلاۆ بارانوۆتى ءبىرىنشى راۋندتا-اق ۇرىپ جىقتى. ال ازيا ويىندارى مەن قۇرلىق بىرىنشىلىگىنىڭ جۇلدەگەرى حۋرشيد توجيباەۆ يندونەزيالىق ايزەك دجۋنيوردى جەڭدى.
سول سەكىلدى نيگەريالىق اليۋ باميدەلە لاسيزي مەن يندونەزيالىق حامسون لامانداۋ اراسىنداعى جەكپە-جەك تە كورەرەمەندەردىڭ كوڭىلىنەن شىقتى. رينگكە قازاقتىڭ زەرلى شاپانىمەن شىققان قارا قۇرلىق وكىلىنە سپورت سارايىنا جينالعان جانكۇيەرلەر بىردەن قولداۋ كورسەتە باستادى. سونىڭ اسەرى بولسا كەرەك, شارشى الاڭدا ءوزىن تىم ەركىن سەزىنگەن لاسيزي بۇل باسەكەدە كۇمانسىز جەڭىسكە جەتتى.
جەرلەستەرىمىزدىڭ اراسىنان تەك ەسكەندىر حارساننىڭ جولى بولمادى. وسى كۇنگە دەيىن جەتى كەزدەسۋ وتكىزىپ, بارلىعىندا جەڭىسكە جەتكەن 22 جاستاعى تانىمال بىلعارى قولعاپ شەبەرىمىز بۇل جولى كامەرۋندىق توماس ەسسومباعا ەسە جىبەردى. باسەكە باستالعان بەتتە ەسكەندىر اۋىر سوققى جىبەرىپ الدى. سودان ول ايىعا المادى. ءبىرىنشى راۋندا ەكى نوكداۋن السا, ءۇشىنشى راۋندتا تورەشى باسەكەنى توقتاتۋعا ءماجبىر بولدى. تەحنيكالىق نوكاۋت!
كەش سوڭىندا ەكى بىردەي التىن بەلبەۋ ساراپقا سالىندى. قازاق جانكۇيەرلەرى ۇلكەن سەنىم ارتىپ وتىرعان جالىندى جاس سۇلتان زاۋىربەك قىتايدان كەلگەن لەشان ءليدى ۇتىپ, وزىنە تيەسىلى WBC Youth World Champion (جاستار) نۇسقاسىنىڭ التىن بەلبەۋىن ساقتاپ قالدى. قارسىلاسىنىڭ ەكى كوزى بىردەي ءىسىپ كەتىپ, كورۋدەن قالعاندىقتان بۇل باسەكە مەرزىمىنەن بۇرىن توقتاتىلدى.
قازاقستانىڭ تاعى ءبىر بەلدى بوكسشىسى ۆيكتور كوتوچيگوۆ وزىنە تيەسىلى WBC International نۇسقاسىنىڭ چەمپيوندىق ءتاجىن قورعاپ قالۋ ءۇشىن ارگەنتينانىڭ ازۋلى بوكسشىسى حاۆەر حوسە كلاۆەرومەن كۇش سىناستى. 10 راۋندتىق سايىستىڭ قورىتىندىسى بويىنشا جەڭىس ءبىراۋىزدان جەرلەسىمىزگە بەرىلدى. وسىلايشا, ەكى التىن بەلبەۋ دە ەلدە قالدى.
ەستەرىڭىزگە سالا كەتەيىك, بۇل باسەكەلەر وتاندىق «قازسپورت» ارناسىنان بولەك, اقش-تىڭ ايگىلى ESPN تەلەارناسى ارقىلى تورتكۇل دۇنيەنىڭ 60-تان اسا مەملەكەتىندە تىكەلەي ەفيردەن كورسەتىلەدى. سونداي-اق, iFL TV يۋتۋب جوباسى دا ارقىلى بۇل جارىس الەمنىڭ باسقا دا ايماعىنا كەڭىنەن تاراتىلدى. وسىنىڭ بارلىعى قازاقستاننىڭ كاسىپقوي بوكسىنىڭ شارتاراپقا تارالۋىنا وڭ ىقپال ەتەتىنى ءسوزسىز.
ءسوز ورايى كەلگەندە بىرقاتار جەرگىلىكتى جانە شەتەلدىك كومپانيالار جانە الماتى قالاسىنىڭ اكىمدىگىنىڭ قولداۋىمەن وتكەن جارىسقا قازاقستاننىڭ بىلعارى قولعاپ شەبەرلەرىن ساعاتبەك مۇساحانوۆ, قانات التاەۆ جانە داستان سادۋاقاسوۆ سىندى بىلىكتى باپكەرلەر دايىندادى.
