رۋحانيات • 16 جەلتوقسان، 2019

بىلىكتى ماماندار تاجىريبەسىن ارتتىرۋ مەموراندۋمىنا قول قويدى

50 رەتكورسەتىلدى

تاۋەلسىزدىك مەرەكەسىنە وراي وتكەن سالتاناتتى شارادا ۇلتتىق مەملەكەتتىك كىتاپ پالاتاسى مەن ءال-فارابي اتىنداعى قازۇۋ جۋرناليستيكا فاكۋلتەتىمەن اراداعى مەموراندۋمعا قول قويىلدى. ماڭىزدى قۇجاتقا سايكەس  جۋرناليستيكا فاكۋلتەتىنىڭ  باسپاگەرلىك-رەداكتورلىق جانە ديزاينەرلىك ونەر كافەدراسىنىڭ ستۋدەنتتەرى كىتاپ پالاتاسىندا تەگىن وندىرىستىك تاجىريبەدەن ءوتىپ، ۇزدىك وقىعان ستۋدەنتتەردىڭ جۇمىسقا ورنالاسۋى  قاراستىرىلعان.

بۇگىندە بىلىكتى ماماندار دايارلاۋدا وندىرىستىك تاجىريبەنىڭ سالماعى باسىم. وسى تۇرعىدان العاندا ەلىمىزدە شىعاتىن بارلىق باسپا باسىلىمدارىنىڭ مىندەتتى داناسىن تىركەپ، ونىڭ ستاتيستيكاسىن، بيبليوگرافيالىق كورسەتكىشىن جاساپ، سىنى مەن سىرىن بۇزباي كەلەر ۇرپاققا جەتكىزۋدى ماقسات ەتىپ وتىرعان قارا شاڭىراقتا 20-30 جىل ەڭبەك ءوتىلى بار تاجىريبەلى دە، بىلىكتى بيبليوگرافتار قىزمەت ەتىپ كەلەدى.

سالتاناتتى شارانى اشىپ، ىزگى تىلەگىن بىلدىرگەن ۇلتتىق مەملەكەتتىك كىتاپ پالاتاسىنىڭ ديرەكتورى ءادىل قويتانوۆ «ەلىمىزدىڭ جاستارى تاۋەلسىزدىك تارتۋ ەتكەن مۇمكىندىكتەردى پايدالانىپ، ءبىلىمدى دە بىلىكتى مامان بولىپ قالىپتاسۋى كەرەك. سوعان نەگىزدەلگەن شارانىڭ ءبىرى ەكى ۇلتتىق ۇجىمنىڭ بۇگىنگى بىرلەسكەن مەموراندۋمى. بىزدە وسى سالادا تاجىريبەلى دە، بىلىكتى بيبليوگرافتار قىزمەت ەتەدى. مىنە، ستۋدەنتتەر تەوريالىق بىلىمدەرىن وندىرىستىك تاجىريبەدەن وتكەندە وسى مامانداردان ۇيرەنسە، ەرتەڭگى جۇمىستارىندا يگىلىكتەرىنە اينالارى انىق» دەپ اتاپ ءوتتى.

ال ءوز كەزەگىندە جۋرناليستيكا فاكۋلتەتىنىڭ دەكانى ساعاتبەك مەدەۋبەك ۇلى جينالعانداردى تاۋەلسىزدىك مەرەكەسىمەن قۇتتىقتاي كەلە ء«بىز دايىنداپ وتىرعان جاستار ەلىمىزدىڭ بولاشاعى. ولاردىڭ كۇنى ەرتەڭ جۇمىسقا ورنالاسۋى ءۇشىن سىزدەر سەكىلدى ۇجىمدارمەن ەرتە باستان بايلانىس ورناتۋدامىز. جۇمىس بەرۋشىلەرگە قانداي ماماندار قاجەت، ولاردى قاي باعىتتا دايىنداۋىمىز كەرەكتىگىن زەرتتەۋدەمىز. سوندىقتان تاۋەلسىزدىك مەرەكەسى قارساڭىندا ءوتىپ وتىرعان بۇگىنگى شارانىڭ ماڭىزى وتە جوعارى» دەگەن ويلارىن ورتاعا سالدى.

سالتاناتتى شارا بارىسىندا كىتاپ پالاتاسى ديرەكتورىنىڭ ورىنباسارى تولقىن تۇرعاليقىزى ستۋدەنت جاستارعا ءوز تاجىريبەسىن جان-جاقتى ۇيرەتەتىنىن جەتكىزسە، ديرەكتوردىڭ ورىنباسارى، اقىن مارالتاي رايىمبەك ۇلى ءوز قۇتتىقتاۋىن جىرمەن ارنادى. اقىن الماسبەك احمەتبەك ۇلى دا تىلەگىن بەلگىلى «كوك تۋدىڭ جەلبىرەگەنى» ولەڭىمەن جەتكىزىپ، جۇرەك جاردى لەبىزىن ءبىلدىردى.

 الماتى

سوڭعى جاڭالىقتار

باسىلىم باسشىلارى - ەركىن قىدىر (1962)

باسىلىم باسشىلارى • كەشە

ۇقساس جاڭالىقتار