ماحامبەت اتىنداعى وبلىستىق اكادەميالىق قازاق دراما تەاترىندا تاۋەلسىزدىك كۇنىنە ارنالعان سالتاناتتى جينالىس ءوتتى. اتىراۋ وبلىسىنىڭ اكىمى نۇرلان نوعاەۆ اتىراۋلىقتاردى مەرەكەمەن قۇتتىقتاپ, بۇل كۇننىڭ ەلدىڭ تاۋەلسىزدىك تاريحىندا ايرىقشا ماڭىزعا يە ەكەنىن ايتتى.
- قازاقستان ءوز تاۋەلسىزدىگىن جاريالاپ, بابالارىمىزدىڭ عاسىرلار بويعى ارمانىنا قول جەتكىزدى. ءبىزدىڭ بۋىن جاڭا قازاقستاننىڭ دۇنيەگە كەلۋ, قالىپتاسۋ كەزەڭىندە ءومىر ءسۇرىپ, دامۋىنا بەلسەندى ۇلەس قوسۋ باقىتىنا يە بولدى. بىزگە حالقىمىزدىڭ بوستاندىق پەن تۋعان جەردى گۇلدەندىرۋ تۋرالى ارماندارىن ىسكە اسىرۋ مارتەبەسى مەن جاۋاپكەرشىلىگى جۇكتەلدى, - دەدى نۇرلان نوعاەۆ.
ايماق باسشىسى ەلباسى - قازاقستاننىڭ تۇڭعىش پرەزيدەنتىنىڭ سارابدال ساياساتى ارقاسىندا بارلىق قازاقستاندىقتىڭ قولداۋىمەن قيىندىقتاردى بىرگە جەڭىپ, جوعارى ناتيجەلەرگە جەتكەنىمىزدى اتاپ ءوتتى.
- ءبىز قازىر سول قيىن دا جاۋاپتى كۇندەردىڭ وتەۋىندەي تابىسقا جەتىپ وتىرمىز. ءبىز قازىر ءومىردىڭ بارلىق سىناقتارىن جەڭۋگە كۇش-قايراتىمىز جەتەتىنىن سەنىممەن ايتا الامىز. مەملەكەت باسشىسى قاسىم-جومارت توقاەۆتىڭ ازاماتتىق قوعامدى دامىتۋ, ورتالىق, جەرگىلىكتى اتقارۋشى ورگانداردىڭ ماسەلەلەرىن شەشۋگە حالىقتى تارتۋ تۋرالى العا قويعان مىندەتتەرىن, تاپسىرمالارىن تابىستى ورىندايتىنىمىزعا سەنەمىن. ازاماتتاردىڭ بىردە-ءبىر ۇسىنىس-پىكىرى ەسكەرۋسىز قالمايدى. بارشاڭىزعا ەلدىڭ يگىلىگى ءۇشىن اتقارىپ جۇرگەن جۇمىستارىڭىزعا ريزاشىلىعىمدى بىلدىرەمىن. ساياسي تۇراقتىلىق, قوعامدىق كەلىسىم مەن بىرلىك دامۋىمىزعا نەگىز بولارىنا سەنەمىن, - دەپ اتاپ ءوتتى نۇرلان نوعاەۆ.
سالتاناتتى شارا بارىسىندا قازاقستاننىڭ وركەندەۋىنە ۇلەس قوسقان ءتۇرلى سالا وكىلدەرى مەملەكەتتىك ماراپات الدى. وبلىس اكىمى «پاراسات» وردەنىمەن, «شاپاعات», «ەرەن ەڭبەگى ءۇشىن» مەدالدارىمەن, العىس حاتتارمەن ونداعان اتىراۋلىقتى ماراپاتتادى.
پرەزيدەنت قاسىم-جومارت توقاەۆتىڭ اتىنان ايماق باسشىسى ارىس قالاسىن قالپىنا كەلتىرۋ جۇمىستارىنا قاتىسقان بيزنەس وكىلدەرىن, قۇرىلىسشىلاردى ماراپاتتادى.
وبلىس اكىمى ارىستا كوپ جۇمىس اتقارىلعانىن, قالا تۇرعىندارىنىڭ بارلىق قازاقستاندىققا ريزاشىلىعىن اتاپ ءوتتى. ورتاق ىسكە اتىراۋ وبلىسى دا بەلسەندى قاتىستى, بۇل حالقىمىزدىڭ قيىن ساتتەردە بىرلىك پەن ىنتىماقتا بولا الاتىنىن كورسەتتى.
اتىراۋ
