سالتاناتتى شارانى اشقان اتىراۋ وبلىسى اكىمى نۇرلان نوعاەۆ ەسكەرتكىشتىڭ ورنالاسقان جەرىنىڭ ءوزى – جايىقتىڭ جاعاسى – ەرەكشە ەكەنىن اتاپ ءوتتى.
- حاميت اعامىزدىڭ ءوزى جىرلاپ وتكەن اق جايىقتىڭ بويىندا, وزەنگە كوز تاستاعان ءزاۋلىم ەسكەرتكىشى بوي كوتەردى. سوڭعى كۇنىنە دەيىن ءوزىنىڭ ەلىن, جەرىن جىرلاپ, جازىپ, تاسقا تاڭبا باسقانداي ەتىپ كەتتى. ءبىر سوزبەن ايتقاندا, ءوز ەلىنە ءبىر ادامداي ەڭبەك ەتتى. مىنە, مىنا الاڭعا الداعى ۋاقىتتا جينالاتىن اتىراۋلىقتار مەن قالا قوناقتارى, وسى ەسكەرتكىشكە كوز تاستاپ, حاميت اعامىزدىڭ ولەڭدەرىمەن تانىسىپ, ءوز بويلارىنداعى ۇلتقا, ەلگە, جەرگە دەگەن سەزىمدەرىن نىعايتادى دەگەن سەنىمدەمىن, - دەدى نۇرلان نوعاەۆ.
ەسكەرتكىش اۆتورى – ءمۇسىنشى نۇرعالىم يساباەۆتىڭ ايتۋىنشا, بيىكتىگى جەتى مەتر بولاتىن تۋىندى قولادان قۇيىلعان. اقىننىڭ بار بولمىسىن بەرۋ ءۇشىن, شەبەر ءبىر جىل بويى تىنىمسىز ەڭبەك ەتكەن.
ەسكەرتكىشتىڭ اشىلۋ سالتاناتىنا حاميت ەرعاليەۆتىڭ ۇل-قىزى – مۇرات ەرعاليەۆ پەن گۇلجان ەرعاليەۆا, قازاقستان جازۋشىلار وداعى باسقارما توراعاسىنىڭ ورىنباسارى مەرەكە قۇلكەنوۆ جانە اتىراۋ وبلىسىنىڭ قوعام جانە مادەنيەت قايراتكەرلەرى قاتىستى.
ارقالى اقىن حاميت ەرعاليەۆ 1916 جىلى يساتاي اۋدانىنىڭ نوۆوبوگات اۋىلىندا تۋعان. قازىر بۇل اۋىل اقىننىڭ اتىمەن اتالادى.
1940 جىلدان اسكەر قاتارىندا كاۆالەريا بولىمىندە ەسكادرون كومانديرى بولعان. ۇلى وتان سوعىسى كەزىندە بۋداپەشت ماڭىنداعى ۇرىستاردىڭ بىرىندە اۋىر جارالانىپ, 1945 جىلى ەلگە قايتارىلادى. ءىى دەڭگەيلى ۇلى وتان سوعىسى وردەنىمەن, ەكى مارتە ەڭبەك قىزىل تۋ وردەنىمەن, قۇرمەت بەلگىسى مەن حالىقتار دوستىعى وردەندەرىمەن جانە كوپتەگەن مەدالدارمەن ماراپاتتالعان. العاشقى ولەڭدەرى 1936 جىلى باسىلدى. وتىزدان استام كىتاپتىڭ اۆتورى – حاميت ەرعاليەۆ – قازاق ادەبيەتىندە وزىندىك ايقىن ءىزىن قالدىردى. 1982 جىلى "التىن زەرەن" كىتابى ءۇشىن اباي اتىنداعى مەملەكەتتىك سىيلىق تابىستالسا, 1986 جىلى – قازاقستاننىڭ حالىق جازۋشىسى قۇرمەتتى اتاعى بەرىلدى.
