ەكونوميكانىڭ, بانك سالاسىنىڭ جاي-كۇيى, رەسپۋبليكالىق بيۋدجەتتىڭ ورىندالۋى, مەملەكەتتىك ساتىپ الۋلارداعى جەرگىلىكتى قامتۋ تۋرالى ۇلتتىق ەكونوميكا ءمينيسترى ر. دالەنوۆ, ۇلتتىق بانك توراعاسى ە. دوساەۆ, پرەمەر-ءمينيستردىڭ ءبىرىنشى ورىنباسارى - قارجى ءمينيسترى ءا. سمايىلوۆ باياندادى.
قازاقستان ەكونوميكاسى تۇراقتى ءوسۋ قارقىنىن كورسەتىپ وتىر - 2019 جىلدىڭ قاڭتار-قاراشا ايلارىندا ءجىو ءوسىمى وتكەن جىلدىڭ ءتيىستى كەزەڭىنە 4,4% قۇرادى.
قۇرىلىستا – 12,1%, ساۋدادا – 7,5%, كولىك سالاسىندا – 5,6%, وڭدەۋ سەكتورىندا, ونىڭ ىشىندە ماشيناجاساۋدا – 19,2%, اۆتوموبيل جاساۋدا – 64%, جەڭىل ونەركاسىپتە – 16,6%, ءتۇستى مەتالدار وندىرىسىندە – 6,8%, كوكس جانە مۇناي وڭدەۋ ونىمدەرىندە – 5,3%, مەتالل كەنىن وندىرۋدە – 15,7%, بايلانىس قىزمەتتەرىندە – 4,7%, ونەركاسىپتە – 3,6% وڭ ديناميكا بايقالىپ وتىر. ۇلتتىق قور اكتيۆتەرى 4,3%-عا, $60,5 ملرد-قا دەيىن ءوستى, رەسپۋبليكالىق بيۋدجەتكە كىرىستەر – 9595,7 ملرد تەڭگە (جوسپارعا 100,2%), ءوسۋ قارقىنى 117,6% قۇرادى.
«ەلباسى نۇرسۇلتان ءابىش ۇلى نازارباەۆ جانە مەملەكەت باسشىسى قاسىم-جومارت توقاەۆ ءبىزدىڭ الدىمىزعا ەكونوميكانىڭ تۇراقتى ءوسىمىن قامتاماسىز ەتۋ مىندەتىن قويدى», - دەدى ا. مامين.
پرەمەر-مينيستر سالالىق مينيسترلىكتەر مەن وڭىرلەردىڭ باسشىلارىنا كورسەتكىشتەردى جوسپارلىق ماندەرىنە شىعارۋ بويىنشا بارلىق قاجەتتى شارالاردى قابىلداۋدى تاپسىردى.
ۇكىمەت باسشىسى ا.ج. 11 ايىنىڭ قورىتىندىسى بويىنشا ەكونوميكانىڭ دامۋىنىڭ جوعارعى ءوسىمى بايقالىپ وتىرعان اقتوبە, جامبىل, شىعىس قازاقستان, قاراعاندى, تۇركىستان وبلىستارىنىڭ اكىمدىكتەرىنىڭ جۇمىسىنا وڭ باعا بەردى. ارتتا قالعان اكىمدىكتەرگە پروبلەمالىق كورسەتكىشتەرگە قاتىستى ماسەلەلەردى تۇزەتۋ بويىنشا ءتيىستى شارالار قابىلداۋ قاجەتتىگى اتاپ كورسەتىلدى.
بيۋدجەت قاراجاتىنىڭ يگەرىلمەۋىنە جول بەرگەن اكىمدەر مەن مەملەكەتتىك ورگانداردىڭ باسشىلارى تىڭدالدى.
«بيۋدجەتتىڭ كىرىس بولىگى بويىنشا بيىلعى جىلدىڭ جوسپارىن اسىرا ورىنداۋ بايقالدى. بىراق, بىرقاتار اكىمشىلەر ءالى دە بيۋدجەت قاراجاتىنىڭ يگەرىلمەۋىنە جول بەرىپ وتىر», - دەدى ا. مامين.
ۇكىمەت باسشىسى بيۋدجەتتىك باعدارلامالار اكىمشىلەرىنە قارجىلىق جىلدىڭ سوڭىنا دەيىن (ا.ج. 20 جەلتوقسانىنا) بولىنگەن بيۋدجەت قاراجاتىن تولىق كولەمدە يگەرۋ بويىنشا شارالار قابىلداۋدى تاپسىردى.
