ناتيجەسىندە, ارناۋلى وقۋ ورىندارىندا ساباقتى ۇزدىك وقيتىن ستۋدەنتتەردىڭ شاكىرتاقىسى 19 272 تەڭگەدەن 24 090 تەڭگەگە دەيىن وسەتىن بولسا, باسقا ساناتتاعى بىلىمگەرلەردىڭ دە 16 759 تەڭگە ستيپەندياسى 20 948 تەڭگەگە دەيىن جوعارىلايتىن بولدى. سونداي-اق, جوعارى ءبىلىمدى باكالاۆريات جانە ماگيستراتۋرا جۇيەسى بويىنشا الاتىن ستۋدەنتتەرگە تولەنەتىن ستيپەنديا مولشەرى دە ارتادى. قازىر باكالاۆرياتتاعى ستۋدەنت 20 949 تەڭگە شاكىرتاقى السا, ەندى ول 26 186 تەڭگەگە دەيىن وسەدى. ال ماگيستر-بىلىمگەرگە بۇگىندە 53 530 تەڭگە تولەنسە, ول كوبەيە كەلە 66 913 تەڭگەنى قۇراماق. مۇنان بولەك, دوكتورانتۋرادا ءبىلىمىن شىڭدايتىن بولاشاق عالىمدار ءۇشىن دە قۋانىشتى جاڭالىق بار. ماسەلەن, جاس ىزدەنىمپاز قازىر 81 998 تەڭگە شاكىرتاقى السا, ەندى ول 102 498 تەڭگەگە دەيىن ۇلعايادى.
- مەن 4 جىل باكالاۆرياتتا, 2 جىل ماگيستراتۋرادا وقىدىم. نەگىزگى تابىسىم ستيپەنديا ەدى. ستۋدەنت بولعان كۇننەن 20950 مىڭ تەڭگە ستيپەنديا الدىم. ال ماگيسترانت بولعاندا 53530 مىڭ تەڭگە الدىم. بۇل قاراجات مەنىڭ كۇندەلىكتى ءومىر سۇرۋىمە, كوممۋنالدىق قىزمەتتەردى تولەۋىمە جەتىپ وتىردى. ەندى 3 جىل دوكتورانتۋرادا وقيمىن. دوكتورانتتاردىڭ ستيپەندياسى 82 مىڭ. جاڭا-جىلدان باستاپ ول 102500 تەڭگە بولادى. بۇل دەگەنىڭىز ءبۇتىن ءبىر وتباسىن اسىراۋعا جەتەتىن قاراجات. سوندىقتان ستيپەنديانىڭ 25 پايىزعا وسكەنىنە قاتتى قۋانىپ وتىرمىن. ءى.جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتىندە مەن سياقتى گرانتتا وقيتىن سەگىز جۇزدەن استام ستۋدەنت بار. ولاردىڭ اراسىندا جاقسى ۇلگەرىمى ءۇشىن جوعارىلاتىلعان ستيپەنديا الاتىندارى قانشاما. ءبىلىم العان جىلدارىمىزدى مەملەكەتىمىز ستيپەنديامەن قولداپ وتىرسا, بىزگە بۇدان ارتىق نە كەرەك؟ ءسوزسىز 9 جىل بويى العان ءبىلىمىمدى ەلىمنىڭ دامۋىنا ارنايمىن. قۋانىشتى حابارمەن ەلىمىزدىڭ بارلىق ستۋدەنتتەرىن قۇتتىقايمىن جانە جەتىسۋلىق ستۋدەنتتەر اتىنان پرەزيدەنتكە العىس بىلدىرەمىن, - دەيدى ءى.جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتىنىڭ 1-كۋرس دوكتورانتى ايىم تىنىسحانوۆا.
الماتى وبلىسى
