«سامۇرىق-قازىنا» ۇلتتىق ءال-اۋقات قورى» اق مەن «ينتەر راو» جاق اكتسيالارى تەڭ نەگىزىندە يەلىك ەتكەن قازاقستان-رەسەي بىرلەسكەن كاسىپورنى 2005 جىلى قۇرىلعان ەدى. قازاقستان تاراپى ءۇشىن قوعام قىزمەتىنىڭ باسىم باعىتى ستانسانى كەڭەيتۋ جانە قايتا قۇرۋ شەڭبەرىندە 636 مۆت بولاتىن ءۇشىنشى ەنەرگوبلوكتى ورناتۋ بولىپ تابىلادى. بۇل جوبانى ىسكە اسىرۋ قازاقستاننىڭ ەلەكتر قۋاتىنا ءوسىپ كەلە جاتقان قاجەتتىلىگىن قامتاماسىز ەتۋگە, ونىڭ ەكسپورتتىق الەۋەتىن ارتتىرۋعا ىقپال ەتەر ەدى.
2009 جىلى قازاقستان رەسپۋبليكاسى مەن رەسەي فەدەراتسياسىنىڭ ۇكىمەتتەرى اراسىنداعى كەلىسىم شەڭبەرىندە «ەكىباستۇز ماەس-2» اق «ەكىباستۇز ماەس-2 №3 ەنەرگوبلوگىنىڭ قۇرىلىسى» جوباسىن ىسكە اسىرۋعا كىرىستى. 2010 جىلى ءتيىستى جوبالاۋ-سمەتالىق قۇجاتتاما ازىرلەنىپ, مەملەكەتتىك ساراپتامادان ءوتتى. وسىنىڭ نەگىزىندە «ەكىباستۇز ماەس-2» اق-نىڭ 50% ۇلەستى ساتىپ الۋ تۋرالى شەشىم قابىلداندى.
«ەكى جىل بۇرىن «ينتەر راو» ەنەرگەتيكالىق كومپانياسى رەسەي فەدەراتسياسىندا ءوز بيزنەسىن دامىتۋ ستراتەگياسىنا ساي «ەكىباستۇز ماەس-2» اق-داعى ۇلەسىن ساتاتىنىن مالىمدەپ, 50 ملن دوللارعا باعالادى. كەلىسسوزدەردى قازاقستان تاراپىنان «سامۇرىق-ەنەرگو» كومپانياسى جۇرگىزدى. كەلىسسوزدەر قورىتىندىسى بويىنشا تاراپتار اتالعان اكتيۆتى 25 ملن دوللارعا ساۋدالاۋعا كەلىسىپ, ءتيىستى قۇجاتتارعا قول قويىلدى», دەيدى ا.ساتقاليەۆ.
باسقارۋشى ديرەكتوردىڭ مالىمەتىنشە, اتالعان اكتيۆكە «سامۇرىق-قازىنانىڭ» قىزىعۋشىلىعى «ەكىباستۇز ماەس-2» اكتسيونەرلىك قوعامىنىڭ ءۇشىنشى بلوگىنىڭ قۇرىلىسىن باستاۋعا قاجەتتىلىگىنەن تۋىنداپ وتىر. ويتكەنى اتالعان جوبا بويىنشا ەلباسىنىڭ تىكەلەي تاپسىرماسى بار. قوردىڭ باسقارۋشى ديرەكتورىنىڭ پىكىرىنە سۇيەنسەك, قازىرگى كەزەڭدە قوسىمشا 636 مۆت قۋات وندىرۋگە مۇمكىندىك تۋىنداپ وتىر. ول ءۇشىن باستاپقى قارجىلاندىرۋ جاسالىپ, نەگىزگى قۇرىلعىلاردى تاڭداۋ ءۇشىن كونكۋرس جاسالدى.
ء«بىز ەلەكتر ەنەرگەتيكاسى سالاسى تۇراقتى جۇمىس ىستەپ, ەلەكترمەن قامتۋ سەنىمدى قامتاماسىز ەتىلۋىنە مۇددەلىمىز. سوندىقتان «ەكىباستۇز ماەس-2» اق-نىڭ 100 پايىز اكتسياسى قازاقستاننىڭ قولىندا بولۋى, ءبىزدىڭ ويىمىزشا, كاسىپورىننىڭ تۇراقتى جۇمىس ىستەۋىنە كەپىلدىك بەرەدى», دەيدى باسقارۋشى ديرەكتور. ا.ساتقاليەۆتىڭ مالىمەتىنشە, ەلەكتر قۋاتىنىڭ ءوندىرىسى مەن ساتىلىمى كەزىندە عانا ەمەس, سونىمەن قاتار كومىر ءوندىرىسى, تاسىمالى مەن قازاقستاننىڭ وندىرىستىك سەكتورىنىڭ تۇتىنۋشىلارىن ەلەكتر قۋاتىمەن قامتاماسىز ەتۋ تۇرعىسىنان ءۇشىنشى ەنەرگوبلوكتىڭ قۇرىلىسى قور پوزيتسياسىن جاقسارتۋعا جول اشپاق.
