سالتاناتتى شاراعا قازاقستان حالقى اسسامبلەياسى توراعاسىنىڭ ورىنباسارى – حاتشىلىق مەڭگەرۋشىسى جانسەيىت تۇيمەباەۆ, پارلامەنت ءماجىلىسىنىڭ دەپۋتاتتارى, مەملەكەتتىك ورگان وكىلدەرى مەن قوعام قايراتكەرلەرى, زيالى قاۋىم وكىلدەرى, اسسامبلەيا مۇشەلەرى جانە باق وكىلدەرى قاتىستى.
– اتا-بابالارىمىز عاسىرلار بويى اڭساعان تاۋەلسىزدىك ورناعان كۇن – ەلىمىزدىڭ ەڭ قاستەرلى مەرەكەلەرىنىڭ ءبىرى. بۇل مەرەكە – ۇلان-بايتاق قازاقستاندى مەكەن ەتكەن بارشا جۇرتتى باۋىرلاستىرا تۇسەتىن, ولاردى وتانىمىزدىڭ وركەندەۋى ءۇشىن جۇمىلدىرا تۇسەتىن ايتۋلى داتا. وسى كۇن قارساڭىندا ەكونوميكانىڭ ءار سالاسىندا قولعا العان باستامالاردىڭ ناقتى ىسكە اسۋى, بيىك ناتيجەلەرگە قول جەتكىزىلۋى, جوبالاردىڭ ەل قۋاتىن ارتتىرۋعا قوسقان ۇلەسى تۋرالى ەسەپ بەرىلىپ جاتادى. بۇل – تاۋەلسىزدىك جىلدارىندا قالىپتاسقان ءداستۇر. سونداي-اق زاڭمەن ۇلتتىق مەرەكە دەپ جاريالانعان بۇل كۇنى ەرەن ەڭبەگىمەن, عاجايىپ ونەرىمەن, تولاعاي تابىستارىمەن ەرەكشەلەنگەن ازاماتتارىمىزدى ماراپاتتاۋ دا داستۇرگە اينالعان, – دەدى جانسەيىت تۇيمەباەۆ.
شارا اياسىندا بىرقاتار ازاماتتار ەكونوميكانى, الەۋمەتتىك سالانى, عىلىم مەن مادەنيەتتى, ءبىلىم بەرۋ ءىسىن دامىتۋعا سىڭىرگەن ەڭبەكتەرى ءۇشىن, مەملەكەتتiك ورگاندارداعى مiنسiز قىزمەتi جانە بەلسەندi قوعامدىق قىزمەتتەرi ءۇشiن «قۇرمەت» وردەنىمەن, «ەرەن ەڭبەگى ءۇشىن» مەدالىمەن ماراپاتتالدى. سونداي-اق ەل بىرلىگىن, بەيبىتشىلىك پەن كەلىسىمدى نىعايتۋعا, رۋحاني مادەنيەتتى دامىتۋعا قوسقان ۇلەستەرى ءۇشىن وتانداستارىمىزعا «قازاقستان حالقى اسسامبلەياسىنىڭ قوعامدىق «بiرلiك» التىن مەدالi» تابىستالدى. ولاردىڭ قاتارىندا «Egemen Qazaqstan» رەسپۋبليكالىق گازەتى» اكتسيونەرلىك قوعامىنىڭ باسقارما توراعاسى دارحان قىدىرالى دە بار.
ەلباسىنىڭ تاپسىرماسى بويىنشا قازاقستان حالقى اسسامبلەياسى قىزمەتىنىڭ نەگىزگى باعىتتارىنىڭ ءبىرى – قايىرىمدىلىق ءىسىن دامىتۋ. قوعام دامۋىنىڭ قايىرىمدىلىق ۆەكتورىن جانداندىرۋعا, مەتسەناتتىق جانە قايىرىمدىلىق قىزمەتتى دامىتۋعا ەڭبەك سىڭىرگەن ازاماتتار قازاقستان حالقى اسسامبلەياسىنىڭ «جومارت جان», «مەيىرىم» توسبەلگىلەرىمەن ماراپاتتالدى. «مەيىرىم» توسبەلگىسىنە يەلىك ەتكەندەر قاتارىندا «Egemen Qazaqstan» اق باسقارما توراعاسىنىڭ ورىنباسارى – باس رەداكتور ايبىن شاعالاق, گازەتتىڭ شولۋشىلارى سۇڭعاتوللا ءالىپباي, الەكساندر تاسبولاتوۆ, قاراشاش توقسانباي بولدى.
ال قوعامدىق كەلىسىم مەن قازاقستاندىق ءپاتريوتيزمدى نىعايتۋعا ەلەۋلى ۇلەس قوسقان تۇلعالار قازاقستان حالقى اسسامبلەياسىنىڭ قۇرمەت گراموتاسىنا, العىس حاتىنا يە بولدى.
جانسەيىت تۇيمەباەۆ اتالعان ءىس-شارانىڭ الدىندا «Egemen Qazaqstan» گازەتىنىڭ رەداكتسياسىندا قوناقتا بولىپ, باسىلىم ۇجىمىن تاۋەلسىزدىك كۇنىمەن جانە «ەگەمەننىڭ» 100 جىلدىق مەرەيتويىمەن قۇتتىقتاپ, بىرقاتار ءجۋرناليستى ماراپاتتادى.
«Egemen Qazaqstan» گازەتىنىڭ مەرەيتويى جىل باسىنان بەرى تويلانىپ كەلەدى. بۇگىن قاراشاڭىراققا كەلىپ, گازەت ۇجىمىن ارنايى قۇتتىقتاۋدى ءجون كوردىك. «ەگەمەن» رەسپۋبليكامىزدا شىعاتىن بارشا باسىلىمنىڭ باستاۋشىسى, ۇزاق جىلداردان بەرى قازاق حالقىنىڭ مۇددەسىن قورعاپ كەلە جاتقان بىردەن-ءبىر گازەت. وسى جولدا قىزمەت ەتىپ, جازىپ جۇرگەن, تەحنيكالىق جاعىنان قامتاماسىز ەتەتىن ازاماتتاردىڭ ەڭبەگى زور. سىزدەردىڭ ەرەن ەڭبەكتەرىڭىز ءۇشىن العىس بىلدىرەمىن, باستىسى زور دەنساۋلىق, وتباسىلارىڭىزعا اماندىق جانە شىعارماشىلىق تابىس تىلەيمىن», دەدى ج.تۇيمەباەۆ.
سونداي-اق بىرقاتار جۋرناليست قازاقستان حالقى اسسامبلەياسىنىڭ ماراپاتىنا يە بولدى. ۇلتارالىق كەلىسىم مەن جالپىۇلتتىق بىرلىكتى نىعايتۋعا ۇلەس قوسقانى ءۇشىن «Egemen Qazaqstan» گازەتىنىڭ شولۋشىسى انار تولەۋحان مەن جۋرناليست مايگۇل سۇلتان «مەيىرىم» توسبەلگىسىمەن ماراپاتتالدى. سونداي-اق, گازەت قىزمەتكەرلەرى بەكەن قايرات ۇلى, بەرىك سادىر, جىلقىباي جاعىپار ۇلى, ارنۇر اسقار, ورىنبەك پازىلوۆ, ەركەجان ايتقازى جانە سۆەتلانا عالىمجانقىزىنا العىس حاتتار تابىستالدى.
راۋان قابيدولدا,
مەرۋەرت بۇركىتباي,
«Egemen Qazaqstan»
