«2017 جىلدان بەرى «جۇرەگى تولى مەيىرىم» جوباسى اياسىندا وبلىسىمىزداعى جالعىزباستى اتا-اجەلەرىمىزدىڭ ءۇيىن جيناستىرىپ بەرۋدەمىز. باتاسىن الامىز جانە دە حالىقارالىق قارتتار كۇنى سىيلىقتارىمىزدى بەرىپ, ءبىر قۋانتامىز. ازداعان ازىق-ت ۇلىك بولسىن, كيىم-كەشەكتەر بولسىن سولاردى جيناپ, جاعدايى تومەن وتباسىلارعا الەۋمەتتىك كومەك تە كورسەتەمىز», دەيدى ەرىكتىلەر كورپۋسىنىڭ ۇيلەستىرۋشىسى ونەر قۇلشاعاەۆ.
ەرىكتىلەر كورپۋسى قۇرىلعالى بەرى ەكى جىلدان اسىپتى. بۇگىنگە دەيىن ءۇش جۇزگە تارتا ستۋدەنت مۇشەلىككە قابىلدانعان. ولار ساباقتان بوس كەزدە جاستار ورتالىعىندا باس قوسادى. تەگىن ترەنيگ-دارىستەرگە قاتىسىپ, كوشباسشىلىق قابىلەتىن ۇشتايدى. بارلىعى كورپۋس جەتەكشىسى كوتەرگەن يگى باستامالارعا بەلسەنە قاتىسىپ ءجۇر.
بۇگىندە 81 جالعىزباستى ازاماتقا كومەك كورسەتىلگەن. اپتاسىنا ەكى رەت بالالار بارىپ, ءۇيىن جينايدى. جانە وسى ۋاقىتقا دەيىن 162 وتباسىعا الەۋمەتتىك كومەك بەرىلگەن. باستاماشىل جاستار «كومەكشى ۇستاز» جانە «كومەكشى دارىگەر» جوبالارىن وتكەن ناۋرىزدان بەرى جۇزەگە اسىرىپ كەلەدى. حالىقتى الەۋمەتتىك قورعاۋ مەكەمەسىنەن اقپارات الىنىپ, ءتىزىم جاسالعان. سول بويىنشا ەرىكتىلەر مەكەنجاي ارالاپ, قاجەت كومەك ءتۇرىن كورسەتەدى. سونداي-اق تۇرمىستا زورلىق كورگەندەرگە ارنالعان ورتالىق تۇرعىندارىنا قارجى جيناپ, جاردەمدەسىپ ءجۇر.
