سونىمەن قاتار, دەپۋتاتتار وبلىس اكىمدىگىندە ونەركاسىپتىڭ تسيفرلىق جولعا ءتۇسۋ ماسەلەلەرى مەن سۇراقتارىن تالقىلاعان كوشپەلى وتىرىس وتكىزدى. جيىنعا, سونداي-اق وبلىس اكىمى جەڭىس قاسىمبەك, تسيفرلىق دامۋ, يننوۆاتسيالار جانە اەروعارىش ونەركاسىبى ۆيتسە-ءمينيسترى ابىلايحان وسپانوۆ, يندۋستريا جانە ينفراقۇرىلىمدىق دامۋ ۆيتسە-ءمينيسترى امانياز ەرجانوۆ قاتىستى.
كوشپەلى وتىرىستا ءوڭىر باسشىسى جەڭىس قاسىمبەك بۇل سالادا جەتىستىكتەرمەن قاتار ءالى دە بولسا شەشىمىن تاپپاعان ماسەلەلەردىڭ دە بار ەكەنىن تىلگە تيەك ەتتى.
– ءبىز ءۇشىن بۇل وتە ماڭىزدى ماسەلە. وبلىس ەكونوميكاسىنىڭ 50%-تەن استامى ونەركاسىپتىڭ ۇلەسىنە تيەسىلى. كاسىپورىنداردىڭ باسىم بولىگى ەكسپورتقا باعىتتالعان. ەرتەڭ ۇتىلماۋ ءۇشىن ءبىز تسيفرلىق تەحنولوگيالاردى جەدەل ەنگىزۋىمىز كەرەك. بىزدە اۋىز تولتىرىپ ايتارلىق مىسالدار بار, بىراق جۇيەلىك پروبلەمالار دا جوق ەمەس. ءبىز اشىق ديالوگتا وسى ماسەلەلەردى تالقىلاۋعا ءازىرمىز, – دەدى ول.
جيىن بارىسىندا سەناتورلار تسيفرلاندىرۋدىڭ دامۋىنا نەندەي كەدەرگىلەردىڭ بولىپ جاتقانىن جانە بۇل سالادا قانداي زاڭنامالىق وزگەرىستەردىڭ قاجەت ەكەنىن سۇراستىردى.
مىسالى, ء«وڭىر» دەپۋتاتتىق توبىنىڭ جەتەكشىسى, ەكونوميكالىق ساياسات, يننوۆاتسيالىق دامۋ جانە كاسىپكەرلىك كوميتەتىنىڭ مۇشەسى ميحايل بورتنيك تسيفرلاندىرۋسىز كاسىپورىنداردىڭ, جالپى العاندا ەلدىڭ باسەكەگە قابىلەتتىلىگىن قامتاماسىز ەتۋدىڭ مۇمكىن ەمەستىگىن اتاپ ءوتتى.
– ەلباسى مەن مەملەكەت باسشىسى ەكونوميكانى ودان ءارى تسيفرلاندىرۋ تۋراسىندا ناقتى تاپسىرلمالار بەردى. ءبىزدىڭ مىندەتىمىز – قازىرگى ۋاقىتتا جەتىستىكتەردىڭ, سونىمەن قاتار قيىندىقتاردىڭ دا بار ەكەنىن كوزبەن كورۋ. بۇگىن قاراعاندىلىق كاسىپورىنداردا كورگەنىمىز قازاقستان تسيفرلاندىرۋ زامانىندا ءوزىنىڭ لايىقتى ورنىن تابا الادى دەگەن ءۇمىت ۇيالاتادى. مىسالى, «Maker» جشس بىزگە بارلىق تەحنولوگيالىق تىزبەكتى كورسەتتى. تسيفرلىق قوندىرعىنى نەمەسە روبوتتالعان ماشينانى ساتىپ الۋ ءبىر باسقا دا, ال باسىنان باستاپ سوڭىنا دەيىن تەحنولوگيانى دۇرىس قۇرۋ – ودان دا كۇردەلى ماسەلە, – دەپ اتاپ ءوتتى دەپۋتاتتىق توپتىڭ جەتەكشىسى.
سونداي-اق جيىندا تسيفرلىق دامۋ, يننوۆاتسيالار جانە اەروعارىش ونەركاسىبى ۆيتسە-ءمينيسترى ابىلايحان وسپانوۆ «تسيفرلىق قازاقستان» باعدارلاماسىن جۇزەگە اسىرۋ بارىسى تۋرالى اڭگىمەلەسە, يندۋستريا جانە ينفراقۇرىلىمدىق دامۋ ۆيتسە-ءمينيسترى امانياز ەرجانوۆ قاراعاندى وبلىسى بويىنشا ىسكە اسىرىلىپ جاتقان جوبالار جايىن ءسوز ەتتى.
– قاراعاندى وبلىسىندا 3.0 يندۋسترياسىنا سايكەس كەلەتىن جانە 4.0 يندۋسترياعا وتۋگە بارىنشا دايىن جوعارى اۆتوماتتاندىرىلعان وندىرىستەر بار. 10 كاسىپورىندا 33 جوبانى ىسكە اسىرۋ جوسپارلانعان. ينۆەستيتسيانىڭ جالپى سوماسى 160 ملرد تەڭگەنى قۇرايدى, – دەدى ا.ەرجانوۆ.
جالپى, كوشپەلى ماجىلىسكە قاتىسۋشىلار ونەركاسىپتە تسيفرلاندىرۋ جوباسىن ىسكە اسىرۋ بويىنشا قاراعاندى وبلىسىنىڭ ەلىمىزدە كوش باستاپ تۇرعانىن اتاپ ءوتتى. مىسالى, وڭىردە كومىر باسسەيندەرىنىڭ شاحتالارىندا «قارا التىندى» اۆتوماتتاندىرىلعان تۇردە ەسەپكە الۋ جۇەيلەرى ەنگىزىلىپ, سىنامالى تسيفرلىق فەرمالار ىسكە قوسىلعان. سونداي-اق, تسيفرلىق تەحنولوگيالار ءوندىرىس ورىندارىندا دا كەڭىنەن قولدانىلا باستاعان.
كوشپەلى وتىرىستا دەپۋتاتتار ونەركاسىپشىلەردىڭ بىلىكتى كادرلاردىڭ جەتىسپەۋشىلىگى, سالىق جەڭىلدىكتەرى, نەسيەلەردى ارزانداتۋ تۇرىندەگى ىنتالاندىرۋ فاكتورلارىنىڭ قاجەتتىلىگى تۋرالى ايتقان ءوتىنىش-تىلەكتەرىن مۇقيات تىڭداپ, ولار بويىنشا ۇكىمەتكە, ورتالىق جانە جەرگىلىكتى اتقارۋشى ورگاندارعا جىبەرىلەتىن ۇسىنىمدار ازىرلەيتىندىكتەرىن جەتكىزدى.
قاراعاندى وبلىسى
