قوعام • 11 جەلتوقسان، 2019

الماتى وبلىسىندا جاسوسپىرىمدەر اراسىنداعى سۋيتسيد ازايماي تۇر

56 رەت كورسەتىلدى

وكىنىشكە قاراي، الماتى وبلىسىندا بيىل جاسوسپىرىمدەر اراسىندا وزىنە-ءوزى قول جۇمساۋ وقيعاسى ازايمادى.

وتكەن ون اي ىشىندە 33 بالا سۋيتسيدكە وقتالىپ، ونىڭ جيىرما ەكىسىنىڭ قىرشىنىنان قيىلعانى جايىندا دەرەك بار. ال بۇرناعى جىلى 15-17 جاس ارالىعىنداعى ورەندەردىڭ ولىمگە مويىنسۇنۋ دەرەگى قىرىقتىڭ ۇستىندە بولعان ەكەن.

سۋيتسيدكە يتەرمەلەگەن سەبەپتەر دە ءار الۋان. ماماندار ادامنىڭ وزىنە قول سالۋىن جۇيكە جۇيەسىنىڭ سىر بەرۋى مەن الەۋمەتتىك، قارجىلىق، وتباسىلىق قيىندىقتاردىڭ شەشىمىن تابا الماۋ سياقتى جاعدايلارعا سىلتەيدى. ال بالالار اراسىنداعى وقيعالار اتا-انا اراسىنداعى كيكىلجىڭ، بالالاردىڭ ءوزارا كيكىلجىڭى، مۇعالىمدەر تاراپىنان ايتىلعان ەسكەرتپەلەردەن كەيىن ورىن الادى ەكەن.

ءدال وسى جەردە مەكتەپ مۇعالىمدەرى تاراپىنان قىسپاق كورىپ، وزىنە قول جۇمساعان دەرەككە نازار اۋدارۋ قاجەت سياقتى. ماسەلەن، جىل باسىندا وبلىستىڭ تالعار اۋدانىندا 9-سىنىپ وقۋشىسى ساباقتان كەيىن وزىنە قول جۇمساپ، ومىرىمەن قوش ايتىسقان ەدى. وكىنىشتىسى، مەكتەپتە بولعان كيكىلجىڭنەن كەيىن ۇيىنە كەلگەن وقۋشى قوراعا كىرىپ، اسىلىپ قالىپتى.

« ۇلىم سول كۇنى ساباقتان كوڭىلسىز كەلدى. سەبەبىن سۇراعاندا، 7 سىنىپتىڭ وقۋشىسىمەن توبەلەسكەنىن ءبىلدىم. وسى وقيعانى كورگەن مەكتەپتىڭ گەوگرافيا ءپانىنىڭ مۇعالىمى ونى بۇكىل مەكتەپ وقۋشىلارىنىڭ كوزىنشە جازالاپ، نامىسىن تيەتىن ءسوز ايتقان. مۇنى تومەنگى سىنىپتا وقيتىن قىزىم ايتىپ كەلدى. مەن ۇلىم ساباسىنا تۇسكەسىن سويلەسۋدى ويلاپ، ءىستى ۋشىقتىرمادىم. ول قورانى تازالاۋعا شىعىپ كەتكەن. ارتىنان بارعانىمىزدا اسىلىپ قالىپتى. جانۇشىرىپ دارىگەر شاقىردىق، كومەكتسە المادىق، - دەگەن ەدى سول كەزدە قان جۇتقان انا جۋرناليستەرگە.

ايتپاقشى، ايماقتا بالالار اراسىنداعى قۇقىقبۇزۋشىلىق تا كوبەيىپ تۇر. مۇنىڭ ءبىر سەبەبىن قۇزىرلى ورىندار مەكتەپ ينسپەكتورلارىنىڭ جەتىسپەۋشىلىگىنەن ىزدەيدى. قازىر ايماقتاعى 760 ءبىلىم بەرۋ مەكەمەسىندە بار بولعانى 182 پوليتسيا ۋاكىلى جۇمىس ىستەيدى ەكەن.

 

 

الماتى وبلىسى

 

سوڭعى جاڭالىقتار

قاي سالادا جالاقى ءوستى؟

ەكونوميكا • كەشە

رەسەي ازاماتتارى العىس ايتتى

ايماقتار • 26 اقپان، 2021

ۇقساس جاڭالىقتار