بۇگىندە «الماتى-2050» دامۋ ستراتەگياسى ازىرلەنىپ, قالا جۇرتشىلىعى تاراپىنان تالقىلانۋ ۇستىندە. ءومىر ءسۇرۋ ساپاسى بويىنشا الەمنىڭ ۇزدىك 100 قالاسىنىڭ قاتارىنا ەنۋدى ماقسات ەتەتىن قۇجاتتىڭ كەلەشەگى جارقىن. قازىرگى كەزدە قالا اكىمدىگى وسى باعىتتاعى جۇمىستاردى باستاپ تا كەتتى. «وسىناۋ ماقساتقا قولجەتكىزۋ جانە مەگاپوليستىڭ بارلىق بۇرىشىندا ساپاسى جاعىنان بىردەي جولدار, جارىق, سۋمەن قامتۋ جانە وركەنيەتتىڭ باسقا دا نىشاندارى بولۋى ءۇشىن ءبىز تاياۋداعى بىرنەشە جىلدار ىشىندە جول جانە ينفراقۇرىلىمدىق ماسەلەلەردى تولىق شەشەمىز. ءتيىمدى جۇمىس جاساۋ, ءبىرىمىزدى-ءبىرىمىز تىڭداي جانە ەستي الۋ ءۇشىن ءبىز ەكىجاققا دا پايدالى وسىنداي كەزدەسۋلەر وتكىزۋدەمىز. تەك بىرلەسىپ جۇمىس ىستەگەندە عانا تابىسقا جەتەتىن بولامىز», دەپ اتاپ ءوتتى ب. ساعىنتاەۆ. اكىمنىڭ ايتۋىنشا, كەلەر جىلدان باستاپ قالا بيۋدجەتىنىڭ «مەنىڭ اۋلام», «مەنىڭ كوشەم», «مەنىڭ اۋدانىم» ماقساتتى باعدارلامالارى جۇزەگە اساتىن بولادى. وسىلايشا, اۋدانداردىڭ ماسەلەلەرى تولىق كولەمىندە شەشىمىن تاباتىن بولادى.
بۇل اكىمنىڭ اۋدان تۇرعىندارىمەن وتكىزگەن ەكىنشى كەزدەسۋى.مەكتەپتەردەگى ورىن تاپشىلىعى تۋرالى ب.ساعىنتاەۆ قالادا شامامەن 30 مىڭ ورىننىڭ جەتىسپەيتىنىن ايتتى. ءمجا اياسىندا 13 مىڭ ورىندى سەگىز مەكتەپ سالۋ بويىنشا كەلەر جىلدان اۋقىمدى باعدارلامانىڭ قولعا الىناتىنىن حابارلادى. بالا باقشالار سالۋ بويىنشا دا وسىنداي جۇمىستار جۇرگىزىلەتىن بولادى.
اۋدانداعى ەسكى ۇيلەردى ءسۇرۋ ماسەلەسى ءالى كۇنگە وزەكتى. قالانىڭ ءباسپاسوز قىزمەتىنىڭ مالىمەتى بويىنشا, «ەسكى ۇيلەر» باعدارلاماسى اياسىندا جاڭا ۇيلەر سالۋ ءۇشىن جەكە ينۆەستورلار تارتىلىپ, قالا باسشىسىنىڭ ايتۋىنشا, بۇل باعىتتاعى جۇمىستار جالعاسۋدا. الايدا, تۇرعىنداردىڭ كەيبىرەۋلەرى ۇسىنىلعان شارتتارمەن كەلىسپەگەندىكتەن, ەسكى ۇيلەردى ءسۇرۋ ماسەلەسى ۇزاققا سوزىلۋدا. اۋداندا جارتى ميلليوننان استام اعاش بولسا, ونىڭ 12 مىڭعا جۋىق اپاتتى اعاشتار. ەندىگى كەزەكتە ولاردى كەسۋ ماسەلەسى تالقىلاندى. «نۇرشاشقان» ىقشاماۋدانىندا مەدپۋنكت سالۋ تۋرالى قويىلعان سۇراق بويىنشا قالا اكىمى ب. ساعىنتاەۆ قۇجاتتاردى جەدەل مەرزىمدە ازىرلەۋدى ءارى كەلەر جىلى الەۋمەتتىك نىساندى پايدالانۋعا بەرۋدى تاپسىردى. الماتى اكىمى بىردەن اۋداننىڭ جۇكتەمەسى كوپ كوشەلەرى ارقىلى جاياۋ جۇرگىنشىلەردىڭ وتپەلى جولدارىنا باعدارشامدار ورناتۋدى تاپسىردى.
«تۇرعىنداردى تولعاندىراتىن اعىمداعى ماسەلەلەردى شۇعىل شەشۋ قاجەت, ال نازاردى جۇيەلى ماسەلەلەرگە اۋدارعان ءجون», دەپ قالا اكىمى ب.ساعىنتاەۆ اۋدان اكىمى مەن قالالىق باسقارمالار مەن قىزمەتتەردىڭ باسشىلارىنا قاداپ تۇرىپ ايتتى. وزگە اۋداندارداعىداي تۇركسىب اۋدانىنىڭ تۇرعىندارى دا قوعامدىق كولىكتىڭ ساپاسىنا شاعىمداندى. حابارلانعانىنداي, بارلىق باعىتتاردى ءجۇز پايىز قامتاماسىز ەتۋ ءۇشىن قالاعا شامامەن مىڭ اۆتوبۋس قاجەت. قازىرگى كەزدە قالانىڭ تاسىمالداۋشىلارى اي سايىن اۆتوپاركتەردى جاڭارتىپ, جاڭا اۆتوبۋستاردى جەلىگە شىعارۋدا. «جالپى, قوعامدىق تاسىمالداۋدى ۇيىمداستىرۋدا ءبىز الەم قالالارىنىڭ وزىق تاجىريبەلەرىن يگەرەتىن بولامىز, باعىتتاردى تۇرعىنداردىڭ سۇرانىسى بويىنشا جاساقتايمىز, قالالىقتار قاي جاققا ءجيى باراتىن بولسا, اۆتوبۋستار دا سول باعىتتار بويىنشا جۇرەتىن بولادى», دەپ اتاپ ءوتتى قالا اكىمى ب. ساعىنتاەۆ.
كەزدەسۋدى قورىتىندىلاعان الماتى اكىمى باقىتجان ساعىنتاەۆ بىرقاتار ماسەلەلەردىڭ جەدەل شەشىلەتىندىگىن ايتىپ, جۇيەلى سۇراقتاردىڭ جوبالىق-سمەتالىق قۇجاتتارىن ازىرلەۋ, ولاردى شەشۋ ءارى بيۋدجەتپەن قامتاماسىز ەتۋ ءۇشىن ۋاقىت قاجەتتىگىن قاپەرگە الدى.
